އައި ކޭމްޕްގެ ދަށުން 69 ގައިދީންނަށް އައިނު ލިބޭނެ އިންތިޒާމް ހަމަޖައްސައިފި
11 ފެބުރުއަރީ 2020 | އަންގާރަ 20:47ޖަލުގައި ލޮލުގެ ފަރުވާއަށް ގިނަ އަދަދެއްގެ ޤައިދީން އެދިފައިވޭ
މާފުށީ ޖަލު
މޯލްޑިވްސް ކަރެކްޝަނަލް ސަރވިސަސް އިން މާފުށީ ޖަލުގައި ކުރިއަށްގެންދިޔަ "އައި ކޭމްޕް" ގެ ދަށުން 69 ޤައިދީންނަށް އައިނު ލިބޭނެ އިންތިޒާމު ހަމަޖައްސައިފިއެވެ.
އައިކެއަރ އާއި ގުޅިގެން ކުރިއަށްގެންދިޔަ މި ކޭމްޕާ ގުޅޭގޮތުން ކަރެކްޝަންސް އިން ބުނީ، މިއީ ޤައިދީންނަށް ބޭނުންވާ ޞިއްޙީ ޚިދުމަތްތައް ކުރިއަށްވުރެ ހަރުދަނާގޮތުގައި ފޯރުކޮށްދިނުމަށް ކުރަމުންދާ މަސައްކަތުގެ ތެރެއިން ކުރިއަށްގެންދިޔަ ޕްރޮގުރާމެއް ކަމަށެވެ.
އެގޮތުން މި ކޭމްޕް މެދުވެރިކޮށް 88 ޤައިދީންނަށް ޚިދުމަތް ފޯރުކޮށްދީފައިވާއިރު، ލޮލުގެ ޚާއްޞަ ޑޮކްޓަރުން މެދުވެރިކޮށް ލޮލުގެ ފަރުވާއަށް އެދިފައިވާ ޤައިދީންގެ ޗެކަޕް ހަދައި، އެ ފަރާތްތަކަށް ބޭނުންވަނީ ކޮން ފަރުވާއެއްތޯ ދެނެގަނެވިފައިވާކަމަށް ކަރެކްޝަންސް އިން ބުނެއެވެ.
އޭގެ އިތުރުން، އައިނު އަޅަންޖެހޭ ޤައިދީންގެ ލޮލުގެ ނަންމަބަރު ޗެކްކޮށް އައިނު ލިބޭނެ އިންތިޒާމު ހަމަޖައްސައި، އިތުރު ފަރުވާއަށް މާލެ ގެންނަންޖެހޭ ޤައިދީންވެސް ދެނެގަނެވިފައިވާއިރު، ކުރިއަށް އޮތްތަނުގައި ޤައިދީން ޞިއްޙީ ފަރުވާ ހޯދުމަށް އެންމެ ގިނައިން އެދެމުންދާ ދާއިރާތަކުން އެފަދަ ކޭމްޕްތައް ރާވާ ކުރިއަށް ގެންދިއުމުގެ މަސައްކަތް ކުރާނެ ކަމަށް ކަރެކްޝަންސް އިން ބުނެއެވެ.
ޖަލުގައި ލޮލުގެ ފަރުވާއަށް ގިނަ ޢަދަދެއްގެ ޤައިދީން އެދިފައިވާކަން ކަރެކްޝަންސް އިން ވަނީ ފާހަގަކޮށްފައެވެ.
