ވޯޓު ކަރުދާސް ބާޠިލުވާނެ އޮތީ ދެގޮތެއް: އިލެކްޝަންސް
22 ޖެނުއަރީ 2020 | ބުދަ 09:43ވޯޓު ދޭންޖެހޭ ކެންޑިޑޭޓުންގެ އަދަދަށްވުރެ އިތުރަށް ވޯޓު ދިނުން
ލޯކަލް ކައުންސިލްތަކުގެ އިންތިހާބާބެހޭ ގައުމީ ލަފާދޭ ކޮމެޓީން މިއަދު ބޭއްވި ބައްދަލުވުމުގެ ތެރެއިން
އަންނަ އޭޕްރީން މަހު ބާއްވާ ލޯކަލް ކައުންސިލަތްތަކުގެ އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމެޓީގެ އިންތިޚާބުގައި ވޯޓު ކަރުދާސް ބާޠިލުވާނެ ގޮތްތަކާއި، އިންތިޚާބުގައި ވޯޓު ގުނުމުގައި އިލެކްޝަންސް ކޮމިޝަނުން ޢަމަލުކުރާނެ ގޮތާ ގުޅޭގޮތުން މަޝްވަރާ ކޮށްފިއެވެ.
ލޯކަލް ކައުންސިލްތަކުގެ އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމެޓީގެ އިންތިޚާބާބެހޭ ޤައުމީ ލަފާދޭ ކޮމެޓީން ބުދަ ދުވަހު، އިލެކްޝަންސް ކޮމިޝަނުގެ އިންތިޚާބާބެހޭ މަރުކަޒުގައި ޓްރެއިނިން ހޯލުގައި ބޭއްވި ބައްދަލުވުމުގައި އިލެކްޝަންސް ކޮމިޝަނުގެ ރައީސް އަޙްމަދު ޝަރީފް ވިދާޅުވީ، ވޯޓު ކަރުދާސް ބާޠިލިުވާނެ އޮތީ ދެ ގޮތެއް ކަމަށެވެ. އެއީ، ވޯޓު ދޭންޖެހޭ ޢަދަދަށްވުރެ އިތުރަށް ފާހަގަ ޖެހުން ނުވަތަ ރަނގަޅު ފާހަގަ ޖެހުމުގެ އިތުރުން އިތުރު ފާހަގައެއް ނުވަތަ ކުރެހުމެއް ކުރެހުން ކަމަށެވެ. އެއީ ޤާނޫނުގައި ވެސް އެކަން ބާޔާންކޮށްފައިވާ ގޮތްކަމަށް ޝަރީފް ވިދާޅުވިއެވެ.
މީގެއިތުރުން ޝަރީފް ވިދާޅުވީ، ވޯޓު ގުނުމުގެ ކަންކަން ކުރިއަށްދާއިރު، ވޯޓު ގުނަނީ ރަނގަޅަށްތޯ ބެލުމަށް ތިން އޮފިޝަލުން ތިއްބަވާނެ ކަމަށެވެ.
ޝަރީފް ވިދާޅުވީ ވޯޓުލުމާއި ވޯޓު ގުނުމުގައި އިލެކްޝަންސް ކޮމިޝަނުން އަމަލުކުރާނެ ގޮތް، ވީހާވެސް ފުޅާ ދާއިރާއެއްގައި ރައްޔިތުންނަށް އެނގެންޖެހޭ ކަމަށާއި، މިކަމުގައި ޤައުމީ ލަފާދޭ ކޮމެޓީގެ އެއްބާރުލުންވެސް ބޭނުންވާނެ ކަމަށެވެ. އަދި ވޯޓު ކަރުދާހާއި ވޯޓުލުމާއި، އަދި ވޯޓު ގުނުމުގައި އިލެކްޝަންސް ކޮމިޝަނުން ކުރާނެ ގޮތުގެ އިތުރު މަޢުލޫމާތު ހިމެނޭގޮތަށް ވޯކްޝޮޕެއް ޤައުމީ ލަފާދޭ ކޮމެޓީއަށާއި، މީޑިއާތަކަށާއި، ކަމާބެހޭ އިދާރާތަކަށް ބޭއްވުމަށް ނިންމާފައިވާ ކަމަށްވެސް ޝަރީފް ވިދާޅުވިއެވެ.
މިހާރު ބާއްވަން ތައްޔާރުވާ ލޯކަލް ކައުންސިލްތަކުގެ އިންތިޚާބަކީ، މިހާތަނަށް ބޭއްވި ތިން އިންތިޚާބަށްވުރެ، ތަފާތު އިންތިޚާބެކެވެ. އެގޮތުން ސިޓީތަކުގެ މޭޔަރުންނާއި، އަތޮޅު ކައުންސިލްތަކުގެ ރައީސުންނާއި، ރަށު ކައުންސިލްތަކުގެ ރައީސުން ކަނޑައެޅޭނީ، އެމަޤާމުތަކަށް ކުރިމަތިލާފައިވާ ކެންޑިޑޭޓުންގެ މެދުގައި ނެގޭ ސީދާ ރައްޔިތުންގެ ވޯޓަކުންނެވެ. މީގެކުރިން އެމަޤާމުތަކަކީ، ކައުންސިލްތަކަށް އިންތިޚާބުވާ ކައުންސިލަރުންގެ މެދުފައި ނެގޭ ވޯޓަކުން ކަނޑައެޅޭ މަޤާމެކެވެ.
