އަންހެނުން ޚިތާނުކުރުމާއި ގުޅޭގޮތުން ފަތުވާއަކަށް އެދުނީ މިނިސްޓްރީ އޮފް އިސްލާމިކް އެފެއާޒްގެ ބޭނުމަކަށް ނޫން ކަމަށް އެމިނިސްޓްރީން ބުނެފިއެވެ.
އިސްލާމިކް މިނިސްޓްރީން ނެރުނު ބަޔާނުގައި ބުނީ އާންމު ސިއްޙަތު ރައްކާތެރިކުރުމުގެ މަސްޢޫލިއްޔަތު ޤާނޫނީގޮތުން އޮންނަ ފަރާތަކީ ހެލްތް ޕްރޮޓެކްޝަން އެޖެންސީ (އެޗްޕީއޭ) ކަމަށެވެ. އަދި އިސްލާމް ދީނުގައި އަންހެނުން ޚިތާނު ކުރުމާއި ގުޅޭގޮތުން ދީނީގޮތުން އޮންނަ ގޮތް އޮޅުންފިލުވުމަށް އެދި ފަތުވާއަކަށް އެދުނީ އެޗްޕީއޭއިންކަމަށް މިނިސްޓްރީން ބުންޏެވެ.
ދީނީގޮތުން މައްސަލައެއް އޮޅުންފިލުވުމަށް ފަތުވާ މަޖިލީހުގައި ހަމައެކަނި އެދެވޭނެ ފަރާތަކީ، އެއިރެއްގައި އިސްލާމިކް މިނިސްޓްރީ ހިންގެވުމާ ހަވާލުވެ ހުންނަވާ އެންމެ އިސްފަރާތް ކަމުގައިވާތީ، އެޗްޕީއޭގެ އެދިމުގެ މަތިން އިސްލާމިކް މިނިސްޓަރު ޑރ. އަޙްމަދު ޒާހިރު ޢަލީ ދީނީގޮތުން އަންހެނުން ޚިތާނުކުރުމާއި ގުޅޭގޮތުން އޮންނަ ރަޢުޔު ބަޔާންކޮށްދެއްވުމަށް ފަތުވާމަޖިލީހަށް ހުށަހެޅުއްވީކަމަށް މިނިސްޓްރީގެ ބަޔާނުގައި ބުންޏެވެ. އަދި ބަޔާނުގައި ބުނީ އަންހެނުން ޚިތާނުކުރުމާއި ގުޅޭގޮތުން ފަތުވާއަކަށް އެދިފައިވަނީ މިނިސްޓްރީގެ ބޭނުމަކަށް ކަމަށް ބައެއް ފަރާތްތަކަށް ހީވެފައިވާތީ އެކަމަކީ އެއްވެސް ޙާލެއްގައި އިސްލާމިކް މިނިސްޓްރީގެ ބޭނުމަކަށް އެދިފައިވާ ފަތުވާއެއް ނޫންކަމަށެވެ.
ރައްޔިތުންނަށް ދީނީ ގޮތުން އޮޅުންއަރާ ކޮންމެ ކަމެއްގައި ރައްޔިތުން ބޭނުންވެއްޖެ ކޮންމެ ހިނދަކު އެކަމެއްގައި ދީނީގޮތުން އޮންނަ ގޮތް ބަޔާންކޮށްދޭ ފަރާތަކީ އިސްލާމިކް މިނިސްޓްރީ ކަމަށް ބަޔާނުގައިވެއެވެ. ކުރިއަށްއޮތް ތަނުގައިވެސް މިމިނިސްޓްރީ އަށް ހުށަހެޅޭ ދީނީ މައްސަލަތަށް އޮޅުންފިލުވުމަށް އޮންނަ އުސޫލުގެދަށުން، ޢަމަލުކުރަމުން ކުރަމުން ގެންދާނެ ކަމަށް އިސްލާމިކް މިނިސްޓްރީގެ ބަޔާނުގައި ވަނީ ބުނެފައެވެ.
އަންހެންކުދިން ޚިތާނު ކުރުމާއި ގުޅޭގޮތުން އިސްލާމިކް މިނިސްޓްރީގެ ރައުޔަކަށް އެދި އެޗްޕީއޭއިން ފޮނުވާފައިވާ ސިޓީ ބާތިލު ކޮށްދިނުމަށް ދަންނަވައި ހެލްތް މިނިސްޓްރީގެ ބިއުރޯއިން ފޮނުވި މެމޯއެއްގައި ބުނީ، އަންހެނުން ޚިތާނު ކުރުމަކީ ސަރުކާރުގެ ސިޔާސަތެއްނޫން ކަމަށެވެ. އަދި އެކަމަކީ ސަރުކާރުން ހިތްވަރުދޭ ކަމެއް ނޫންކަމަށް ވިދާޅުވެ ހެލްތް މިނިސްޓަރ އަބްދުﷲ އަމީން ވަނީ އެކަމުގައި ލަފައެއް ހޯދަންޖެހޭ ޙާލަތެއް އޮތްކަމަށް ދެކިވަޑައިނުގަންނަވާ ކަމަށް ވިދާޅުވެފައެވެ.
