މަސްމާރުކޭޓް ސަރަހައްދުގައި ގަވާއިދާ ހިލާފަށް އަޅާފައި ހުރި ދޯނިތައް ނަގަންފަށައިފި
ގަވާއިދާ ހިލާފު 27 ދޯނި އެބައޮތް
މަސްމާރުކޭޓް ސަރަހައްދު: އެއްގޮަތަކަށް ބޭނުންނުުކުރާ ދޯނި، ޑިންޑީ ފަހަރު އަޅާފައި އޮވޭ-
މާލޭގެ މަސްމާރުކޭޓު ޞަރަޙައްދު ބަނދަރުގައި ޤަވާއިދާ ޚިލާފަށް އަޅާފައިވާ ދޯނިފަހަރުތައް ނަގަން ފަށައިފި އެވެ.
މަސްމާރުކޭޓް ޞަރަޙައްދުގައި ހުންނަވާ ނޫސްވެރިންނަށް މަޢުލޫމާތު ދެއްވަމުން މާލެ ސިޓީގެ މޭޔަރު ޝިފާ މުޙައްމަދު ވިދާޅުވީ، އެ ޞަރަޙައްދުގައި ޤަވާއިދާ ޚިލާފަށް އަޅާފައިވާ 27 ދޯނީގެ ތެރެއިން ހޯމަ ދުވަހުގެ ހެނދުނު ހަތަރު ދޯނި އެޞަރަޙައްދުން ނަގާފައިވާ ކަމަށެވެ. އަދި އެ އުޅަނދުތައް އެތަނުން ނެގުމަށްފަހު ގެންދާނީ ތިލަފުއްޓަށް ކަމަށެވެ.
މާލެ ސިޓީ ކައުންސިލުން ވަނީ އުޅަނދުތަކުގެ ވެރިފަރާތްތަކަށް އެތަކެއްޗާ ޙަވާލުވުމަށް ވަކި މުއްދަތެއް ދޭން ނިންމާފައެވެ. އަދި އެ މުއްދަތުގައި އެތަކެއްޗާ ޙަވާލު ނުވެއްޖެނަމަ، ވަކި އުޞޫލެއްގެ ދަށުން އެތަކެއްޗާ މެދު ޢަމަލު ކުރެވޭނެ ކަމަށެވެ.
މޭޔަރ ޝިފާ ވިދާޅުވީ މަސްމާރުކޭޓް ޞަރަޙައްދުގައި އަޅާފައި ހުންނަ ބައެއް ދޯނިތަކަކީ، އަބަދު އެތަނުގައި އަޅާފައި އޮންނަ ދޯނިތަކަށް ކަމަށްވާތީ، މަސް ބާނައިގެން އަންނަ ދޯނިތަކަށް މަސްމާރުކޭޓަށް މަސް ބޭލުމުގައި އަބަދުވެސް ދަތިތަކާ ކުރިމަތި ލާންޖެހޭ ކަމަށެވެ. އަދި މިއީ ވަރަށް ދުވަސްވީ މައްސަލައެއް ކަމަށާއި މިހާރު ކުރަމުންދާ މަސައްކަތްތަކުން މިކަމަށް އަވަސް ހައްލެއް ލިބިގެންދާނެ ކަމަށް ޝިފާ ވިދާޅުވި އެވެ.
އެގޮތުން، ފުލުހުންނާއި މެރިން ފުލުހުންނާއައި އަދި ޓްރާންސްޕޯޓް މިނިސްޓްރީއާ ގުޅިގެން، މަސްމާރުކޭޓް ޞަރަޙައްދުގައި ޤަވާއިދާ ޚިލާފަށް ގެންގުޅޭ ދޯނި ފަހަރުތައް ނަގައި، އަދި މަހަށް ނުފުރާ ދޯނިތައް އެތަނުން ނަގާ ނިމުމާއެކު، އެ ޞަރަޙައްދު ތަރުތީބު ކުރެވި، ފަސޭހައިން މަސްމާރުކޭޓަށް މަސް ވެއްދޭނެ ނިޒާމެއް ޤާއިމު ކުރެވޭނެ ކަމަށް މާލެ ސިޓީ މޭޔަރު ޝިފާ ވިދާޅުވި އެވެ.
ޝިފާ ވިދާޅުވީ، މަސްމާރު ކޭޓު ޞަރަޙައްދަކީ މާލޭގައި އެންމެ ގޮނޑުކޮށް އޮންނަ ޞަރަޙައްދަށްވާއިރު، އެކަމަށްވެސް ޙައްލެއް ގެންނަވާނެ ކަމަށާއި، ރައްޔިތުން ބޭނުންކުރާ މަހާއި، އަދި ކާބޯތަކެތީގެ ރައްކާތެރިކަން ކަށަވަރު ކުރުމަށް މަސްމާރުކޭޓް ޞަރަޙައްދާއި ލޯކަލް މާރުކޭޓް ޞަރަޙައްދު ތަރައްޤީ ކުރަން ވިސްނަވާ، އެކަމަށްވެސް ފިޔަވަޅުތަކެއް އެޅިގެންދާނެ ކަމަށެވެ.
މީގެއިތުރުން ޝިފާ ވިދާޅުވީ ލޯކަލް މާރުކެޓް ހުރި ޞަރަޙައްދަކީ ޓްރެފިކް ވަރަށް ބާރު ބޮޑު ޞަރަޙައްދަކަށްވާތީ، ޢާއިލާއާއެެކު މާރުކޭޓުން ވިޔަފާރިކޮށްލަން ބޭނުންވާ ފަރާތްކައް ދަތިތަކާއި ކުރިމަތިލާންޖެހިފައިވާ ކަމަށެވެ. އެހެންކަމުން ރައްޔިތުންނަށް ފަސޭހައިން ޚިދުމަތް ލިބޭނެ ގޮތަށް މާލޭގެ އެހެން ޞަރަޙައްދުތަކަށް ލޯކަލް މާރުކޭޓްގެ އިތުރު ތަންތަން ހުޅުވުމަކީ ވަރަށް މުހިއްމު ކަމެއް ކަމަށް ދެކިވަޑައިގަންނަވާ ކަމަށެވެ.
