އެލައިޑްގެ ޗެއަރމަން ކަމުގެ މަޤާމުން ހިޔަލީ އިސްތިއުފާ ދެއްވައިފި

އެލައިޑް އިންޝުއަރެންސް ގެ ޗެއާރމަންގެ މަޤާމުން މުހައްމަދު ރަޝީދު (ހިޔަލީ) އިސްތިއުފާ ދެއްވައިފި އެވެ.

އެލައިޑުން ބުރާސްފަތި ދުވަހުގެ ރޭ ކޮށްފައިވާ ޓްވީޓެއްގައި ހިޔަލީ އެކުންފުނީގެ ޗެއާމަން ކަމުން އިސްތިއުފާ ދެއްވިކަން އިއުލާން ކޮށްފައިވެއެވެ.

އަދި ފާއިތުވި ހަ އަހަރު ދުވަހު އޭނާ އެ ކުންފުންޏަށް ކޮށްދެއްވި އަގު ނުކުރެވޭ ހިދުމަތްތަކަށް ޝުކުރު އަދާކުރާ ކަމަށް ޓްވީޓްގައި ވެއެވެ.

އެސްޓީއޯގެ ސަބްސިޑަރީ ކުންފުނި އެލައިޑްގެ ޗެއާމަންގެ މަގާމަށް ހިޔަލީ އައްޔަން ކުރައްވާފައި ވަނީ ކުރީގެ ރައީސް އަބްދުﷲ ޔާމީންގެ ސަރުކާރުގައެވެ.

ރައްޔިތުންގެ މަޖިލީހުގެ އައްޑޫ އަތޮޅުގެ ގޮނޑި ހަތަރު ދައުރު ފުރުއްވައިފައިވާ ހިޔަލީ އަކީ ކުރީގެ ރައީސް އަބްދުﷲ ޔާމީންގެ ވަރަށް އަރިސް ބޭފުޅެކެވެ. އޭނާ އަކީ ޕީޕަލްސް އެލަޔަންސް ޕާޓީ އުފެއްދުމުގައި އިސްކޮށް ހަރަކާތްތެރިވި ބޭފުޅެކެވެ.

ނަމަވެސް ރައީސް ޔާމީންގެ ވެރިކަމުގެ ފަހު ކޮޅުގައި 2018 ވަނަ އަހަރު އޭނާ ވަނީ މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އާއި ގުޅިވަޑައިގެންފައެވެ.

ހިޔަލީ އަކީ ފުޓްބޯޅައިގެ ދައިރާގައި އަދި ޚާއްސަކޮށް ކްލަބް ވެލެންސިޔާ ހިންގެވުމުގައި އިސްކޮށް އުޅުއްވި ބޭފުޅެކެވެ.