ތުރުކީއަށް ހުކުރު ދުވަހު އައި ބިންހެލުމުގައި މަރުވި މީހުންގެ ޢަދަދު 39 ށް އަރައިފިއެވެ.
ތުރުކީގެ އިންޓީރިއަރ މިނިސްޓަރ ސުލައިމާން ހޯމަދުވަހު ވިދާޅުވީ ރެސްކިޔު ޓީމުތަކުން ޢިމާރާތްތަކުގެ ދަށުވެފައިވާ މީހުން ސަލާމަތްކުރުމުގެ މަސައްކަތް ކުރަމުންދާ ކަމަށެވެ. އެގޮތުން މިހާރު ދެ މީހަކު ގެއްލިގެން އެ ދެމީހުން ހޯދުމުގެ މަސައްކަތް ކުރަމުންދާކަމަށް މިނިސްޓަރ ވިދާޅުވި އެވެ.
6.8 މެގްނެޓިޔުޑް ގެ ބާރުމިނުގައި އައި މިބިން ހިލެމުގައި އުލޭޒިގް ޕްރޮވިންސުން 35 މީހަކު މަރުވެފައިވާއިރު އެޕްރޮވިންސާ ކައިރި ހިސާބެއްގައިވާ މަލަތުޔާއިން ވަނީ ހަތަރު މީހަކު މަރުވެފަ އެވެ. އަދި މި ބިންހިލުމުގައި 1600 މީހުންނަށް ވަނީ އަނިޔާވެފަ އެވެ. އަދި މިހާރުވެސް 86 މީހުންނަށް ހޮސްޕިޓަލްތަކުގައި އަންނަނީ ފަރުވާދެމުންނެވެ.
މިހާތަނަށް އައި އިރު ޢިމާރާތްތަކުގެ ދަށުން 45 މީހުން ވަނީ ސަލާމަތްކޮށްފަ އެވެ. ތުރުކީގެ ސަރުކާރުން ވަނީ ވެއްޓިފައިވާ ޢިމާރާތްތަކުގެ ތެރެއަށް ނުދިޔުމަށް ރައްޔިތުންނަށް އިލްތިމާސްކޮށްފަ އެވެ.
