ކޮމަންވެލްތް ޕާލިމަންޓްރީ އެސޯސިއޭޝަންގައި ބައިވެރިވުމަށް މަޖިލީހުން ރުހުންދީފި

ކޮމަންވެލްތް ޕާލިމަންޓްރީ އެސޯސިއޭޝަން (ސީޕީއޭ) ގައި ރައްޔިތުންގެ މަޖިލީހުން ބައިވެރިވާން ފެންނަ ކަމަށް ރައްޔިތުންގެ މަޖިލީހުން ފާސްކޮށްފި އެވެ.

މި ގަރާރު ފާސްކޮށްފައިވަނީ، ވޯޓުގައި ބައިވެރިވި މެމްބަރުންގެ އިއްތިފާގުންނެވެ. އެގޮތުން ޖުމްލަ 67 މެމްބަރަކު ވަނީ މި ވޯޓުގައި ބައިވެރިވެވަޑައިގެންފަ އެވެ. މި ގަރާރު މަޖިލީހަށް ހުށައެޅުއްވީ މެދު ހެންވޭރު ދާއިރާގެ މެމްބަރު މެމްބަރު އަލީ އާޒިމް އެވެ. އަދި ގަރާރަށް ތާއީދުކުރެއްވީ ފޭދޫ ދާއިރާގެ މެމްބަރު މުހައްމަދު ނިހާދު އެވެ.

މި ގަރާރު ހުށައަޅާފައިވަނީ 19 ވަނަ ރައްޔިތުންގެ މަޖިލީހުގެ ގަވައިދުގެ 241 އެއް ވަނަ މާއްދާގެ ދަށުންނެވެ. އެ މާއްދާގައި ބަޔާންކުރަނީ، ރައްޔިތުންގެ މަޖިލީހުން ބައިނަލްއަޤްވާމީ ޖަމްޢިއްޔާތަކާއި ޤާނޫނުހަދާ މަޖިލިސްތަކާއި އެ މަޖިލިސްތަކުގައި ޤާއިމުކުރެވިފައިވާ ފްރެންޑްޝިޕް ގްރޫޕްތަކާ ގުޅުން ޤާއިމުކޮށް ދަމަހައްޓަންވާނެ ކަމަށެވެ.

ހަތަރު އަހަރުގެ މެދުކެނޑުމަކަށްފަހު، ކޮމަންވެލްތްގެ މެމްބަރެއްގެ ގޮތުގައި ދިވެހިރާއްޖެ ކަނޑައެޅުމަށް އެ ޖަމިއްޔާއިން ރުހުން ދީފައިވަނީ، މި އަހަރުގެ ފެބްރުއަރީ މަހުގެ އެކެއްގައެވެ. ކޮމަންވެލްތާ އަލުން ގުޅުމަކީ ރައީސް އިބްރާހިމް މުހައްމަދު ސޯލިހުގެ ރިޔާސީ ވައުދުފުޅެކެވެ.

ރާއްޖޭގެ ދާހިލީ ކަންކަމުގެ ތެރެއަށް ކޮމަންވެލްތުން ވަންނަ ކަމަށް ތުހުމަތުކޮށް، އެ ޖަމިއްޔާއިން ވަކިވާން ނިންމީ ކުރީގެ ރައީސް އަބްދުﷲ ޔާމީންގެ ސަރުކާރުންނެވެ. އެ ޖަމިއްޔާއިން ރާއްޖެ ވަކިވީ، 34 އަހަރު ވަންދެން ކޮމަންވެލްތުގެ މެމްބަރު ގައުމެއްގެ ގޮތުގައި އޮތުމަށް ފަހުގައެވެ.