ޔުނެކްސް ސްޕޯޓިންގ އަދި ބީއެޗްއެމް ގުޅިގެން ރާއްޖޭގެ އެކި ކަންކޮޅުތަކުގައި ކުރިޔަށް ގެންދިޔުމަށް ހަމަޖެހިފައިވާ އެކްސެލް ސްޓްރީޓް ސޮކާ ރާއްޖެ ޓުއާގެ މާލޭ ޒޯން، މުބާރާތް ކާމިޔާބުކަމާއިއެކު ނިންމައިލައިފިއެވެ.

މާލޭ ޒޯންގެ މެޗުތައް ހުކުރު ދުވަހު ފެށިއިރު މާލޭ ޒޯންގައި 16 ފިރިހެން ޓީމު ބައިވެރިވެފައިވާއިރު، އަންހެން 6 ޓީމު ވަނީ މި ޒޯނުގައި ބައިވެރިވެފައެވެ. މާލޭ ޒޯން މުބާރާތް ހުޅުވައިދެއްވީ އެކްސެލްގެ ރީޖަނަލް ޑިރެކްޓަރ މާޗިން އެވެ.

3 އޮން 3 މުބާރާތެއްގެ ގޮތުގައި ކުރިޔަށްދާ މި މުބާރާތުގެ ފިރިހެން ޑިވިޝަން ފައިނަލުގައި ވާދަކުރީ ކްލަބް އޯވަންއޯ އާއި ޓީމް ޕާކް އެވެ. ފޯރިގަދަ ކުޅުމެއް ފެނިގެންދިޔަ މި މެޗު އޯވަންއޯ އިން ކާމިޔާބުކުރީ 4-2 ގެ ނަތީޖާއަކުންނެވެ.

މި މުބާރާތުގެ އަންހެން ޑިވިޝަނުގެ ފައިނަލުގައި ވާދަކުރީ ޑަބްލިއުއެފްސީ ބްލޫ ޓީމާއި ޑަބްލިއުއެފްސީ ވައިޓް އެވެ. މި މެޗު ކާމިޔާބުކުރީ ޑަބްލިއުއެފްސީ ބްލޫ ޓީމުންނެވެ.

މި މުބާރާތުގެ އަތޮޅުތެރޭ ޓުއާގެ ފުރަތަމަ މުބާރާތް 14 ފެބްރުއަރީ ގައި ހދ. ކުޅުދުއްފުށީގައި ބޭއްވުމަށް ހަމަޖެހިފައިވާއިރު، މި ޓުއާގައި ބ. އޭދަފުށި، ޅ. ނައިފަރު، ދ. ކުޑަހުވަދޫ، ގދ. ތިނަދޫ، ފުވައްމުލަކު ސިޓީ އަދި އައްޑޫ ސިޓީ ފޭދޫގައި ކުރިޔަށްދާނެއެވެ.

ޔުނެކްސް ސްޕޯޓްސްއިން ބުނީ މި މުބާރާތް ބޭއްވުމުގެ މަގުސަދަކީ އެ ޖަމިއްޔާއިން ރާއްޖޭގައި ޔުނީކް ސްޕޯޓިން އިތުރުކުރުމަށް ކަމަށާއި އެގޮތުން ޔުނީކް ސްޕޯޓްސް ކުރިއެރުވުމަކީ އެ ޖަމިއްޔާގެ އަމާޒު ކަމަށެވެ.