ކުޑަކުދިންނަށް ޖިންސީ ގޯނާކުރާ މައްސަލަތައް ނުހުއްޓުވާއި، އެކުދިންނަށް ރައްކާތެރިކަން ފޯރުކޮށްނުދެވޭނަމަ، އިތުރު ކަމެއް ކުރުމުގެ ބޭނުމެއް ނެތް ކަަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.

ބުދަ ދުވަހު ކ. ގުރައިދޫއަށް ވަޑައިގެން އެ ރަށުގައި ހުންނަވައި ރާއްޖެ.އެމްވީ ކުރި ސުވާލަކަށް ޖަވާބުދެއްވަމުން ރައީސް ނަޝީދު ވިދާޅުވީ، ތުއްތު ކުއްޖަކަށް ޖިންސީ ގޯނާކުރުމަކީ އެމްޑީޕީންވެސް އެކަމާއި ވަރަށް ބޮޑަށް ކަންބޮޑުވާ ކަމެއް ކަމަށެވެ. އަދި ކުޑަކުދިންނަށް ރައްކާތެރިކަން އެންމެ އެކަށީގެންވާ ވަރަށް ފޯރުކޮށްނުދެވޭނަމަ ދެން އިތުރު އެއްވެސް ކަމެއް ކުރުމުގެ ބޭނުމެއް ނެތް ކަމަށެވެ.

ދެ އަހަރުގެ ކުއްޖާ ''ރޭޕް'' ކުރި މައްސަލަ ރައްޔިތުންގެ މަޖިލީހުގެ ޖުޑިޝަރީ ކޮމިޓީން ދަނީ ބަލަމުންނެވެ. އެގޮތުން އެ މައްސަލާގައި ޝަމިލްވާ ހުރިހާ މުއައްސަސާތައް ކޮމިޓީ އަށް ހާޒިރުކޮށް މައުލޫމާތު ވަނީ ހޯދާފައެވެ. ކޮމިޓީން ނިންމި ކަންތައްތަކުގެ ތެރޭގައި، ކުޑަކުދިންނަށް ޖިންސީ ގޯނާކުރާ ފަރާތްތައް ދިރިއުޅޭ ގެތައް ބަލައި ހޯދުން ހިމެނޭއެވެ.

މަޖިލީހުގެ ރައީސް ވިދާޅުވީ، ކުޑަކުދިންނަށް ޖިންސީ ގޯނާކުރާ މައްސަލަތަކަކީ ހުއްޓުވޭނެ ކަންތައްތައް ކަމަށާއި، އަދި އެއީ ނިމުމަކަށް ގެނެވޭނެ ކަންތައްތައް ކަމަށެވެ.

އެމަނިކުފާނު ވިދާޅުވީ، ކުޑަކުދިންނަށް ޖިންސީގޯނާކުރާ މީހުންނަކީ މުޖުތަމައުގައި ބައިތިއްބަން ޖެހޭ ބައެއް ނޫން ކަމަށާއި، އެމީހުންނަށް ހަރުކަށި އަދަބުދޭން ކަމަށެވެ. އަދި އެ އަދަބަކީ އެހެން މީހުންނަށް ފިލާވަޅަކަށް ވާންޖެހޭ ފަދަ އަދަބަކަށް ވާންޖެހޭކަން ފާހަގަކުރެއްވިއެވެ.

ތުއްތު ކުއްޖާއަށް ޖިންސީ ގޯނާކުރި މައްސަލައާއި ގުޅިގެން ވަޒީރުންގެ މަޖިލީހުގެ ބައްދަލުވުމުގައި ރައީސް އިބްރާހިމް މުހައްމަދު ސޯލިހު ވިދާޅުވެފައިވަނީ، މި ސަރުކާރުން ކުޑަކުދިންނަށް ޖިންސީ ގޯނާކުރާ މީހުންނަ މެދު ގެންގުޅެނީ ''ޒީރޯ ޓޮލެރެންސް'' ކަމަށެެވެ. އެ މައްސަލަ ވީހާވެސް އަވަހަށް ބެއްލެވުމަށް ރައީސް ވަނީ ކަމާއިބެހޭ މުއައްސަސާތަކަށް އިރުޝާދު ދެެއްވާފައެވެ.