ހޯރަފުށީ ދާއިރާގެ 3 ރަށުގައި ކޮރޯނާ ވައިރަސްއަށް ހޭލުންތެރިކުރުމުގެ ޕްރޮގުރާމެއް ހިންގައިފި

ދުނިޔޭގައި ހަލުވިކަމާއެކު ފެތުރެމުން އަންނަ ނޮވެލް ކޮރޯނާވައިރަސްއާއި ބެހޭ މަޢުލޫމާތު ދިނުމަށް ހޯރަފުށި ދާއިރާގެ 3 ރަށުގައި ހޭލުންތެރިކަން އިތުރުކުރުމުގެ ޕްރޮގުރާމް ހިންގައިފިއެވެ.

ރާއްޖެއެމްވީއަށް މަޢުލޫމާތު ދެމުން، ހޯރަފުށި ޔޫތު ޑިވެލޮޕްމެންޓް އެސޯސިއޭޝަންގެ ވައިސް ޗެއަރޕަރސަން ހުސައިން ނާޝިޒް ވިދާޅުވީ، ބައްދަލުވުން ކުރިޔަށް ގެންދިޔަ މައިގަނޑު މަޤުޞަދަކީ ދާއިރާގެ ރައްޔިތުންނަށް ދުނިޔޭގައި ހަލުވިކަމާއެކު ފެތުރެމުން އަންނަ ކޮރޯނާވައިރަސް އާއި ބެހޭ މުހިންމު މަޢުލޫމާތުތައް ހިއްސާކޮށް ރައްޔިތުން ބައްޔާއި ބެހޭގޮތުން އަހުލުވެރިކުރުވުމަށްކަމަށެވެ.

އެގޮތުން ހޯރަފުށީ ޒުވާނުން އިސްނައިގެން ދާއިރާގެ މެންބަރު އަޙްމަދު ސަލީމުގެ އެއްބާރުލުމާއެކު ކުރިޔަށް ގެންދިޔަ ޕްރޮގުރާމްތަކަށް ރައްޔިތުންގެ ހޫނު ތަރުހީބެއް ލިބިފައިވާކަމަށް ނާޝިޒް ވަނީ ފާހަގަކުރައްވާފައެވެ. ހުކުރު ދުވަހު ތުރާކުނާއި އުލިގަމުގައި މަޢުލޫމާތު ދިނުމަށް ބައްދަލުވުންތައް ބާއްވާފައިވާއިރު ހޯރަފުށީގައި މަޢުލޫމާތު ދިނުމުގެ ބައްދަލުވުން ކުރިޔަށް ގެންގޮސްފައިވަނީ ހޮނިހިރު ދުވަހުގައެވެ. ތިން ރަށަށްވެސް ބައްޔާއި ބެހޭ ގޮތުން މަޢުލޫމާތު ދެއްވުމަށް ވަޑައިގެންފައިވަނީ، ޑރ. އުސާމާ އުމަރުއެވެ. ނާޝިޒު ވަނީ، ކާމިޔާބު ކަމާއެކު މި ސެޝަންތައް ކުރިޔަށް ގެންދިޔުމުގައި 3 ރަށުގެ ކައުންސިލް، ސްކޫލްތައް އަދި ހެލްތު ސެންޓަރުން އެއްބާރުލުން ލިބުނު ކަން ފާހަގަކުރައްވާފައެވެ،

ހޯރަފުށީ ޔޫތު ޑެވެލޮޕްމެންޓް ސޮސައިޓީ (ހައިޑްސް) ރަޖިސްޓްރީ ކުރެވިފައިވަނީ 24 ފެބްރުއަރީ 2013 ވަނަ އަހަރުއެވެ. ސޮސައިޓީ އުފެއްދި މައިގަނޑު މަޤްސަދުތަކުގެ ތެރޭގައި ޒުވާނުންގެ ކުރިމަގު އުޖާލާ ކުރުމަށް މަސައްކަތް ކުރުމާއި އިޖްތިމާޢީ ގޮތުން ރަށަށް ބޭނުންވާ އެކިއެކި ކަންކަމުގައި ޒުވާނުންގެ ބައިވެރިވުން މިހާރަށްވުރެ ފުޅާކުރުން ހިމެނެއެވެ. އަދި ހޯރަފުށީގެ ކުދިބޮޑު އެންމެހާ ރައްޔިތުންނަށް އަދި ވަކިން ޚާއްޞަކޮށް ޒުވާނުންނަށް އެކިއެކި ރޮނގުތަކުން ޚިދުމަތް ދެމުން އަންނަ ޖަމްޢިއްޔާއެކެވެ.

މިޖަމްޢިއްޔާގެ މައިގަނޑު މަޤުޞަދުތަކުގެ ތެރޭގައި، ވަޒީފާ އަދާކުރަމުންދާ އެންމެހާ ފަރާތްތަކުގެ ޙައްޤުތައް ހިމާޔަތްކޮށް، ވަޒީފާގައި ދެމިތިބި ފަރާތްތަކަށް ވަޒީފާއަށް ބޭނުންތެރި ތަމްރީނާއި ހުނަރު ފޯރުކޮށްދީ، ވަޒީފާތަކަށް އަލަން ނިކުންނަ ފަރާތްތަކަށް ވަޒީފާގެ ބާޒާރުގައި ހުރި ފުރުޞަތުތައް އަންގައިދީ އެފަރާތްތަކުގެ ކެރިއަރ ތަރައްޤީކޮށް ކުރިއެރުވުމުގައި އެހީތެރިވުން ހިމެނެއެވެ. މީގެއިތުރުން ހައިޑްސް ޖަމްޢިއްޔާއަކީ ހޯރަފުށި އަދި ކައިރި ރަށްތަކުގެ ކުދިބޮޑު އެންމެން ޝާމިލުވާނެގޮތައް، ޘަޤާފީ އަދި އެހެނިހެން ކުޅިވަރުތައް ރާވާ، އިންތިޒާމުކޮށް ހިންގަމުން އަންނަ ޖަމްޢިއްޔާއެކެވެ.