ލޯކަލް ކައުންސިލް އިންތިހާބުގެ ޕްރައިމަރީ ބާއްވަން އެމްޑީޕީއަށް އިލެކްޝަންސް ކޮމިޝަން (އީސީ) ގެ ވޯޓު ފޮށިތައް ލިބުނު ފަދައިން، އިދިކޮޅު ޕީޕީއެމްއަށްވެސް ލިބޭނެކަމަށް، އެ ކޮމިޝަންގެ ނައިބު ރައީސް އަހްމަދު އަކްރަމް ވިދާޅުވެއްޖެއެވެ.
އެމްޑީޕީގެ ޕްރައިމަރީގައި އީސީގެ ވޯޓު ފޮށިތައް ބޭނުންކުރަން ދިނުމާއި ގުޅިގެން ރާއްޖެއެމްވީއިން ކުރި ސުވާލަކަށް ޖަވާބުދެއްވަމުން އަކްރަމް ވިދާޅުވީ އެއީ އޮންނަ އުސޫލުގެ ތެރެއިން ކުރި ކަމެއް ކަމަށެވެ. އަދި އަންނަ ހުކުރު ދުވަހު އޮންނަ ޕީޕީއެމްގެ ޕްރައިމަރީގައި ބޭނުންކުރަން ވޯޓު ފޮށިތައް ދޫކުރައްވާނެ ކަމަށްވެސް އޭނާ ވިދާޅުވިއެވެ.
ޕީޕީއެމްގެ ޕްރައިމަރީގައި އިލެކްޝަންސް ކޮމިޝަންގެ ވޯޓު ފޮށިތައް ބޭނުންކުރުމަށް އެދި، ޕީޕީއެމްއިން އިލެކްޝަންސް ކޮމިޝަނަށް ސިޓީ ފޮނުވާފައިވާކަމަށް ރާއްޖެއެމްވީއަށް ވަނީ ކަށަވަރުވެފައެވެ.
އީސީގެ ވޯޓު ފޮށިތައް ދިން މައްސަލަ ފެންމަތިވީ، އިދިކޮޅު ޕީއެންސީގެ ނައިބު ރައީސް އިބްރާހިމް ޝުޖާއު ހޯމަ ދުވަހު ކުރެއްވި ޓްވީޓަކާއި ގުޅިގެންނެވެ. ޓްވީޓްގައި އޭނާ ވަނީ އެމްޑީޕީގެ ޕްރައިމަރީ ބާއްވާފައިވަނީ އިލެކްޝަން ކޮމިޝަންގެ މުދާ ބޭނުންކޮށްގެން ކަމަށާއި، ޕީޕީއެމްގެ ޕްރައިމަރީގައިވެސް އިލެކްޝަންސް ކޮމިޝަންގެ މުދާ ބޭނުންކުރެވެން ޖެހޭނެ ކަމަށް ވިދާޅުވެފައެވެ.
އޭގެ އިތުރުން ސުޖާއު ވަނީ އީސީގެ ނައިބު ރައީސް އަކްރަމްއަކީ އެމްޑީޕީގެ ފަރާތުން އީސީގައި ހުންނަ އޭޖެންޓެއް ކަމަށް ތުހުމަތުކުރައްވާފައެވެ. މި ތުހުމަތުތަކަށް ރައްދުދެއްވައި އަކްރަމް ވިދާޅުވީ އެއީ ދޮގު ތުހުމަތުތަކެއް ކަމަށާއި، އެފަދަ ވާހަކަތައް ނުދައްކަވާ އިންތިހާބަށް ކެމްޕެއިން ކުރުން މާރަނގަޅު ވާނެކަމަށް ވިދާޅުވެފައެވެ.
މައުލޫމާތު ލިބިފައިވާ ގޮތުގައި، މީގެ ކުރިން ބޭއްވި އެތެރޭގެ އިންތިހާބެއްގައި އިލެކްޝަންސް ކޮމިޝަންގެ ވޯޓު ފޮށިތައް ބޭނުންކޮށްފައިވެއެވެ. މިއީ އާންމު އުސޫލުގެ ތެރެއިން ސިޔާސީ ޕާޓީތަކަށް އިލެކްޝަންސް ކޮމިޝަނުން ފޯރުކޮށްދޭ ވަސީލަތްތަކެކެވެ.
މިހާރު އީސީގެ ނައިބު ރައީސްގެ މަގާމު ފުރުއްވަމުން ގެންދަވާ އަކްރަމް އެ ކޮމިޝަނުގައި ހުންނެވުމަށް ރައްޔިތުންގެ މަޖިލީހުން ރުހުން ދީފައިވަނީ، 18 މަރޗް 2015 ގައި، ރައީސް ޔާމީންގެ ސަރުކާރުގައެވެ. އެ ދުވަހުގެ ވޯޓުގައި ބައިވެރިވި 53 މެމްބަރުންގެ އިއްތިފާގުން އަކްރަމްއަށް ރުހުންދީފައިވާއިރު، އޭގެ ތެރޭގައި އޭރު ބާރަށު ދާއިރާގެ މެމްބަރަކަށް ހުންނެވި ޝުޖާއު ހިމެނިވަޑައިގަންނަވައެވެ. އެމްޑީޕީން ވަނީ އެ ދުވަހުގެ ވޯޓު ބޮއިކޮޓްކޮށްފައެވެ.
