2012 ވަނަ އަހަރުގައި އެމްޑީޕީގެ ވެރިކަން ވެއްޓުނީ ހެނދުނުގެ ވަގުތުގައި މުޒާހަރާކުރުމުންކަމަށް ޑިފެންސް މިނިސްޓަރ މާރިޔާ ދީދީ ވިދާޅުވެއްޖެއެވެ.

އެމްޑީޕީގެ ''އެޖެންޑާ 19 ރަށަށް'' މާލެގައި ފެށި ވޯކްޝޮޕް އިފްތިތާހުކުރުމުގެ ރަސްމިއްޔާތުގައި ވާހަކަދައްކަވަމުން ޑިފެންސް މިނިސްޓަރު ވިދާޅުވީ އެމްޑީޕީ މެމްބަރުންނަކީ އާންމު ގޮތެއްގައި ހެނދުނު ފެންނަ ބައެއް ނޫންކަމަށާއި 7 ފެބްރުއަރީގައި އެމްޑީޕީގެ ސަރުކާރު ވެއްޓިގެން ދިޔައީ ހެނދުނު ދަޅައިގައި ޖެހި "އެޓެމްޕްޓަކުން" ކަމަށެވެ. މިނިސްޓަރ ވަނީ ހެނދުނު ދަޅައިގައި އެކަން ނުކުރިނަމަ އެމްޑީޕީގެ ސަރުކާރު ނުވެއްޓޭނެކަމަށް ދޭހަވާ މޭރުމަކުން ވާހަކަދައްކަވާފައެވެ.

ވޯރކްޝޮޕްގައި އިތުރަށް ވާހަކަދައްކަވަމުން މިނިސްޓަރ ވަނީ، އެމްޑީޕީގެ ޓިކެޓްގައި މާލެސިޓީ ކައުންސިލަށް ކުރިމަތިލާން ތިބި މީހުންގެ އަދަދު އެހެން ޕާޓީއެއްގައި މުޅި ރާއްޖޭގައި ކެމްޕެއިން ކޮށްލަން ނިކުންނާނެ މީހުންގެ އަދަދަށް ވުރެން ގިނަކަމަށް ވިދާޅުވެފައެވެ.

7 ފެބްރުއަރީގައި ބާޣާވާތް ގެނައިއިރު، ރާއްޖޭގައި އޮތީ ތަރައްގީވެފައިވާ އެހެން ގައުމުތަކުގައިވެސް އޮންނަ ކަހަލަ، ރައްޔިތުންގެ ރުހުމާއި ވޯޓުން އިންތިޚާބު ކޮށްފައިއޮތް ވެރިކަމެކެވެ. މެނިފެސްޓޯ އަކާއި ވަޢުދުތަކެއް ރައްޔިތުންނަށް ހުށައަޅައި، އެކަންތައް ރައްޔިތުން ބޭނުންވެގެން އެމީހުން އިންތިޚާބުކުރި ވެރިކަމެކެވެ. އެއީ، އެވެރިކަމުގައި، ދުވަހަކުވެސް ރާއްޖެ ދެކެފައިނުވާފަދަ، މިނިވަންކަމަކާއި ބާރެއް ރައްޔިތުންނަށް ލިބި، އެމީހުންގެ އަސާސީ ބޭނުންތަކަށް ސަލާންޖަހަން މަހުޖަނުންގެ ގާތަށް ދާން ނުޖެހޭ ނުވަތަ ވެރިކަން ކުރާ ފަރާތަށް އަޅުދާސްވާން ނުޖެހޭ ވެރިކަމެކެވެ.