ރަށް ގިރުމަކި އާ ކަމެއް ނޫންކަމަށާއި އެއީ ގުދުރަތީކަމެއްކަމަށް އެންވަޔަރަމެންޓް މިނިސްޓްރީގެ ސްޓޭޓް މިނިސްޓަރ ޑރ އަބްދުﷲ ނަސީރު ވިދާޅުވެއްޖެއެވެ.

ރާއްޖެޓީވީގެ ފަލަސުރުހީ ޕްރޮގުރާމްގައި ވާހަކަދައްކަވަމުން ސްޓޭޓް މިނިސްޓަރ ވިދާޅުވީ ރަށްތައް އުފެދުނީއްސުރެން ރަށް ގިރުމަކީ ގުދުރަތީ ނިޒާމްގެ ތެރެއިން ހިނގަމުންދާ ކަމެއްކަމަށާއި ރަށްތައް އުފެދިފައި ހުންނަނީވެސް ރަށްރަށް ގިރާ ވޮޑެމުން ދާތީކަމަށެވެ. ސްޓޭޓް މިނިސްޓަރ ވިދާޅުވީ މި އަހަރުތެރޭގައި ރަށް ގިރުމުގެ މައްސަލަ ބޮޑަށް ފާހަގަކުރެވިފައިވާކަމަށެވެ.

ރަށް ގިރުމަށް ދިމާވަ ގުދުރަތީ ނިޒާމުގައި ހިމެނޭ ކަންތައްތައް ހާމަކުރައްވަމުން ސްޓޭޓް މިނިސްޓަރ ވިދާޅުވީ، ރަށްތައް ގިރަމުންދަނީ ވައިޖެހޭ ބާރުމިނުގެ ސަބަބުން އުފެދޭ ރާޅާއި އިންޑިއާ ކަނޑުގެ އެކި ސަރަހައްދުތަކުގައި އުފެދޭ ތޫފާނުގެ ސަބަބުން އުފެދޭ ރާޅުގެ ސަބަބުންކަމަށެވެ. މިނިސްޓަރ ވިދާޅުވީ ދެ ކަމަކީވެސް ވަރަށް ތަފާތު ދެކަމެއް ކަމަށެވެ. ސްޓޭޓް މިނިސްޓަރ ވިދާޅުވީ މިފަހަރު އިރުވައިގެ ހަޅަޖެހުން އެހެންފަހަރުތަކާއި އަޅައިބަލާއިރު ދިގު ދެމިގެން ގޮސްފައިވާކަން ފާހަގަކުރެވިފައިވާކަމަށާއި ނަމަވެސް މެޓް އޮފީހުން ލަފާދީފައިވާ ގޮތުގައި ވައިޖެހުމުގެ ބާރުމިނަށްވެސް ބަދަލެއް ނާންނަކަމަށެވެ.

ސްޓޭޓް މިނިސްޓަރ ވިދާޅުވީ ބޮޑަށް ލަފާކުރެވޭ ގޮތުގައި ރަށްގިރުމުގެ މައްސަލަ މާބޮޑަށް ދިމާވެގެން އުޅެނީ ރާއްޖޭ ވަށައި އޮންނަ ކަނޑުގެ ސަރަހައްދުގެ ތޫފާންތައް ގިނަވަމުގެ ސަބަބުނާއި އިންޑިއާ ކަނޑުގެ މޫސުމަށް އައި ބަދަލަކުންކަމަށެވެ. މޫސުމަށް އަންނަ ބަދަލުތައް ފާހަގަކުރެވުމުންދަކަމަށެވެ. އަދި އެކަމުގެ ސަބަބުން ރާއްޖޭގެ ގިނަ ރަށްތައް އާދަޔާ ހިލާފަށް ގިރާކަން ފާހަގަވެފައިވާކަން ހާމަކޮށް ސްޓޭޓް މިނިސްޓަރ ވިދާޅުވީ އެކަމަށް ހާއްސަ ސަމާލުކަމެއް ދީގެން ބަލަމުންއަންނަ ކަމަށެވެ.

އާދަޔާ ޚިލާފަށް ރަށްތައް ގިރަމުންދަނީ އިންޑިއާ ކަނޑުގައި އުފެދޭ ޚާއްސަ ހާލަތަކާއި ގުޅިގެން ކަމަށް އެންވަރަމެންޓް މިނިސްޓަރ ޑރ. ހުސައިން ރަޝީދު ހަސަންވެސް ވަނީ މީގެކުރިން ވިދާޅުވެފައެވެ. އަދި އާދަޔާ ޚިލާފަށް ރާއްޖޭގެ ރަށްތައް ގިރެމުންދާތީ އާދީއްތަ ދުވަހު ކަމާބެހޭ އިދާރާތައް ހާޒިރުކޮށް، ރައްޔިތުންގެ މަޖިލީހުގެ އެންވަޔަރަމެންޓް އެންޑް ކްލައިމެޓް ޗޭންޖް ކޮމިޓީ ބައްދަލުވުމެއްވެސް ވަނީ ބާއްވާފައިވެއެވެ.