ގދ. އަތޮޅު ކައުންސިލަރުން ސަލާމާއި އާޢިލީ ޒިންމާގެ ޗުއްޓީގެ ފޯމު ހުށައަޅާފައިނުވާ ދުވަސްތަކަށް 31,200ރ ދީފައިވޭ!
22 ޖެނުއަރީ 2020 | ބުދަ 06:11ދޭންޖެހޭ ވަރަށްވުރެ އިތުރަށް ފައިސާދެވިއްޖެނަމަ، އިތުރަށް ދެވިފައިވާ ފައިސާ އަނބުރާ ހޯދައި ދައުލަތުގެ މާލިއްޔާއަށް ޖަމާކުރަންޖެހޭ
ގދ. އަތޮޅު ކައުންސިލް
ގދ. އަތޮޅު ކައުންސިލަރުން "ސަލާމުގެ އާޢިލީ ޒިންމާގެ ޗުއްޓީގައި ހުރި ސަބަބު ބަޔާންކުރާ ފޯމު" ހުށައަޅާފައިނުވާ ދުވަސްތަކަށް މުސާރައާއި، އެލަވަންސް އުނިކޮށްފައި ނުވާކަން އޮޑިޓު ރިޕޯޓުން ހާމަވެއްޖެއެވެ.
ހުވަދު އަތޮޅު ދެކުނު ބުރި އަތޮޅު ކައުންސިލްގެ 2018 ވަނަ އަހަރުގެ މާލީ ބަޔާންތަކަށް އޮޑިޓަރ ޖެނެރަލް ނެރުނު ރިޕޯޓުން ހާމަވެފައިވާގޮތުގައި ކައުންސިލަރުން ނަންގަވާފައިވާ ބައެއް ސަލާމްތަކަށް ފޯމް ހުށައަޅުއްވާފައި ނުވި ނަމަވެސް، މުސާރައާއި އިނާޔަތް އުނިކޮށްފައެއް ނުވެއެވެ. އެގޮތުން 2018 ވަނަ އަހަރުގެ ތެރޭގައި ކައުންސިލަރުން ސަލާމުގެ ޗުއްޓީ ނުވަތަ ޢާއިލީ ޒިންމާ ޗުއްޓީގެ ފޯމު ހުށަހަޅާފައި ނުވާ ދުވަސްތަކަށް 31,200 (ތިރީސް އެއް ހާސް ދުއިސައްތަ) ރުފިޔާ ދީފައިވާކަން ފާހަގަކުރެވިފައިވާ ކަމަށް އޮޑިޓު ރިޕޯޓުގައިވެއެވެ.
ލޯކަލް ގަވަރމަންޓް އޮތޯރިޓީގެ އުޞޫލުގައި ވާގޮތުން ކައުންސިލަރަކު މެޑިކަލް ލިޔުން ހުށަހަޅަން ނުޖެހޭ ގޮތަށް ސަލާމުގެ ޗުއްޓީގައި ނުވަތަ އާޢިލީ ޒިންމާގެ ޗުއްޓީގައި ހުރުމަށްފަހު، މަސައްކަތަށް ނިކުމެ އެ ކައުންސިލަރު ސަލާމުގެ ޗުއްޓީގައި ހުރި ސަބަބު ބަޔާންކޮށް "ސަލާމުގެ ޢާއިލީ ޒިންމާގެ ޗުއްޓީގައި ހުރި ސަބަބު ބަޔާންކުރާ ފޯމު" ހުށަހަޅަންވާނެކަމަށެވެ. އަދި ކައުންސިލަރުންގެ މުސާރަ ހިސާބުކުރާ ދުވަހާއި ހަމައަށް ސަލާމުގެ ޢާއިލީ ޒިންމާގެ ޗުއްޓީގައި ހުރި ސަބަބު ބަޔާންކުރާ ފޯމު ހުށަހަޅާފައިނުވާނަމަ އެދުވަހަކީ ޣައިރު ޙާޟިރީއެއް ކަމަށް ބަލައި، މުސާރަ ހިސާބުކުރުމަށް ވެސް ބަޔާންކޮށްފައިވެއެވެ.
މިކަންތައްތައް އިޞްލާޙު ކުރުމުގެ ގޮތުން އޮޑިޓަރ ޖެނެރަލް ލަފާ ދީފައިވަނީ ދައުލަތުގެ މާލިއްޔަތުގެ ޤަވާއިދުގެ 7.14 ވަނަ މާއްދާގައި ބަޔާން ކޮށްފައިވާގޮތަށް މުސާރައާއި، އެކިއެކި އެލަވަންސާއި، އިތުރުގަޑީގެ ފައިސާއާއި، މިނޫންވެސް މުވައްޒަފުންނަށް ދޭންޖެހޭ އެއްވެސް ފައިސާއެއް ދިނުމުގައި ދޭންޖެހޭ ވަރަށްވުރެ އިތުރަށް ފައިސާދެވިއްޖެނަމަ، އިތުރަށް ދެވިފައިވާ ފައިސާ އަނބުރާ ހޯދައި ދައުލަތުގެ މާލިއްޔާއަށް ޖަމާކުރުމަށެވެ. އަދި ލޯކަލް ގަވަރމަންޓް އޮތޯރިޓީގެ ކައުންސިލަރުންގެ ޗުއްޓީ އާ ގުޅޭ އުޞޫލުގައި ވާގޮތަށް ކައުންސިލަރަކު މެޑިކަލް ލިޔުން ހުށަހަޅަންނުޖެހޭ ގޮތަށް ސަލާމުގެ ޗުއްޓީގައި ހުރުމަށްފަހު، މަސައްކަތަށް ނިކުމެ ކައުންސިލަރު ސަލާމުގެ ޗުއްޓީގައި ހުރި ސަބަބު ބަޔާންކޮށް، "ސަލާމުގެ އާޢިލީ ޒިންމާގެ ޗުއްޓީގައި ހުރި ސަބަބު ބަޔާންކުރާ ފޯމު" ހުށަހެޅުމަށެވެ.
