އަލާމަތްތައް ނުފެންނަނަމަ، ޗައިނާއިން އަންނަ ދިވެހިން އައިސޮލޭޓް ކުރުމުގެ ވިސްނުމެއްނެތް!
1 ފެބުރުއަރީ 2020 | ހޮނިހިރު 13:33އައިސޮލޭޓް ކުރަން ނިންމި ފަހުން ޗައިނާއިން ރާއްޖެއައީ މަދު ދިވެއްސެއް: ޑރ. އަފްޒަލް
ރައީސް އޮފީހުގައި އެޗްޕީއޭއިން ބޭއްވި ނޫސް ކޮންފަރެންސްގެ ތެރެއިން
އެއްވެސް އަލާމާތެއް ނުފެންނަނަމަ، ޗައިނާއިން ރާއްޖެއަށް އަންނަ ހުރިހާ ދިވެހިން އައިސޮލޭޓް ކުރުމުގެ ވިސްނުމެއް ނުގެންގުޅުއްވާ ކަމަށް، ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ހާމަކޮށްފިއެވެ.
ނޮވެލް ކޮރޯނާވައިރަސްއާ ގުޅިގެން މައުލޫމާތު ދިނުމުގެ ގޮތުން ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި، ނޫސްވެރިޔަކު ކުރި ސުވާލަކަށް ޖަވާބުދެއްވަމުން އެޗްޕީއޭގެ ޑރ. އިބްރާހިމް އަފްޒަލް ވިދާޅުވީ، ޗައިނާއިން އަންނަ ދިވެހިން އައިސޮލޭޓް ކުރަން ނިންމި ފަހުން އައީ ވަރަށް މަދު ބަޔަކު ކަމަށެވެ.
އެފަރާތްތަކުގެ ތެރޭގައިވެސް ގިނައީ ބަލީގެ އަލާމާތްތައް ނުފެންނަ މީހުން ކަމަށާއި، އެމީހުން އައިސޮލޭޓްކުރުމަށް ވުރެ ބޮޑަށް ބާރުއަޅަނީ ހޯމް އައިސޮލޭޝަންއަށް ކަމަށް ޑރ. އަފްޒަލް ވިދާޅުވިއެވެ.
އަަންނަ އެންމެން އައިސޮލޭޓް ކުރުމުގެ ވިސްނުމުގެ ބަދަލުގައި، އައިސޮލޭޓް ކުރަން ނިންމަނީ އެ މީހަކާ އިތުރު މައުލޫމާތު ހޯދުމަށް ފަހުގައި ކަމަށް ޑރ. އަފްޒަލް ވިދާޅުވިއެވެ.
އޭގެތެރޭގައި، އެ މީހަކު ޗައިނާއިން ދިޔަ ތަންތަނާއި، އެ މީހަކު ވަކިކަހަލަ ތަނަކަށް ދިޔަކަމުގެ މައުލޫމާތުތައް އޮޅުންފިލުވައެވެ. ނަމަވެސް، އަންނަ އެންމެންވެސް ސްކްރީންކުރާނެ ކަމަށާއި، ސްކްރީން ކުރުމުގައި ދިވެހިންނަށް ވަރަށް ހާއްސަ އިސްކަމެއް ދީގެން އެ މަަސައްކަތް ކުރަމުންދާ ކަމަށް ޑރ. އަފްޒަލް ވިދާޅުވިއެވެ. އަދި އައިސޮލޭޓް ކުރުމާއިމެދު ގޮތެއް ނިންމަނީ ޓެކްނިކަލް އެޑްވައިޒަރީ ގްރޫޕެއްގެ މަޝްވަރާއަށް ފަހުގައެވެ.
ރާއްޖެއިން މިހާތަނަށް ކޮރޯނާވައިރަސްއަށް ޕޮޒިޓިވް އެކަކުވެސް ފެނިފައިނުވާއިރު، އެބައްޔަށް ޝައްކުކުރެވޭ އެކަކު މިހާރު ހުރީ އައިސޮލޭޝަންގައެވެ. އަދި ބަލީގެ އަލާމާތެއް ފެނޭތޯ އިތުރު ދެ މީހަކު މޮނީޓަރ ދަނީ މޮނީޓަރ ކުރަމުންނެވެ.
ދުނިޔޭގައި ހަލުވި މިނެއްގައި ފެތުރެމުން އަންނަ ނޮވެލް ކޮރޯނާވައިރަސްއަށް މިހާތަނަށް މުޅި ދުނިޔެއިން 12000 މީހަކު ޕޮޒިޓިވްވެ، 259 މީހަކު ވަނީ މަރުވެފައެވެ. މަރުވި ހުރިހާ އެންމެންނަކީވެސް، މި ބަލި ފުރަތަމަ ފެނުނު ޗައިނާގެ ރައްޔިތުންނެވެ.
