ގދ. ތިނަދޫ ކައުންސިލަށް ލިބެންޖެހޭ ފައިސާގެ އަދަދުތަކުގައި ބޮޑެތި މައްސަލަތަކެއް!
21 ޖެނުއަރީ 2020 | އަންގާރަ 17:32ކުލީ ބިންތަކުން ލިބެންޖެހޭ ފައިސާގެ ގޮތުގައި ހިމަނާފައިވާ އަދަދު މަދުކަން ވެސް ރިޕޯޓުގައި ފާހަގަކޮށްފައިވޭ
ގދ. ތިނަދޫ ކައުންސިލް
ގދ. ތިނަދޫ ކައުންސިލަށް ލިބެންޖެހޭ ފައިސާގެ ގޮތުގައި މިލްކިއްޔާތާއި މާލީ ޒިންމާތަކުގެ ބަޔާނުގައި ހިމަނާފައިވާ އަދަދު މަދު ކަމަށް އޮޑިޓަރ ޖެނެރަލްގެ އޮފީހުން އެކުލަވާލާފައިވާ އޮޑިޓު ރިޕޯޓުން ހާމަވެއްޖެއެވެ.
ތިނަދޫ ކައުންސިލްގެ 2018 ވަނަ އަހަރުގެ މާލީ ބަޔާންތަކަށް އޮޑިޓަރ ޖެނެރަލް ނެރުނު ރިޕޯޓުން ހާމަވެފައިވާގޮތުގައި ތިނަދޫ ކައުންސިލު އިދާރާއިން 2018 ވަނަ އަހަރުގެ ކައުންސިލްގެ އިދާރާގެ މިލްކިއްޔާތާއި މާލީ ޒިންމާތަކުގެ ބަޔާނުގައި 31 ޑިސެންބަރު 2018ގެ ނިޔަލަށް ކައުންސިލްގެ އިދާރާއަށް ލިބެންޖެހޭ ފައިސާގެ ގޮތުގައި ހިމަނާފައިވާ އަދަދު މަދުކަން ފާހަގަ ކުރެވިފައިވެއެވެ. އެގޮތުން ލިބެންޖެހޭ ފައިސާގެ ގޮތުގައި ދެ މިލިއަން ތިން ލައްކަ ތިރީސް ހަ ހާސް އެއް ސަތޭކަ ތިރީސް ފަސް ރުފިޔާ ހިމަނާފައިވާއިރު މި އަދަދުގައި ލިބެންޖެހޭ ކުނި ފީގެ ފައިސާ ހިމަނާފައި ނުވާ ކަމަށް ރިޕޯޓުގައިވެއެވެ.
ކުލީ ބިންތަކުން ލިބެންޖެހޭ ފައިސާގެ ގޮތުގައި ހިމަނާފައިވާ އަދަދު މަދުކަން ވެސް ރިޕޯޓުގައި ފާހަގަކޮށްފައިވެއެވެ. އޮޑިޓް ރިޕޯޓުގައިވާގޮތުން ކުނި ފީއިން 31 ޑިސެމްބަރ 2018ގެ ނިޔަލަށް ލިބެންޖެހޭ އެއްވެސް ފައިސާއެއް ހުރި ކަމަށް މާލީ ބަޔާނުގައި ހިމަނާފައި ނުވި ނަމަވެސް، އޮޑިޓްގައި ބެލިބެލުމުގައި ބިލް ކުރެވިފައިވާ ފަރާތްތަކުންނާއި ގޭބިސީތަކުން ނުލިބި ހުރި ކުނިފީވެސް 31 ޑިސެންބަރ 2018 ގެ ނިޔަލަށް ހުރިކަމަށެވެ.
ރިޕޯޓުގައި އިތުރަށް ފާހަގަކޮށްފައިވާ ކަންތައްތައްކަށް ބަލާލާއިރު، ކުނި ފީގެ ގޮތުގައި ނުލިބި ހުރި 5,850 (ފަސްހާސް އަށް ސަތޭކަ ފަންސާސް) ރުފިޔާ ލިބެންޖެހޭ ފައިސާގެ ގޮތުގައި ހިމަނާފައިނުވެއެވެ. އަދި އޮޑިޓްގައި ސާމްޕަލްގެ ގޮތުގައި ނެގުނު 6 (ހައެއް) ކުލީ ބިމަކުން ލިބެންޖެހޭ ފައިސާގެ ގޮތުގައި މާލީ ބަޔާނުގައި 1,688,124 (އެއް މިލިއަން ހަ ލައްކަ އަށްޑިހަ އަށް ހާސް އެއް ސަތޭކަ ސައުވީސް) ރުފިޔާ ހިމަނާފައިވީ ނަމަވެސް، އޮޑިޓްގައި ބެލިބެލުމުގައި މި ހަ ބިމުން ކުއްޔާއި ޖޫރިމަނާ އާއެކު ޖުމުލަ 3,141,998 (ތިން މިލިއަން އެއް ލައްކަ ސާޅީސް އެއް ހާސް ނުވަސަތޭކަ ނުވަ ދިހަ އަށެއް) ރުފިޔާ 31 ޑިސެންބަރ 2018 ގެ ނިޔަލަށް ލިބެންޖެހޭ ކަމަށް ދައްކާކަމަށް އޮޑިޓު ރިޕޯޓުގައި ބުނެފައިވެއެވެ. އެހެންކަމުން، ކުނި ފީ އާއި ކުލީ ބިންތަކުން ކައުންސިލްގެ އިދާރާއަށް ލިބެންޖެހޭ 1,459,724 (އެއް މިލިއަން ހަތަރު ލައްކަ ފަންސާސް ނުވަ ހާސް ހަތްސަތޭކަ ސައުވީސް) ރުފިޔާ މާލީ ބަޔާނުގައި ލިބެންޖެހޭ ފައިސާގެ ގޮތުގައި ހިމަނާފައި ނުވުމުން ލިބެންޖެހޭ ފައިސާގެ އަދަދު ސައްޙަނޫންކަން ވެސް ފާހަގަކޮށްފައިވެއެވެ.
މިކަންތައްތައް އިސްލާހުކުރުމަށް އޮޑިޓަރ ޖެނެރަލްގެ އޮފީހުން ލަފާދީފައިވަނީ މާލީ އަހަރުގެ ނިޔަލަށް އީދާރާއަށް ލިބެންޖެހޭ ފައިސާގެ ސައްޚަ މައުލޫމާތު ހިމަނައިގެން މާލީ ބަޔާން ތައްޔާރުކުރުމަށެވެ. އެ އޮފީހެއްގެ އަހަރީ މާލީ ބަޔާންތައްޔާރުކޮށް ހުށައަޅާއިރު ލިބެންޖެހޭ އާމްދަނީއާއި އެނޫން ގޮތްގޮތުން ލިބެންޖެހޭ ފައިސާގެ ތެރެއިން ނުލިބިހުރި ފައިސާގެ ތަފުޞީލު މާލީ ބަޔާނުގައި ހިމަނަންވާނެކަމަށް ބަޔާންކޮށްފައިވެއެވެ.
