ވިލިމާލޭ ގެއެެއްގައި އަލިފާން ރޯވެ އަނދައި ހުލިވެއްޖެ

ވިލިމާލޭ، ދަންމާނު ގޭގައި އަލިފާނުގެ ހާދިސާއެއް ހިނގައި ބޮޑެތި ގެއްލުންތަކެއްވެއްޖެ އެވެ.

ހުކުރު ދުވަހުގެ ރޭ ދަންވަރު 2:00 ހާއިރު، ހިނގި އަލިފާނުގެ ހާދިސާގައި އެއްވެސް މީހަކަށް ގެއްލުމެއް ލިބިފައެއް ނުވެ އެވެ. އެ ގެޔަކީ ގިނަ އަދަދެއްގެ މީހުން ދިރިއުޅޭ ގެޔެކެވެ.

އަލިފާންގަނޑު ހިފި ވަގުތު ބާރަށް އެއްޗިހި ގޮވި އަޑުވެސް އިވިގެންގޮސްފައިވެއެވެ.

އެމްއެންޑީއެފްގެ ފަޔަރ އެންޑް ރެސްކިއު ޓީމާއި، ފުލުހުންނާއި، އާންމުން ކުރި މަސައްކަތުން އަލިފާންގަނޑު ކޮންޓްރޯލްކުރެވިފައިވަނީ ހުކުރު ދުވަހުގެ ރޭ ދަންވަރު 3:00 ހާއިރުގަ އެވެ. އަލިފާންގަނޑު ކޮންޓްރޯލްވިއިރު، ތިން ފަންގިފިލާއަށް ހުންނަ ގޭގެ ދެވަނަ ފަންގިފިލާ އަދި ތިން ވަނަ ފަންގިފިލާ ބޭނުން ނުކުރެވޭވަރަށް އެއްކޮށް އަނދާހުލިވެފައިވެއެވެ.

އަލިފާނުގެ ހާދިސާ ހިނގަން މެދުވެރިވި ސަބަބު ސާފުނުވާއިރު، ފުލުހުންނާއި، އެމްއެންޑީއެފްއިން އަންނަނީ އަލިފާނުގެ ހާދިސާ ތަހުޤީޤްކުރަމުންނެވެ. އަދި ބޯހިޔާވެހިކަން ގެއްލުނު އާއިލާތަކަށް ބޯހިޔާވެހިކަން ފޯރުކޮށްދިނުމަށް ނޭޝަނަލް ޑިޒާސްޓަރ މެނޭޖްމެންޓް ސެންޓަރުގެ ޓީމްތައްވެސް އަންނަނީ ހަރަކާތްތެރިވަމުންނެވެ.