ބްރޯޑްކޮމް އަށް ކުރިމަތިލި 15 ފަރާތެއްގެ ނަން ކޮމިޓީއަށް
މިއީ މި މަގާމަށް ކުރިތަމަތިލުމަށް ފުރުސަތު ހުޅުވާލި ދެވަނަ ފަހަރު
މޯލްޑިވްސް ބްރޯޑްކާސްޓިންގް ކޮމިޝަން
މޯލްޑިވްސް ބްރޯޑްކާސްޓިންގް ކޮމިޝަނަށް މެމްބަރަކު އައްޔަނުކުރުމަށް އާއްމުކޮށް ހުޅުމާލުމުން ކުރިމަތިލީ ފަރާތްތަކުގެ ތެރެއިން ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު އަށް ފެނިވަޑައިގެންނެވި ނަންތައް ދިރާސާ ކުރުމަށް މަޖިލީހުގެ މިނިވަން މުއައްސަސާތަކާއި ބެހޭ ކޮމެޓީއަށް ފޮނުވައިފިއެވެ.
ބުދަ ދުވަހުގެ ޖަލްސާގައި އެ މައްސަލަ ރައްޔިތުންގެ މަޖިލީހުގެ މިނިވަން މުއައްސަސާ ކޮމިޓީއަށް ފޮނުވާފައިވަނީ 15 ނަމެއް ދިރާސާ ކުރުމަށެވެ.
މި މަޤާމަކީ، އެ ކޮމިޝަންގެ ނައިބު ރައީސްގެ މަޤާމުގައި ހުންނެވި ފާތިމަތު ޒައިނާ ވަކިކުރަން މަޖިލީހުން ފާސްކުރުމުން ހުސްވެފައިވާ މަޤާމެކެވެ.
ޒައިނާ ވަކިކުރުމަށް ފަހު ހުސްވެފައިވާ މަޤާމަށް، ފުރަތަމަ ފަހަރު ހުޅުވާލުމުން އެ ފުރުޞަތަށް އިޖާބަދެއްވާ ކުރިމަތިލެއްވި ބޭފުޅުންގެ ތެރެއިން ތިން ބޭފުޅެއްގެ ނަން ރައީސް އިބްރާހިމް މުހައްމަދު ސޯލިހު ވަނީ ރައްޔިތުންގެ މަޖިލީހަށް ފޮނުއްވާފައެވެ. ނަމަވެސް، މިއިން އެއްވެސް ބޭފުޅެއްގެ ނަން ކޮމިޓީން ފާސްވެފައެއް ނުވެއެވެ.
މަޖިލީހުގެ ޤަވައިދުގައިވާ ގޮތުން ނަމަ، ކޮމިޓީން އިންޓަވިއު ކުރާ ފަރާތްތަކުގެ ތެރެއިން ތަޅުމަށް ފޮނުވޭނޭ، ކޮމިޓީގެ ޖުމުލަ މެންބަރުންގެ 2/3 (ތިންބައިކުޅަ ދެބައި) އަޣުލަބިއްޔަތުން ފާސްވާ ފަރާތްތަކުގެ ނަން އެކަންޏެވެ. މި މަޤާމަށް ބޭފުޅަކު ހޮވުމާއިއެކު، ބްރޯޑްކާސްޓިންގ ކޮމިޝަނަށް ހުރިހާ މެންބަރުން ހަމަވާނެއެވެ. އެންމެ ފަހުން ރައްޔިތުންގެ މަޖިލީހުން ފާސްކުރި ނަންތަކާއިއެކު، މިހާރު އެ ކޮމިޝަނުގައި ތިއްބެވީ 6 މެންބަރުންނެވެ.
