އޮސްޓްރޭލިއަން އޯޕަން: ޖޮކޮވިޗް އަށްވަނަ ފަހަރަށް ޗެމްޕިއަންކަން ހޯދައިފި

އޮސްޓްރޭލިއަން އޯޕަން ޓެނިސް މުބާރާތުގެ ފިރިހެން ސިންގަލްސްގެ ޗެމްޕިއަންކަން އަށްވަނަ ފަހަރަށް ސާބިއާގެ ނޮވަކް ޖޮކޮވިޗް ހޯދައިފި އެވެ.

ޖޮކޮވިޗް އަކީ މި މުބާރާތުގެ އެންމެ ކާމިޔާބު ކުޅުންތެރިޔާއެވެ. މިއަހަރުގެ މުބާރާތާއެކު ޖޮކޮވިޗް މިހާތަނަށް ވަނީ މި މުބާރާތް 8 ފަހަރު ހޯދާފައެވެ. އަދި މިއީ ޖޮކޮވިޗްގެ ކެރިއަރުގައި ކާމިޔާބުކުރި 17 ވަނަ ގްރޭންޑް ސްލޭމް މުބާރާތެވެ. އަދި މި މުބާރާތުގެ ޗެމްޕިއަންކަން ހޯދާ ޖޮކިޗް ވަނީ އަލުން ދުނިޔޭގެ ރޭންކިންގެ އެއްވަނަ ހޯދާފައެވެ.

މިއަހަރުގެ މުބާރާތުގެ ފިރިހެން ސިންގަލްސްގެ ޗެމްޕިއަންކަން ޖޮކޮވިޗް ހޯދީ އާދީއްތަ ދުވަހު ކުޅުނު ފައިނަލް މެޗުގައި ދުނިޔޭގެ ފަސްވަނައަށް ރޭންކް ކޮށްފައިވާ އޮސްޓްރިއާގެ ޑޮމިނިކް ތިއެމް އަތުން މޮޅުވެގެންނެވެ.

3 ގަޑިއިރާ 59 މިނެޓަށް ދިގު ދެމިގެންދިޔަ ފޯރިގަދަ ފައިނަލް މެޗު ޖޮކޮވިޗް ކާމިޔާބުކުރީ 3-2 ސެޓުންނެވެ. މި މެޗުގެ ފުރަތަމަ ސެޓު 6-4 އިން ޖޮކޮވިޗް ކާމިޔާބުކުރި ނަމަވެސް، ތިއެމް ވަނީ އަނެއް ދެ ސެޓު 6-4 އަދި 6-2 އިން ކާމިޔާބުކޮށްފައެވެ. އެކަމަކު ޖޮކޮވިޗް ވަނީ ކުޅުން ރަނގަޅުކޮށް ފަހު ދެ ސެޓު 6-3 އަދި 6-4 އިން ކާމިޔާބުކޮށް ޗެމްޕިއަންކަން ހޯދާފައެވެ.

މެޗަށްފަހު ޖޮކޮވިޗް ބުނީ މި މުބާރާތް ކުޅޭ ޓެނިސް ކޯޓަކީ އޭނާއަށް އެންމެ ކާމިޔާބު ކޯޓު ކަމަށާއި، އަލުން އޮސްޓްރޭލިއަން އޯޕަންގެ ތަށި އުފުލާލަން ލިބުމަކީ ލިބޭ ވަރަށް ބޮޑު އުފަލެއް ކަމަށެވެ.

މިއަހަރުގެ މުބާރާތުގެ ފިރިހެން ސިންގަލްސްގެ ޗެމްޕިއަންކަން ޖޮކޮވިޗް ހޯދިއިރު، އަންހެން ސިންގަލްސްގެ ޗެމްޕިއަންކަން ހޯދާފައިވަނީ އެމެރިކާގެ ސޮފިއާ ކެނިން އެވެ.