ޝަރީއަތް ނިމެންދެން ބަންދުގައި ވަކި ގޮތެއް ނިމެންދެން ''ވާނުވާ'' ޖަހާފައި ތިބި މީހުންގެ ތެރޭގައި، މިހާރު ތިބޭނީ ކޮންމެހެން ތިބެން ޖެހޭ މީހުން ކަމަށް ޕްރޮސެކިއުޓަރ ޖެނެރަލް (ޕީޖީ) ހުސައިން ޝަމީމް ވިދާޅުވެއްޖެއެވެ.
ޝަމީމް ވިދާޅުވީ، ބަންޑާރަ ނައިބްގެ އޮފީހުން ހުސްވި އަހަރު ގެނައި އިސްލާހުގެ ދަށުން ބަންދުގައި ތިބި މީހުންގެ ތެރެއިން ގިނަ އަދަދެއްގެ މީހުން ދޫކޮށްލެވިފައިވާ ކަމަށެވެ.
ބަންޑާރަ ނައިބުގެ އޮފީހުން މީގެ ކުރިން ގެނައި އިސްލާހާއި އެކު، ކުށުގެ ތުހުމަތުގައި ހައްޔަރު ކޮށްފައިވާ މީހަކު ޝަރީއަތް ނިމެންދެން އޭނާ ބަންދުގައި ބަހައްޓަން ފަނޑިޔާރު ކޮށްފައިވާ އަމުރު، 30 ދުވަަހުން ޕްރޮސިކިއުޓަރ ޖެނެރަލް (ޕީޖީ) މުރާޖައާކުރަން ޖެހެއެވެ.
އެމީހުން ދޫކުރަނީ ޝަރުތުތަކާއި އެކުކަން ފާހަގަކުރައްވަމުން ޕީޖީ ވިދާޅުވީ، އެއްކޮށް ދޫކުރާ މީހުން ދޫކޮށްފައި ވާނީ އެމީހެއްގެ މައްޗަށް ކުށް ސާބިތުވެއްޖެއްޔާ އަންނަ އަދަބު ތަންފީޒުކޮށް ނިމޭ މީހުން ކަމަށެވެ. ޝަމީމް ވިދާޅުވީ، މިހާރު ބަންދުގައި ތިބެން ޖެހޭނީ ކޮންމެހެން ތިބެން ޖެހޭނެ މީހުން ކަމަށެވެ.
އޭގެ ތެރޭގައި މިތިބީ ރާއްޖެއަށް މަސްތުވާތަކެތި އެތެރެކުރާ މީހުންނާއި ނޫންނަމަ މަސްުތުވާތަކެތި ފުޅާދާއިރާއެއްގައި ކުރާ މީހުންނާއި ނޫނިއްޔާ މީހުން މެރުމުގައި ޝަމިލްވެފައިވާ މީހުން. އެކަހަލަ މީހުންތަކެއް މިހާރު ބަންދުގައި ތިބޭނީ. ބަންދުގައި މިހާރު އާއްމު ގޮތެއްގައި ނުހުންނާނެ ކުދި ކުދި މައްސަލަ ތަކުގެ މީހުންނެއް ކުރިން އެއޮތް ގޮތަކަށް ނުތިބޭނެ. އެކަމަކު 200 ހާ މީހުން އެބަތިބި އެއީ ކޮންމެހެން ބަންދުގައި ތިބެން ޖެހޭ ކަމަށް އަޅުގަނޑުމެންނަށް ގަބޫލުކުރެވޭ މީހުންހުސައިން ޝަމީމް - ޕްރޮސެކިއުޓަރ ޖެނެރަލް
ބަންދުގައި ތިބި މީހުންގެ މައްސަލަ އަވަހަށް ނިންމައި ދިނުމަށް ޕީޖީ އޮފީހުން ވަނީ ކޯޓުގައި އެދިފައެވެ. އެގޮތުން މިހާރު ބަންދުގައި ތިބި މީހުންގެ މައްސަލަތައް ވީހާވެސް އަވަހަށް ނިންމައިދިނުމަށް ޕީޖީ ވަނީ ހުށައަޅުއްވާފައެވެ. ބައެއް މީހުންނަކީ ދޫކޮށްލާފައި ތިބެން ޖެހޭވަރު މީހުން ނޫންކަން ފާހަގަކުރައްވަމުން ޝަމީމް ވިދާޅުވީ، މަސައްކަތް ކުރައްވަނީ ވާނުވާ ޖަހާފައި ބަންދުގައި ތިބި މީހުންގެ މައްސަލަ ވީހާވެސް އަވަހަށް ހައްލު ކުރުމަށް ކަމަށެވެ.
ޝަރީއަތް ނިމެންދެން ވާނުވަގައި ތިބޭ މީހުންގެ އަދަދު ގިނަވުމުން އިންސާފަށް ހުރަސް އެޅޭ ކަމަށް ބައެއް ފަރާތްތަކުން ވަނީ މީގެ ކުރިންވެސް އަޑު އުުފުލާފައެވެ. އެކަށީގެންވާ މުއްދަތެއްގެ ތެރޭގައި އިންސާފު ގާއިމްކޮށްދިނުމަކީ ކޯޓްތަކުގެ މައްޗަށް ގާނޫނު އަސާސީ ލާޒިމް ކުރާ ކަމެކެވެ.
