މުދާ ގަންނަ ފަރާތްތަކާއި ޚިދުމަތް ލިބިގަންނަ ފަރާތްތައް ޙިމާޔަތްކުރުމުގެ ބިލު ހުށަހަޅާ ބަހުސް ފަށައިފި

ދިވެހިރާއްޖޭގައި މުދާ ގަންނަ ފަރާތްތަކާއި ޚިދުމަތް ލިބިގަންނަ ފަރާތްތަކުގެ ޙައްޤުތައް ކަނޑައަޅައި، އެ ޙައްޤުތައް ޙިމާޔަތްކުރުމަށް މުދާ ގަންނަ ފަރާތްތަކާއި ޚިދުމަތް ލިބިގަންނަ ފަރާތްތައް ޙިމާޔަތްކުރުމުގެ ބިލެއް މަޖިލީހަށް ހުށަހަޅާ އެބިލުގެ ބަހުޘް ފަށައިފި އެވެ.

މިބިލު ސަރުކާރުގެ ފަރާތުން މަޖިލީހަށް ހުށަހެޅުއްވީ ކުޅުދުއްފުށި ދެކުނު ދާއިރާގެ މެންބަރު ޖަމްޝީދު މުޙައްމަދެވެ. ޖަމްޝީދު މިބިލު ހުށަހަޅުއްވަމުން ވިދާޅުވީ މިބިލު ހުށަހެޅުމުގެ މަޤްޞަދަކީ ވިއްކާ މުދަލެއް ނުވަތަ ފޯރުކޮށްދޭ ޚިދުމަތެއްގައި ފުރިހަމަވާންޖެހޭނެ ޝަރުޠުތަކާއި މިންގަނޑުތައް ކަނޑައެޅުމާއި، އެފަދަ ޝަރުޠުތަކާއި ނުވަތަ މިންގަޑުތަކާ ޚިލާފަށް މުދާ ވިއްކާ ފަރާތްތަކާއި ޚިދުމަތް ފޯރުކޮށްދޭ ފަރާތްތަކުން ޢަމަލުކޮށްފައިވާނަމަ ފިޔަވަޅުއެޅުމުގެ އުޞޫލުތައް ބަޔާންކުރުން ކަމަށެވެ.

އަދި މުދާ ގަންނަ ފަރާތެއް ނުވަތަ ޚިދުމަތް ލިބިގަންނަ ފަރާތްތަކުގެ ޙައްޤުތައް ނިގުޅައިގެންފައިވާ ޙާލަތެއްގައި ނުވަތަ އެ ޙައްޤުތަކަށް އުނިކަމަށް ލިބޭ ޙާލަތެއްގައި އެ މައްސަލަތައް ބަލާނެ ފަރާތެއްގެ ގޮތުގައި އޮމްބަޑްސްމަންއެއް ޢައްޔަންކޮށް، އެ ފަރާތުގެ ބާރާއި މަސްއޫލިއްޔަތު ކަނޑައެޅުމާއި، މުދާ ގަންނަ ފަރާތްތަކާއި ނުވަތަ ޚިދުމަތް ލިބިގަންނަ ފަރާތްތަކަށް ގެއްލުން ލިބޭ ޙާލަތުގައި ބަދަލު ލިބިދިނުމާ ގުޅޭ އުޞޫލުތައް ބަޔާން ކުރުމަކީވެސް މިބިލު ހުށަހެޅުމުގެ މަޤްޞަދެއްކަމަށް ޖަމްޝީދު ވިދާޅުވި އެވެ.

މިބިލަށް ވާހަކަ ދައްކަވަމުން މަރަދޫ ދާއިރާގެ މެންބަރ އިބްރާހީމް ޝަރީފް ވިދާޅުވީ މިފަދަ ޤާނޫނެއް އޮތުމަކީ މުހިންމުކަމެއް ކަމަށެވެ. އަދި މިހާރުވެސް މުދާ ގަންނަ ފަރާތްތައް ޙިމާޔަތްކުރުމުގެ ޤަވާއިދެއް އެކުލަވާލެވި ޢަމަލުކުރަމުންދާކަން ފާހަގަ ކުރައްވާ ޝަރީފް ވިދާޅުވީ އެފަދަ ޤަވާއިދުތައް ހުރިކަމުގައި ވީނަމަވެސް އެންމެ އެދެވޭގޮތުގައި އެކަންކަން ތަންފީޒުވެގެން ނުދާކަަމަށެވެ.

މިބިލަށް ވާހަކަދައްކަވަމުން ހަނިމާދޫ ދާއިރާގެ މެންބަރ އަބްދުލްޣަފޫރު މޫސާ ވިދާޅުވީ މިފަދަ ބިލަކުން ފުޅާދާއިރާއެއްގައި ޤާނޫނުގެ ޙިމާޔަތްތެރިކަން ލިބިދޭންޖެހޭ ކަމަށެވެ. މިބިލުގައި ހަމައެކަނި ހިމަނަންޖެހޭނީ ފިހާރަތަކުން މުދާ ގަންނަ ފަރާތްތައް އެކަނި ކަަމަށް ދެކެވަޑައިނުގަންނަވާ ކަމަށް އަބްދުލްޣަފޫރު މޫސާ ވިދާޅުވި އެވެ.

މިބިލަކީ ޖުމުލަ 13 ބާބެއްގެ މައްޗަށް އެކުލެވޭ ބިލެކެވެ.