ޖަލު ބަލަހައްޓަން ޕްރިޒަންސް އޮފިސަރުން ހޯދުމުގެ މަސައްކަތް ފަށައިފި
27 ޖެނުއަރީ 2020 | ހޯމަ 16:24އޮފިސަރުން މަސައްކަތް ކުރަން ޖެހޭނީ ފިރިހެން ޤައިދީންނާއި ބަންދުމީހުން ބަންދުކޮށްފައިތިބޭ ޖަލުތުގައި
މާފުށީ ޖަލު
ޖަލު ބަލަހައްޓަން ޕްރިޒަންސް އޮފިސަރުން ހޯދުމުގެ މަސައްކަތް، މޯލްޑިވްސް ކަރެކްޝަނަލް ސަރވިސް އިން ފަށައިފިއެވެ.
އެގޮތުން، ކަރެކްޝަނަލް ސަރވިސް އިން މިހާރު ވަނީ ޖަލު ބެލެހެއްޓުމަށް 60 އޮފިސަރުން ބޭނުންވާކަން ހާމަކޮށް، އޮފިސަރުން ހޯދުމަށް ޢާންމުކޮށް އިޢުލާންކޮށްފައެވެ.
ކަރެކްޝަނަލް ސަރވިސް އިން ޢާންމުކުރި އިޢުލާނުގައިވާ ގޮތުންނަމަ، އެ އޮފިސަރުން މަސައްކަތް ކުރަން ޖެހޭނީ ފިރިހެން ޤައިދީންނާއި، ބަންދުކުރާ މީހުން ބައިތިއްބާ ޖަލުތަކުގައެވެ. ޕްރިޒަންސް އޮފިސަރުންނަ ކުރިމަތިލާ ފަރާތްތަކުގެ ކިބައިގައި މަޤާމުގެ މަސައްކަތް ކުރުމުގެ ހުނަރުގެ އިތުރުން، ޘާނަވީ އިމްތިޙާނަކުން މަދުވެގެން 2 މާއްދާއިން ދަށްވެގެން 'ޑީ' ފާސްލިބިފައިވުމާއެކު، ސެކަންޑަރީ ސްކޫލް ސެޓްފިކެޓް އިމްތިޙާނުގައި 'ދިވެހި އަދި 'އިސްލާމް' އިން ދަށްވެގެން 'ސީ' ފާސް ލިބިފައިވުން ނުވަތަ، ޕްރިޒަން އޮފިސަރުންގެ ވަޒީފާއަށް ބޭނުންވާ ނުވަތަ ގުޅުންހުރި ދާއިރާއަކުން ދިވެހިރާއްޖޭގެ ޤައުމީ ސަނަދު އޮނިގަނޑުގެ ލެވަލް 3 ގެ ސަނަދެއް ނުވަތަ އެއަށްވުރެ މަތީ ސަނަދެއް ހާޞިލްކޮށްފައިވުން ހިމެނެއެވެ.
ޕްރިޒަންސް އޮފިސަރުންގެ ގޮތުގައި ނަގަނީ އުމުރުން 18 އަހަރާއި 30 އަހަރައި ދެމެދުގެ އުމުރުފުރާގެ މީހުންނެވެ. އަދި މިމީހުންނަކީ އެއްވެސް އިރެއްގައި ކުށުގެ ރެކޯޑެއް އޮތް ފަރާތެއްކަމުގައި ވެގެން ނުވާނެކަމަށް ކަރެކްޝަނަލް ސަރވިސްއިން ބުނެއެވެ.
ވަޒީފާއަށް އެދޭ ފޯމު އެ ސަރވިސްގެ ވެބްސައިޓު mv.gov.corrections.www އިން ޑައުންލޯޑް ކުރެވޭނެއެވެ. އަދި އެ ސަރވިސްގެ ކައުންޓަރުންވެސް ލިބެން ހުންނާނެކަމަށް ކަރެކްޝަނަލް ސާރވިސް އިން މައުލޫމާތު ދެއެވެ.
ޖަލު ބެލެހެއްޓުމަށް އޮފިސަރުން ހޯދަން އިޢުލާން ކޮށްފައި މިވަނީ ޖަލުތައް ބެލެހެއްޓުމުގެ ކަންކަމާއި ހަވާލުވެ ހުންނެވި ކޮމިޝަނަރ އޮފް ޕްރިޒަންސް ޢަބްދުﷲ މުނާޒް މިހިނގާ ޖެނުއަރީ މަހުގެ 21 ވަނަ ދުވަހު މަޤާމުން ވަކިކުރެއްވުމަށްފަހު އެމަޤާމަށް އަހުމަދު މުހައްމަދު ފުޅު ހަމަޖައްސަވާފައި ވަނި ކޮށެވެ.
ޖަލުގެ ޙާލަތު ރަނގަޅުކުރުމަށް ކުރެވެން ހުރި ހުރިހާ މަސައްކަތްތެއް ކުރައްވާނެ ކަމުގެ ޔަޤީންކަން ސަރުކާރަށާއި ޢާންމުންނަށް ދެއްވާކަމަށް އޭނާ ވަނީ ވިދާޅުވެފައެވެ.
