މެންޗެސްޓަރ ޔުނައިޓެޑްގެ ސަޕޯޓަރުންނަށް އެކުލަބުގެ ތާރީޚުގައި އެންމެ ކާމިޔާބު ކޯޗު ސަރ އެލެކްސް ފާގަސަން އެކުލަބު ބެންޗުން އަނެއްކާވެސް ފެނުމުގެ ފުރުސަތު ލިބިއްޖެއެވެ.

ޔުނައިޓެޑްގެ ކޯޗުކަމުން ވަކިތާ ހަތަރު އަހަރު ފަހުން ފާގަސަން އަނެއްކާވެސް އެޓީމަށް އިރުޝާދު ދޭތަން ފެނިގެންދާނީ އަންނަ އޭޕްރިލް މަހުގެ 4 ވަނަ ދުވަހުއެވެ.

ހަތާވީސް އަހަރަށްފަހު ޔުނައިޓެޑްގެ ކޯޗުކަމުން ވަކިވުމަށްފަހު، އޭގެ ހަތަރު އަހަރުފަހުން އޯލްޑް ޓްރެފޯޑުގެ ބެންޗަށް ފާގަސަން މިދަނީ ޚާއްސަ މެޗެއްގައި އެޓީމަށް ކޯޗު ކޮށްދިނުމަށެވެ.

މި ޚާއްސަ މެޗަކީ މެންޗެސްޓަރ ޔުނައިޓެޑްގެ މެދުތެރެއަށް ކުޅެމުން އަންނަ މައިކަލް ކެރިކުގެ އެޓީމަށް ކޮށްދީފައވާ ޚިދުމަތުގެ އަގުވަޒަން ކުރުމުގެ ގޮތުން ކުޅޭ ޚާއްސަ ޓެސްޓިމޯނިއަލް މެޗުގައި އެ ޓީމަށް ކޯޗުކޮށްދޭށެވެ.

މި ޚާއްސަ މެޗުގައި ފާގަސަން ކޯޗުކޮށްދޭނީ އޭނާއަށް އެންމެ ޚާއްސަ ސީޒަންކަމަށް 2008 ވަނަ އަހަރުގެ ސީޒަނުގައި ޔުނައިޓެޑަށް ކުޅުނު ކުރިންތެރިން ހިމެނޭ ޓީމަށެވެ.

ދެހާސް އަށްވަނަ އަހަރުގެ ޗެމްޕިއަންސް ލީގު އުފުލާލި ޓީމުގައި ކެރިކްގެ އިތުރުން ކްރިސްޓިއާނޯ ރޮނާލްޑޯ، ޕޯލް ސްކޯލްސް، ވޭން ރޫނީ، ރިއޯ ފާޑިނަންޑް އަދި އެޑްވިން ވޭން ޑަ ސާގެ އިތުރުން ގިގްސް އަދި ކާލޯސް ޓެވޭޒްފަދަ ކުޅުންތެރިން ހިމެނެއެވެ.

ޗެމްޕިއަންސް ލީގު ނެގުމުގެ އިތުރުން 2008 ވަނަ އަހަރުގެ ލީގުވެސް ޔުނައިޓެޑްވަނީ ކާމިޔާބުކޮށްފައެވެ. އެއަހަރުގެ ޗެމްޕިއަންސް ލީގުގެ ފައިނަލުގައި މޮޅުވެ ތަށި އުފުލާލި ނަމަވެސް އެމެޗުގައި ޕާކް ޖީ ސަންގް އަށް އެމެޗުން ފުރުސަތު ނުދެވުމަކީ މިއަދާ ހަމަޔަށް ވެސް ފާގަސަން ހިތާމަކުރާކަމެއް ކަމަށްވަނީ ބުނެފައެވެ.

މިޚާއްސަ މެޗުގައި އަނެއްކޮޅުން ވާދަކުރާނީ އޯލްސްޓަރ ޓީމެކެވެ. އެޓީމަށް ކޯޗުކޮށްދޭނީ، ވެސްޓްހޭމްގައި ހޭދަކުރި ދުވަސްކޮޅު ކެރިކަށް ކޯޗުކޮށްދިން ރެޑްނެޕެވެ.

އޯލްސްޓަރ ޓީމަށް ކުޅޭ ކުޅުންތެރިންގެ ތެރޭގައި ޗެލްސީގެ ކުރީގެ ކެޕްޓަން އަދި ލެޖެންޑް ފްރޭންކް ލަމްޕާޑްގެ އިތުރުން ލިވަޕޫލްގެ ކުރީގެ ކެޕްޓަން ލެޖެންޑް ސްޓީވެން ޖެރާޑް ހިމެނެ އެވެ.

ފާގަސަން ޔުނައިޓެޑަށް ކޯޗުކޮށްދިން 27 އަހަރުގެ ތެރޭގައި އެކުލަބަށް38  ތަށި ކާމިޔާބުކޮށްދީފައިވެއެވެ.

މި ޚާއްސަ މެޗާ ބެހޭ ގޮތުން މެންޗެސްޓަރ ޔުނައިޓެޑްގެ ޓީވީއަށް ދިން އިންޓަވިއުއެއްގައި ފާގަސަން ބުނެފައިވަނީ ކެރިކުގެ ހާއްސަ މެޗުގައި އަލުން އޯލްޑް ޓްރެފޯޑުގައި ޔުނައިޓެޑްގެ ބެންޗަށް ދެވޭތީ ވަރަށް ބޮޑަށް އުފާވާ ކަމަށެވެ.

ފާގަސަން ބުނެފައިވާ ގޮތުގައި މިއަދު ވެސް ޔުނައިޓެޑުން ކުޅެފައިވާ ބޮޑެތި މެޗުތަކުގެ ހަނދާންތައް އާވެއެވެ. ކޯޗުކޮށްނުދެވޭތީ އެކަމާ އުނދަގޫނުވާ ކަމަށާއި އެކަމުން މިހާރު ހިތްހަމަޖެހުން ހޯދަމުން އަންނަ ކަމަށް ފާގަސަން ބުންޏެވެ.

މެންޗެސްޓަރ ޔުނައިޓެޑަށް 303 މެޗު ކުޅެދީފައިވާ ކެރިކްގެ ކެރިއަރ ފަށާފައިވަނީ ވެސްޓް ހޭމް ޔުނައިޓެޑް އިންނެވެ. 1999-2004 ވަނަ އަހަރާއި ހަމައަށް އެޓީމުގައި ކެރިކް ހޭދަކުރި ދުވަސްތަކުގައި ލޯނު އެއްބަސް ވުމެއްގެ ދަށުން ސްވިންޑަން ޓައުންނާއި ބާމިންގްހަމް ސިޓީއަށްވެސް ކުޅެފައިވެއެވެ.

ވެސްޓް ހޭމް ޔުނައިޓެޑްގައި 2004 ވަނަ އަހަރާއި ހަމައަށް ހޭދަކުރުމަށްފަހު އެއަހަރު ކެރިކްވަނީ މެންޗަސްޓަރ ސިޓީއަށް ބަދަލުވެފައެވެ. ޔުނައިޓެޑަށް ކެރިކް ބަދަލުވީ 2006 ވަނަ އަހަރުއެވެ. ޔުނައިޓެޑާއިއެކު ފަސް ފަހަރު ޕްރެމިއަރ ލީގު ކްރިކް ކާމިޔާބުކޮށްފައިވެއެވެ.