އެޗްއައިވީ އަދި އެއިޑްސް އަށް ފަރުވާ ހޯދުމަށް ބޭނުންކުރާ ބޭސްތައް ޗައިނާގެ ބެއިޖިންގައި ކޮރޯނާ ވައިރަސް ޖެހުނު ބަލިމީހުންނަށް ފަރުވާ ކުރަން ބޭނުންކުރަން ފަށައިފިއެވެ.
ބެއިޖިން ސިޓީގެ ހެލްތު ކޮމިޝަނުން ނެރުނު ބަޔާނެއްގައި ބުނެފައިވަނީ ކޮރޯނާއަށް ފަރުވާކުރުމަށް އެޗްއައިވީއާއި އެއިޑްސްގެ ބޭސް ބޭނުންކުރަމުންދާ ކަމަށެވެ. އެގޮތުން ބޭނުންކުރަމުންދާ ބޭސްތަކުގެ ތެރޭގައި ލޮޕިނަވީރ އަދި ރިޓޯނަވީރ ހިމެނެއެވެ.
މިބޭސްތައް ބޭނުންކުރަމުންދަނީ "ނިއުމޯނައިޓިސް ޑައިގްނޯސިސް އެންޑް ޓްރީޓްމެންޓް ޕްރޮގްރާމް ފޮރ ނިއު ކޮރޯނާ ވައިރަސް އިންފެކްޝަން (ޓްރައިލް އެޑިޝަން)" ގެ ނަމުގައި ހިންގާ ޓެސްޓް ޕްރޮގުރާމެއްގެ ދަށުންނެވެ.
އެމެރިކާގެ ނެޝަނަލް އިންސްޓިޓިއުޓް އޮފް ހެލްތުގެ ނެޝަނަލް އިންސްޓިޓިއުޓް އޮފް އެލަރޖީ އެންޑް އިންފެކްޝަސް ޑިޒީސްގެ ޑިރެކްޓަރު ޑރ. އެންތަނީ ފައުޗީ ވިދާޅުވެފައިވަނީ މިހާރު ފެތުރެމުންދާ ކޮރޯނާ ވައިރަސްއަށް އަސަރުކުރާވަރުގެ ބޭހެއް ނެތް ކަމަށެވެ.
އެމެރިކާގެ ނެޝަނަލް އިންސްޓިޓިއުޓް އޮފް ހެލްތުން ދަނީ ކޮރޯނާ ވައިރަސްއަށް ވެކްސިންއެއް އުފެއްދުމުގެ މަސައްކަތް ކުރަމުންނެވެ. ނަމަވެސް ވެކްސިންގެ ފުރަތަމަ ސާމްޕަލްތައް އުފައްދާ ކްލިނިކަލް ޓެސްޓުތައް ހަދަން މަސްތަކެއް ނަގާނެ ކަމަށެވެ. އަދި މި ވެކްސިން ދާއިމީކޮށް ލިބެން އަދި އަހަރު ދުވަސް ނަގާނެ ކަމަށް ފައުޗީ ވަނީ ވިދާޅުވެފައެވެ.
ޓެކްސަސް، ނިއުޔޯކް އަދި ޗައިނާގެ ސައިންޓިސްޓުންގެ ޓީމުތަކުން ދަނީ ވެކްސިންއެއް އުފެއްދުމުގެ މަސައްކަތް ހުއްޓުމެއް ނެތި ކުރަމުންނެވެ.
