ހުޅުމާލޭގައި އިމާރާތްތައް 100 ބުރިއާއި ހަމަޔަށް ނޭޅެންވީ އެއްވެސް ސަބަބެއް ނެތް ކަމަށް ކޮމިއުނިކޭޝަން ސައިންސް އެންޑް ޓެކްނޮލޮޖީ މިނިސްޓަރު މުހައްމަދު މަލީހު ވިދާޅުވެއްޖެއެވެ.
ހޮނިހިރު ދުވަހު ކުރެއްވި ޓުވީޓެއްގައި މަލީހު ވިދާޅުވީ ރާއްޖޭގައި ބިން މަދުކަމަަަށާއި ބިމުގެ އަގު ބޮޑު ކަމަށެވެ. މަލީހު ވިދާޅުވީ އެއަރޕޯޓު ނިންމާ، މާލެ، ވިލިމާލެ، ގުޅީފަޅު ތިލަފުށީ ބްރިޖް ނިންމާ، ގުޅީފަޅު ޕޯޓު ނިންމުމަށްފަހު ހުޅުމާލޭގައި އިމާރާތްތައް 100 ބުރިއާއި ހަމަޔަށް ނޭޅެންވީ އެއްވެސް ސަބަބެއް ނެތް ކަމަށެވެ.
މަލީހު މިހެން ވިދާޅުވެފައިވާއިރު ރާއްޖެއަށް ބޭނުންވާ ހައްލަކީ ވަރޓިކަލް ސިޓީޒް ކަމަށް ވެސް މީގެކުރިން ވިދާޅުވެފައިވެއެވެ. އެގޮތުން މިނިސްޓަރ ވިދާޅުވީ ބުރިބުރިއަށް ނަގައިގެން ޖާގަ އިތުރުކުރުމާއި ހުސްބިމުން ގޯތި ދެވޭނެތީ ރާއްޖޭގެ އެއްވެސް ރަށެއް ނުފުރޭ ކަމަށެވެ. ވަރޓިކަލް ސިޓީޒް ތަކަކީ ބުރިބުރިއަށް ޑިޒައިން ކުރެވިގެން ތަރައްގީ ކުރެވޭ ސިޓީ ތަކެވެ.
މިކަމާއި ގުޅިގެން ރާއްޖެއެމްވީ އަށް މިނިސްޓަރ ވިދާޅުވީ ރާއްޖެއަށް އޮތް އަނެއް ގޮތަކީ ހޮރިޒޯންޓަލް ސިޓީ ތަރައްގީ ކުރުންކަމަށެވެ. އެއީ މަތިމައްޗަށް އިމާރާތްތައް ނުނަގާ، ބިމުގެ ބޮޑުބައެއްގައި އިމާރާތްކޮށްގެން ކުރެވޭ ތަރައްގީ ކަމަށެވެ.
