އިންގްލެންޑުގެ ހޫނު މޫސުމުގެ ޓްރާންސްފަރ ކުރިން އޮތް ގޮތަށް ބަދަލުކުރަން އިނގިރޭސި ޕްރިމިއަރ ލީގުގެ ހުރިހާ ކްލަބަކުން ވޯޓު ދީފިއެވެ.
ސީޒަން ފެށުމުގެ ކުރިން އޮންނަ ހޫނު މޫސުމުގެ ޓްރާންސްފަރ އަށް އިންގްލެންޑުން ކުރިން ގެނެސްފައި އޮތް ބަދަލާއެކު، ޔޫރަޕުގެ އެހެން ގިނަ ގައުމުތަކަށްވުރެ ކުރިން ޓްރާންސްފަރ ބާޒާރު ބަންދުވެއެވެ. އާންމު ގޮތެއްގައި އޯގަސްޓް މަހު ސީޒަން ފަށާއިރު، އިންގްލެންޑުގެ ޓްރާންސްފަރ ބާޒާރު ސީޒަން ފަށާ ދުވަހުގެ ކުރިން ބަންދުވެއެވެ. އެކަމަކު ޔޫރަޕުގެ ގިނަ ގައުމުތަކުގައި ޓްރާންސްފަރ ބަންދުވަނީ ސެޕްޓެންބަރު މަހުގެ އެއްވަނަ ދުވަހު އެވެ.
އެކަމާ ގުޅިގެން މީގެ ކުރިންވެސް ޕްރިމިއަރ ލީގުގެ ބައެއް ކްލަބުތަކުން ކަންބޮޑުވުން ވަނީ ފާޅުކޮށްފައެވެ. ސަބަބަކީ ޕްރިމިއަރ ލީގުގެ ކްލަބުތަކުގެ ކުޅުންތެރިން ޔޫރަޕުގެ އެހެން ކްލަބުތަކަށް ދޫކޮށްލައި، ބަދަލުގައި އެހެން ކުޅުންތެރިޔަކު ގެނެވޭނެ ގޮތެއް ނެތުމުންނެވެ.
ދާދި ފަހުން ޕްރިމިއަރ ލީގުގެ ކްލަބުތަކާއެކު އިނގިރޭސި އެފްއޭއިން ބޭއްވި ބައްދަލުވުމުގައި ކުރިން އޮތް ގޮތަށް ޔޫރަޕުގެ އެހެން ގައުމުތަކާ އެއް މުއްދަތަކަށް އިންގްލެންޑުގައި ވެސް ޓްރާންސްފަރ ބާޒާރު ކުރިއަށް ގެންދަން ހުރިހާ ކްލަބަކުން ވަނީ ވޯޓު ދީފައެވެ.
މިއާއެކު ޕްރިމިއަރ ލީގުގެ ގިނަ ކްލަބުތަކުން ވަނީ މި ނިންމުމަށް މަރުހަބާ ކިޔާފައެވެ. ފަހަކަށް އައިސް ޓްރާންސްފަރ ބާޒާރުގައި އެންމެ ބޮޑު ހޭދައެއް ކުރަނީ ޕްރިމިއަރ ލީގުގެ ކްލަބުތަކުންނެވެ.
