ކެެރެލާ އަށް ދަތުރު ނުކުރުމަށް އިލްތިމާސްކޮށްފި
5 ފެބުރުއަރީ 2020 | ބުދަ 02:10ކުރަން ޖެހިއްޖެ ހާލަތެއްގައި ނޫނި ދަތުރު ނުކުރުމަށް ވަނީ އިލްތިމާސް ކޮށްފައި
ކެރެލާގެ ޑޮކްޓަރުންގެ ޓީމެއް
ދިވެހިން ކެރަލާއަށް ދަތުރުނުކުރުމަށް ފޮރިން މިނިސްޓްރީން އިލްތިމާސްކޮށްފިއެވެ.
ފޮރިން މިނިސްޓްރީން ނެރެފައިވާ ނޫސްބަޔާނެއްގައި ބުނީ، އިންޑިއާގެ ކެރަލާ ސްޓޭޓުގައި ނޮވެލް ކޮރޯނާ ވައިރަހަށް ތިން މީހަކު ޕޮޒިޓިވްވުމާއެކު، އެ ސްޓޭޓުން "ސްޓޭޓް އޮފް ކެލެމިޓީ" އިޢުލާން ކޮށްފައިވާ ކަމަށެވެ. އެހެންވުމާއި އެކު "ސްޓޭޓް އޮފް ކެލެމިޓީ" ދެމިއޮތްހާ ހިނދަކު، ކޮންމެހެން ކުރަން ޖެހިއްޖެ ޙާލަތެއްގައި މެނުވީ، ދިވެހިން ކެރަލާއަށް ދަތުރުނުކުރުމަށް ފޮރިން މިނިސްޓްރީން ވަނީ އިލްތިމާސްކޮށްފައެވެ.
އެ މިނިސްޓްރީން ވަނީ، މި ވަގުތު އިންޑިއާގެ އެކި ސްޓޭޓުތަކުގައާއި، ވަކިން ޚާއްޞަކޮށް ކެރަލާ ސްޓޭޓުގައި ދިރިއުޅޭ އަދި އެ ޤައުމަށް ޒިޔާރަތްކުރާ ދިވެހީން މިނިސްޓްރީ ނުވަތަ އިންޑިއާގައި ހުންނަ ދިވެހިރާއްޖޭގެ ހައިކޮމިޝަން ނުވަތަ ތިރުވަނަންތަޕޫރަމުގައި ހުންނަ ދިވެހިރާއްޖޭގެ ކޮންސިއުލޭޓް ޖެނެރަލްގައި ރަޖިސްޓްރީވުމަށްވެސް އިލްތިމާސްކޮށްފައެވެ.
މީގެ އިތުރުން އިންޑިއާގެ ކަމާބެހޭ އިދާރާތަކުން މި ބައްޔާ ގުޅޭގޮތުން ދޭ އިރުޝާދުތަކަށް ސަމާލުކަން ދިނުމަށާއި ޢަމަލުކުރުމަށްވެސް ފޮރިން މިނިސްޓްރީން އެދެއެެވެ.
ކެރެލާ ސްޓްޓުގައި "ސްޓޭޓް އޮފް ކެލެމިޓީ" ގޮތުގައި ކަނޑައެޅީ އެސްޓޭޓުން ތިން މީހަކު ނޮވެލް ކޮރޯނާވައިރަސް އަށް ޕޮޒިޓިވްވުމާއި ގުޅިގެންނެވެ. އެ ބަލިމަޑުކަމަކީ "ކުއްލި ކާރިޘާއެއް"ގެ ގޮތުގައި ކަނޑައެޅީ މިބަލިމަޑުކަން ކޮންޓްރޯލް ކުރުމަށް އެކަށީގެންވާ ހަރުދަނާ ފިޔަވަޅު އެޅުމުގެ ގޮތުންނެވެ.
