ބޮޑާހާކާނީ ފަހުން، އެއްވާނެއްގައި ނިކުމެ މަސައްކަތް ކުރަންވީ އިންތިޚާބު ކާމިޔާބު ކުރަން: ރައީސް ނަޝީދު
ޕައިމަރީން ބަލިވި ވަރަށް ގިނަ ކެނޑިޑޭޓުންނާއި ވާހަކަފުޅު ދެއްކެވިކަމަށް ވިދާޅުވި
އެމްޑީޕީ ޤައުމީ މަޖިލީހުގެ 168 އަށް ވަނަ ބައްދަލުވުން
މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ ހުރިހާ މެންބަރުން އެއްވާނެއްގައި ނިކުމެ މަސައްކަތް ކުރަންވީ ކުރިއަށް އޮތް ލޯކަލް ކައުންސިލް އިންތިޚާބު ކާމިޔާބު ކުރުމަށް ކަމަށް އެމްޑީޕީގެ ރައީސް މުޙައްމަދު ނަޝީދު ވިދާޅުވެއްޖެ އެވެ.
އަންގާރަ ދުވަހުގެ ރޭ ދަރުބާރުގޭގައި ބޭއްވި އެމްޑީޕީ ޤައުމީ މަޖިލީހުގެ 168 އަށް ވަނަ ބައްދަލުވުމުގައި ވާހަކަފުޅު ދައްކަވަމުން ރައީސް ނަޝީދު ވިދާޅުވީ ކައުންސިލް އިންތިޚާބުގެ ޕްރައިމަރީ އާއި ގުޅިގެން އުފެދިފައިވާ ރުޅިވެރިކަން ނިމުމަކަށްގެނެސް ޕާޓީގެ ހުރިހާ މެންބަރުން އެކުގައި ނުކުމު އިންތިޚާބު ކާމިޔާބު ކުރުމަށް މަސައްކަތް ކުރުމަށް އެދިވަޑައިގަންނަވާ ކަމަށެވެ.
ރައީސް ނަޝީދު ވިދާޅުވީ ޕްރައިމަރީން ބަލިވި ވަރަށް ގިނަ ކެނޑިޑޭޓުންނާއި ދިމާވެފައިވާ ކަމަށާއި ޕްރައިމަރީން ބަލިވި ނަމަވެސް އެކެނޑިޑޭޓުން އެކަމުގެ ހިތްހަމަނުޖެހުން ފާޅުކޮށްފައި ނުވާ ކަމަށެވެ.
ޕްރައިމަރީން ބަލިވި ހުރިހާ ސިޓީތަކެއްގެ މޭޔަރުންވެސް ތިއްބެވީ ކޯޑިނޭޓަރުންގެ ގޮތުގައި މަސައްކަތް ކުރައްވަންކަން ފާހަކަ ކުރައްވާ ނަޝީދު ވިދާޅުވީ އެބޭފުޅުންވެސް މަސައްކަތް ކުރައްވާނީ ކައުންސިލް އިންތިޚާބުގައި އެމްޑީޕީއަށް ކާމިޔާބު ހޯދައިދެއްވުމަށް ކަމަށެވެ.
މީގެ އިތުރުން ވެސް ދައުލަތުގެ ވަޒީރުންނާއި ސަރުކާރު ހިއްސާވާ ކުންފުނިތަކުގެ ވެރިންނާއި އަދި ސްޓޭޓް މިނިސްޓަރުންނާއި، ނައިބުންނާއި ކޯޑިނޭޓަރުންނާއި، އޮފިސަރުންނާއި، ޕާޓީގެ ހުރިހާ މެންބަރުންނާއި، ގޮފިތަކުގެ ރައީސުންނާއި މީޑިއާގެ ހުރހާ ބޭފުޅުންނާއި، ގާތްތިމާގެ މީހުންނާއި ޢާއިލާގެ އެންމެން އެކުގައި ނުކުމެ މި އިންތިޚާބު ބޮޑުތަނުން ކާމިޔާބު ކުރައްވާނެ ކަމަށް ނަޝީދު ވިދާޅުވިއެވެ.
