އިސްތިއުފާ ދިނީ އިހުމާލުއޮވެގެން ނޫން، ސިޔާސީ ކަންކަމުން އަދިވެސް ފެންނާނެ: ޝިދާތާ
6 ފެބުރުއަރީ 2020 | ބުރާސްފަތި 14:29މީގެކުރިން އަޅާލެވިފައިނުވާ މިންވަރަށް އަޅާލެވި ދެމެހެއްޓެނިވި ހައްލުތައް ހޯދުމުގެ މަސައްކަތް ފެށިފައިވޭ
ކުރީގެ ޖެންޑަރ މިނިސްޓަރު ޝިދާތާ ޝަރީފް
ޖެންޑަރ މިނިސްޓަރުކަމުން އިސްތިޢުފާ ދެއްވީ އިހުމާލު އޮވެގެން ނޫން ކަމަށާއި، މަޤާމުގައި ހުންނެވި އިރު، މިނިސްޓްރީން ބޮޑެތި ކާމިޔާބީތަކެއް ހޯއްދަވާފައިވާނެކަމަށް ޖެންޑަރ މިނިސްޓަރުކަމުން ބުރާސްފަތި ދުވަހު އިސްތިޢުފާ ދެއްވި ޝިދާތާ ޝަރީފް ވިދާޅުވެއްޖެއެވެ.
ޝިދާތާ ނެރުއްވި ނޫސްބަޔާނެއްގައި ބުނެފައިވަނީ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙުގެ ވަޒީރުންގެ މަޖިލީހުގެ މެންބަރުކަމުގެ ހުވާ ކުރިދުވަހުން ފެށިގެން މިއަދާ ހަމަޔަށް އޭނާ މަސައްކަތް ކޮށްފައިވާނީ ލިބިފައިވާ އިލްމާއި ލަޔާޤަތާއި ޤާބިލިއްޔަތު ތަންދިން އެންމެ މަތީ ދަރަޖާގައި، ރައީސުލްޖުމްހޫރިއްޔާ އާއި ކެބިނެޓުން އަރުވަމުންދިޔަ މަޝްވަރާއާއެކު ހަރުދަނާ ގޮތެއްގައި ވުޒާރާ ހިންގުމަށް ކަމަށެވެ.
އަދި ބޮޑެތި ގޮންޖެހުންތަކާއެކުވެސް ވޭތުވެދިޔަ އަހަރެއްހާ ދުވަހުގެ މުއްދަތުގައި ކުޑަކުދިންނާއި، އަންހެނުންނާއި، ޙާއްޞައެހީއަށް ބޭނުންވާ މީހުންގެ ޙާލަތު ރަގަޅު ކުރުމަށާއި ރާއްޖޭގެ އިޖުތިމާޢީ ރައްކާތެރިކަމުގެ ނިޒާމު ހަރުދަނާކުރުމަށް ސަރުކާރުން ގެންގުޅޭ ސިޔާސަތު ތަންފީޒުކުރުމުގައި ގިނަ ކާމިޔާބީތައް ހޯދިފައިވާކަމަށް ޝިދާތާ ވިދާޅުވިއެވެ.
ޝިދާތާ ވިދާޅުވީ ރާއްޖޭގެ ސިޔާސީ މަޞްރަޙުގައި އުފެދެމުންއަންނަ ނުތަނަވަސްކަމާއި، 17 ނޮވެންބަރު 2018 ވަނަ ދުވަހުގެ ކުރިން ވޭތުވެދިޔަ 10 ވަރަކަށް އަހަރު ރާއްޖޭގެ ސިޔާސީ މަޞްރަޙު އިންތިހާޔަށް ހަލަބޮލިވެ އިޖުތިމާޢީ ދާއިރާގައި ހުރި މައްސަލަތަކުގެ ވާހަކަ ދައްކާނެ ފުރުޞަތު ނުލިބި އޮތްއޮތުން ނިމުމަކަށްއައިސް، ކުރިން ހިނގަމުންއައި އެހެންނަމަވެސް އެއިރު ސަރުކާރާއި އަދި ރައްޔިތުންގެވެސް ސަމާލުކަން ނުލިބި ހުރި މައްސަލަތައް އިންތިހާއަށް އިތުރުވެ، ރައްޔިތުން ސަރުކާރާއި މިނިސްޓްރީގެ މައްޗަށް ކުރާ އިތުބާރު ކުޑަވެދާނެތީ މިވަގުތު އެންމެ މަޞްލަޙަތު ހުރިގޮތަކީ މަޤާމުން އިސްތިޢުފާ ދިނުންކަމުގައި ޤަބޫލުކުރެވޭތީ މިނިސްޓަރ އޮފް ޖެންޑަރ، ފެމިލީ އެންޑް ސޯޝަލް ސަރވިސްގެ މަޤާމުން އިސްތިޢުފާ ދީފައިވާ ކަމަށެވެ.
ނަމަވެސް އެނިންމުން މިނިންމީ، މިދުވަސްވަރު ފެންމަތިވެފައިވާ އަދި ފެންމަތިވަމުން އަންނަ މައްސަލަތަކުގައި ޝިދާތާއާއި، އޭނާއާއެކު މަސައްކަތް ކުރެއްވި ޓީމުގެ އިހުމާލެއް ނުވާނެކަން، އެފަދަ އިހުމާލެއް ނެތްކަން އެކިއެކި ތަޙުޤީޤުތަކާއި ދައުލަތުގެ މިނިވަން މުއައްސަސާތަކުގެ ހޯދުންތަކުން ކުރިއަށް އޮތްތަނުގައިވެސް ހާމަވެގެންދާނެކަމުގެ ފުރިހަމަ ޔަޤީންކަން އޮތުމާވެސް އެކުގައި ކަމަށް ޝިދާތާ ވިދާޅުވިއެވެ.
ޝިދާތާ ވިދާޅުވީ ވޭތުވެދިޔަ މުއްދަތުގައި ސަރުކާރާއި މިނިވަން މުއައްސަސާތަކާއި މަދަނީ ޖަމްޢިއްޔާތަކާއި ބައިނަލްއަޤުވާމީ ފަރާތްތަކާއި އަދި އަމިއްލަ ވަކިވަކި ފަރުދުންގެ ފަރާތުން ލިބުނު އެއީތެރިކަމާއި އެއްބާރުލުން ފާހަގަކޮށް ޝުކުރު ދަންނަވާ ކަމަށެވެ. އަދި ވަކިން ޚާއްޞަކޮށް މިނިސްޓްރީގައި މަސައްކަތްކުރެއްވި މުވައްޒަފުން ކޮށްފައިވާ އަދި މިހާރުވެސް ކުރަމުންދާ ބުރަމަސައްކަތް ފާހަގަކޮށް ޝުކުރުއަދާ ކުރައްވާފައިވެއެވެ.
ޝިދާތާ ވަނީ މަޤާމުން އިސްތިޢުފާ ދިންކަމުގައި ވިޔަސް ވޭތުވެދިޔަ ދުވަސްތަކެކޭ އެއްގޮތަށް ސިޔާސީ ދާއިރާގައި ދިވެހި ޤައުމާއި ރައްޔިތުންނަށް ޚިދުމަތްކުރުމުގައި ދެމިހުންނާނެކަމުގެ ޔަޤީންކަން ދެއްވާފައެވެ. އަދި އަދާލަތު ޕާޓީ އިތުރު ހަރުފަތަކަށް ގެންދިއުމަށްޓަކައި ޕާޓީގެ ޢާންމު މެންބަރުންނާއެކު ދެމިހުންނާނެ ކަމަށާއި، އަދާލަތު ޕާޓީގެ ސްޓޭންޑާއެއްގޮތަށް ސަރުކާރު ހިންގާ ކޯލިޝަނާއި ރައީސުލްޖުމްހޫރިއްޔާއަށް ފުރިހަމަ ތާއީދު އޮތްކަން ޝިދާތާ ވަނީ އޭނާ ނެރުއްވި ބަޔާނުގައި ފާހަގަކުރައްވާފައެވެ.
