އެމެރިކާގެ ފަސް މީހަކަށް ކޮރޯނާ ވައިރަސް ޖެހިފައިވާކަން ކަށަވަރުކޮށްދީފި

ހަލުވިކަމާއި އެކު ފެތުރުމުންދާ ކޮރޯނާ ވައިރަސް ޖެހިފައިވާ ފަސް މީހަކު އެމެރިކާއިން ފެނިއްޖެ ކަމަށް އެމެރިކާގެ ސިއްހީ އިދާރާއިން ބުނެފިއެވެ. ބަލި ޖެހިފައި ތިބި އިތުރު މީހުން ތިބުން އެކަށީގެންވާ ކަމަށް ސިއްހީ އިދާރާއިން ވަނީ ބުނެފައެވެ.

އެމެރިކާގެ ސެންޓަރސް ފޯ ޑިޒީސެސް ކޮންޓްރޯލް އެންޑް ޕްރޮވެންޝަންގެ ރެސްޕިރޭޓަރީ ޑިޒީސަސްގެ އެންމެ އިސްވެރިޔާ ނެންސީ ވިދާޅުވީ، ޗައިނާގެ ވޫހަން ސިޓީން ފެނުނު ވައިރަސް އަށް 100 މީހުންގެ ތެރެއިން 26 މީހަކު މީހެއްގެ ތަހުލީލު ހަދާފައިވާ ކަމަށެވެ.

ކޮންފަރެންސް ކޯލް މެދުވެރިކޮށް ނޫސްވެރިންނަށް މައުލޫމާތު ދެއްވަމުން ނޭންސީ ވިދާޅުވީ، ބަލި ފެނުނު ފަސް މީހުންނަކީ ވެސް ވޫހަން ސިޓީއަށް ދަތުރުކޮށްފައިވާ މީހުން ކަމަށެވެ.

މި ބަލީގައި ޗައިނާއިން 56 މީހަކު މަރުވެފައިވާ އިރު، މިހާތަނަށް 1975 މީހަކު ވަނީ މި ވައިރަސްއަށް ޕޮޒިޓިވްވެފައެވެ. މިހާތަނަށް ވައިރަސް ޖެހިފައި ތިބި މީހުން ފެނިފައިވާ ޤައުމުތަކުގެ ތެރޭގައި އޮސްޓްރޭލިއާ، ޗައިނާ، ފްރާންސް، ޖަޕާން، މެލޭޝިއާ، ސިންގަޕޫރު، ނޭޕާލް، ސައުތުކޮރެއާ، ޓައިވާން، ތައިލެންޑް، އެމެރިކާ އަދި ވިއެޓްނާމް ހިމެނެއެވެ.