ދިވެހިރާއްޖޭގައި މުދާ ގަންނަ ފަރާތްތަކާއި ޚިދުމަތް ލިބިގަންނަ ފަރާތްތަކުގެ ޙައްޤުތައް ކަނޑައަޅައި، އެ ޙައްޤުތައް ޙިމާޔަތްކުރުމަށް މުދާ ގަންނަ ފަރާތްތަކާއި ޚިދުމަތް ލިބިގަންނަ ފަރާތްތައް ޙިމާޔަތްކުރުމުގެ ބިލެއް މަޖިލީހަށް ހުށަހަޅާ އެބިލުގެ ބަހުޘް ފަށައިފި އެވެ.
މިބިލު ސަރުކާރުގެ ފަރާތުން މަޖިލީހަށް ހުށަހެޅުއްވީ ކުޅުދުއްފުށި ދެކުނު ދާއިރާގެ މެންބަރު ޖަމްޝީދު މުޙައްމަދެވެ. ޖަމްޝީދު މިބިލު ހުށަހަޅުއްވަމުން ވިދާޅުވީ މިބިލު ހުށަހެޅުމުގެ މަޤްޞަދަކީ ވިއްކާ މުދަލެއް ނުވަތަ ފޯރުކޮށްދޭ ޚިދުމަތެއްގައި ފުރިހަމަވާންޖެހޭނެ ޝަރުޠުތަކާއި މިންގަނޑުތައް ކަނޑައެޅުމާއި، އެފަދަ ޝަރުޠުތަކާއި ނުވަތަ މިންގަޑުތަކާ ޚިލާފަށް މުދާ ވިއްކާ ފަރާތްތަކާއި ޚިދުމަތް ފޯރުކޮށްދޭ ފަރާތްތަކުން ޢަމަލުކޮށްފައިވާނަމަ ފިޔަވަޅުއެޅުމުގެ އުޞޫލުތައް ބަޔާންކުރުން ކަމަށެވެ.
އަދި މުދާ ގަންނަ ފަރާތެއް ނުވަތަ ޚިދުމަތް ލިބިގަންނަ ފަރާތްތަކުގެ ޙައްޤުތައް ނިގުޅައިގެންފައިވާ ޙާލަތެއްގައި ނުވަތަ އެ ޙައްޤުތަކަށް އުނިކަމަށް ލިބޭ ޙާލަތެއްގައި އެ މައްސަލަތައް ބަލާނެ ފަރާތެއްގެ ގޮތުގައި އޮމްބަޑްސްމަންއެއް ޢައްޔަންކޮށް، އެ ފަރާތުގެ ބާރާއި މަސްއޫލިއްޔަތު ކަނޑައެޅުމާއި، މުދާ ގަންނަ ފަރާތްތަކާއި ނުވަތަ ޚިދުމަތް ލިބިގަންނަ ފަރާތްތަކަށް ގެއްލުން ލިބޭ ޙާލަތުގައި ބަދަލު ލިބިދިނުމާ ގުޅޭ އުޞޫލުތައް ބަޔާން ކުރުމަކީވެސް މިބިލު ހުށަހެޅުމުގެ މަޤްޞަދެއްކަމަށް ޖަމްޝީދު ވިދާޅުވި އެވެ.
މުދާ ގަންނަ ފަރާތުގެ ހިމާޔަތަށްޓަކައި މުދަލަކީ ބަލައިގަނެވޭނެ ފެންވަރުގެ މުދަލެއް ކަމުގައި ބަޔާންކޮށްފައިވުމާއި މިގޮތުން މުދަލުގެ ފެންވަރު ދެމެހެއްޓުމަށްޓަކައި ޝަރުތުތަކެއް ކަނޑައަޅާފައިވޭ. އޭގެތެރޭގައި މުދާ އާންމުކޮށް ބޭނުންކުރާނެ ކަންކަމާއި އެކަށީގެންވާ މުދަލެއް ކަމުގައިވުމާއި ފެންނަފެނުމަށް ބަލައިގަނެވޭނެ މުދަލެއް ކަމުގައިވުމާއި ކުދިކުދި އުނިކަންކަން ނެތް ބިލެއްކަމުގައި ވުމާއި އެމުދަލެއްގެ ބޭނުމަށް ރައްކާތެރި މުދަލެއް ކަމުގައިވުމާއި އެމުދަލެއްގެ ބާވަތް ބަލާއިރު ގިނަ ދުވަހަށް ބޭނުންކުރެވޭ މުދަލެއް ކަމުގައިވުމާއި އަދި އެމުދަލަކީ ވަކިކަމެއް ކުރުމަށް ޚާއްސަ މުދަލެއްނަމަ އެމުދަލަކީ އެކަމަކަށް އެކަށީގެންވާ މުދަލެއް ކަމުގައިވުން ހިމެނޭކުޅުދުއްފުށި ދެކުނު ދާއިރާގެ މެންބަރު ޖަމްޝީދު މުޙައްމަދު
މިބިލަށް ވާހަކަ ދައްކަވަމުން މަރަދޫ ދާއިރާގެ މެންބަރ އިބްރާހީމް ޝަރީފް ވިދާޅުވީ މިފަދަ ޤާނޫނެއް އޮތުމަކީ މުހިންމުކަމެއް ކަމަށެވެ. އަދި މިހާރުވެސް މުދާ ގަންނަ ފަރާތްތައް ޙިމާޔަތްކުރުމުގެ ޤަވާއިދެއް އެކުލަވާލެވި ޢަމަލުކުރަމުންދާކަން ފާހަގަ ކުރައްވާ ޝަރީފް ވިދާޅުވީ އެފަދަ ޤަވާއިދުތައް ހުރިކަމުގައި ވީނަމަވެސް އެންމެ އެދެވޭގޮތުގައި އެކަންކަން ތަންފީޒުވެގެން ނުދާކަަމަށެވެ.
އެއީ ސަރުކާރުގެ އިދާރާތަކުގެ ވަސީލަތްތައް ހުންނަގޮތުން އެފަދަ ކަންކަން ނުކުރެވެނީ. ފޭކް މުދާ ވިއްކުމާއި ކޮލިޓީ ދަށް މުދާ ވިއްކުމަކީ އާންމުކޮށް ރާއްޖޭގައި ހިނގަމުން އަންނަކަން ކަންކަން ހިތާމަޔާއެކު ފާހަގަކުރަން. އަދި އެކްސްޕެއަރވެފައި ހުންނަ މުދާވެސް ވިއްކާ. ވަކިން ޚާއްސަކޮށް ކާބޯތަކެތީގެ ކޮލެޓީ ކޮންޓްރޯލްކުރުމުގައި ދިވެހިރާއްޖޭގައި ވަރަށް ބޮޑެތި ގޮންޖެހުންތައް އެބަހުރި. އުންމީދުކުރަނީ މިބިލު ޤާނޫނަކަށް ވެގެންދިޔުމުން އިތުރު ހެޔޮ ބަދަލުތަކެއް ޚިދުމަތް ލިބިގަންނަ ފަރާތްތަކަށާއި މުދާ ގަންނަ ފަރާތްތަކަށް ލިބިގެންދާނެ ކަަމަށް.މަރަދޫ ދާއިރާގެ މެމްބަރ އިބްރާހީމް ޝަރީފް
މިބިލަށް ވާހަކަދައްކަވަމުން ހަނިމާދޫ ދާއިރާގެ މެންބަރ އަބްދުލްޣަފޫރު މޫސާ ވިދާޅުވީ މިފަދަ ބިލަކުން ފުޅާދާއިރާއެއްގައި ޤާނޫނުގެ ޙިމާޔަތްތެރިކަން ލިބިދޭންޖެހޭ ކަމަށެވެ. މިބިލުގައި ހަމައެކަނި ހިމަނަންޖެހޭނީ ފިހާރަތަކުން މުދާ ގަންނަ ފަރާތްތައް އެކަނި ކަަމަށް ދެކެވަޑައިނުގަންނަވާ ކަމަށް އަބްދުލްޣަފޫރު މޫސާ ވިދާޅުވި އެވެ.
ކަރަންޓުގެ ޚިދުމަތް ހޯދާ ފަރާތްތައް، ފެނުގެ ޚިދުމަތް ހޯދާ ފަރާތްތައް، ސިއްހީ ޚިދުމަތް ހޯދާ ފަރާތްތައް، ބޭންކުގެ ޚިދުމަތް ހޯދާ ފަރާތްތައް ފޯނު އަދި އިންޓަރނެޓްގެ ޚިދުމަތް ހޯދާ ފަރާތްތައް މިހުރިހާ ފަރާތްތަކުގެވެސް ހައްޤު ހިމާޔަތްކުރެވޭ ގޮތަށް މިޤާނޫނު ބައްޓަންވެގެން ދާންޖެހޭނީ. ހަމައެކަނި ފިހާރައިން މުދާ ގަންނަ ފަރާތެއް އެކަންޏެއް ނޫން މި ޤާނޫނުގައި ބަޔާންވެގެން ވާންޖެހޭނީކީ. މިހުރިހާ ކަމެއްގައި އެބޭފުޅުންނަށް އެޖެހޭ މައްސަލަތައް ހައްލުވާނެ ޤާނޫނަކަށް މި ޤާނޫނު ވާންއެބަޖެހޭ. ދިވެހިރާއްޖޭގައި ފޯނު ބިލުގެ މައްސަލަ ޖެހިގެން ފޯނުގެ ޚިދުމަތް ދޭ ފަރާތަށް ގޮސްގެން ހަމައެބިލް ދައްކަން ޖެހުން ނޫން އެހެން އެއްވެސްގޮތެއް ހޯދިފައެއް ނެތް. އެއީ މިފަދަ ޤާނޫނުތައް ނެތުމުގެ ސަބަބުން މިކަން އެބޭފުޅުން ނުކުރައްވަނީ.ހަނިމާދޫ ދާއިރާގެ މެމްބަރ އަބްދުލްޣަފޫރު މޫސާ
މިބިލަކީ ޖުމުލަ 13 ބާބެއްގެ މައްޗަށް އެކުލެވޭ ބިލެކެވެ.
