މެޖިސްޓްރޭޓުވެސް، މުނި ކާފަވެސް އެއް އާއިލާއެއް! މައްސަލަތައް އޮއްބާލީ މަސްލަހަތު އޮންނާތީތަ؟

މި ފަހުން އައިސް މުޅި ރާއްޖެ ސިއްސުވާލި ޚަބަރަކަށް ވެގެން ދިޔައީ ދެ އަހަރުވެސް ގއ. ކަނޑުހުޅުދޫއިން ދެ އަހަރު ނުފުރޭ ކުޑަ ކުޑަ އަންހެން ކުއްޖެއް، އެ ކުއްޖާގެ އާއިލާ ބައެއް ވެގެން ރޭޕު ކުރި ޚަބަރެވެ. އެ މައްސަލަތައް ތިލަވުމާއެކު ދެން އެނގިގެންދިޔައީ އެ މައްސަލައިގައި ހިމެނޭ މީހުންނަކީ މީގެ ކުރިންވެސް އެފަދަ މައްސަލަތަކުގައި ބޮޑެތި ތުހުމަތުތަކެއް ކުރެވިފައިވާ މީހުންކަމެވެ.

ދެން އަޅުގަނޑުގެ ހިތުގައި އުފެދުނު ސުވާލަކީ އެ ފަދަ އެތައް މައްސަލައެއްގެ ތުހުމަތު ކުރެވިފައިވާ މި މީހުން އެ ރަށުގައި ހިންގަމުންދިޔަ ކަން ހަމަ އެރަށުގެ އެއްވެސް ރައްޔިތަކަށް ނޭނގުނީތޯއެވެ؟ އެތައް ކުދިންނަކަށް އެމީހުންގެ އުނދަގޫ ފޯރާ، ޖިންސީ ފުރައްސާރަ ކުރަމުން ދިޔައިރު ހަމަ އެއްވެސް ބަޔަކަށް ރޭކާވެސް ނުލީތޯއެވެ؟ ރަށުގައި އޭނާ އަށް ތުހުމަތުކޮށް އެވާހަކަތައް ދެކެވޭ އިރު ކައުންސިލްގެ ސަމާލުކަމަށް އެ މައްސަލަ އައިސްފައިވޭތޯއެވެ؟ ރަށުތެރޭގައި އެވާހަކަތައް ދެކެވޭ ނަމަ ކައުންސިލުން އަމިއްލަ އަށް އިސްނަގައިގެންވެސް ކަމާބެހޭ އިދާރާތަކަށް ރިޕޯޓު ނުކުރެވެނީތޯއެވެ؟

މި މައްސަލައާއި ގުޅިގެން ހޮނިހިރު ދުވަހުގެ ރޭ ކަމާއިގުޅުންހުރި މުއައްސަސާތައް ރައްްޔިތުންގެ މަޖިލީހުގެ ހިއުމަން ރައިޓްސް އެންޑް ޖެންޑަރ ކޮމިޓީއަށް ހާޒިރުކޮށް، އެ ކައުންސިލާއި ވެސް މިކަމާއި ގުޅިގެން ސުވާލު ކުރެވުނެވެ. އެގޮތުން ފޯނު މެދުވެރިކޮށް ކުރެވުނު މި ސުވާލަށް އެ ކައުންސިލްގެ ރައީސް ދިން ޖަވާބުން އަޅުގަނޑު ހަމަ ހައިރާންވިއެވެ.

"ރަށު ތެރޭގައި އެހެން ދެކެވޭ ވާހަކައެއްގެ މައްޗަށް ބިނާކޮށް އަޅުގަނޑުމެންނަށް އެހެން ރަސްމީ ހައިސިއްޔަތަކުން ހުށަހެޅޭނެ ކަމަކަށް އަޅުގަނޑު ގަބޫލެއް ނުކުރަން." މިއީ އެރަށުގެ ޒިންމާދާރު މަގާމެއްގައި ހުރި މީހެއްގެ ޖަވާބެވެ.

މި މައްސަލާގައި ޝާމިލުވާ އާއިލާއާއި ގުޅިގެން އަޅުގަނޑު އެރަށުގެ ރައްޔިތުން ކައިރީ އަހާލީމެވެ. އެރަށު ރައްޔިތުން ބުނީ ކަނޑުހުޅުދޫއަކީ ވަރަށް ގިނައިން އެފަދަ މައްސަލަތައް ފެންމަތިވާ ރަށެކެވެ. އަދި ގިނަ ފަހަރު އެ މައްސަލަތަކުގައި ހިމެނެނީ އެއްއާއިލާއެއްގެ މީހުން ކަމަށެވެ. އެ ރަށުގެ ރައްޔިތަކު ބުނިގޮތުގައި ކަނޑުހުޅުދޫ ކައުންސިލްގެ ޒިންމާދާރު ވެރިޔާގެ ބައްޕައަކީ މިހާރު ޖިންސީ ގޯނާގެ މައްސަލައެއްގައި ސަސްޕެންޑްކޮށްފައި ހުރި އިސް މެޖިސްޓްރޭޓެވެ. ދެ އަހަރު ނުފުރޭ ކުއްޖާ ރޭޕު ކުރި، އެ ކުއްޖާގެ މުނިކާފައަކީ އިސް މެޖިސްޓްރޭޓުގެ ބޮޑުބޭބެއެވެ. އަދި އެކުއްޖާގެ ކާފައަކީ މެޖިސްޓްރޭޓުގެ ދެބެއިންގެ ދެދަރި މީހެކެވެ.

ދެން އުފެދޭ ސުވާލަކީ، މި މައްސަލަތައް ނުބެލި ކައުންސިލުންވެސް، އަޅާނުލާ ތިބީ މަސްލަހަތު އޮވެގެންބާއެވެ. އެނގިހުރެ، "ރަސްމީ ހައިސިއްޔަތަކުން މައްސަލަ ހުށަނާޅާ ކަމަށް ބުނެ އަޅާނުލާތިބީ ގަސްތުގައިތޯއެވެ. މި ސުވާލުތަކުގެ ޖަވާބު ހޯދުމަށް އެ ކައުންސިލްގެ މެމްބަރުންނާއި ވެސް ފޯނުން ގުޅޭތޯ މަސައްކަތް ކުރީމެވެ. ނަމަވެސް "ހަމަ ރަށުތެރޭގައި އެކަހަލަ ވާހަކަ ކައުންސިލާއި ހަމަޔަށް ނާންނަނީތޯ؟" މި ސުވާލު ކުރުމުން ފޯނުވެސް ކަނޑާލަނީއެވެ.

އެއް އާއިލާއަކަށް ނިސްބަތްވާ މި މީހުން، އެރަށުގެ ކުޑަކުދިންނާއި ޖިންސީ ފުރައްސާރަ ކުރުމަށް މަސައްކަތްކުރާ ކަމުގެ ވާހަކަ އަޑުއިވުނު އަދަދުވެސް ނޭނގޭކަމަށް ރަށުގެ ބައެއް ރައްޔިތުން ބުނެއެވެ. މާލޭގައި ދިރިއުޅޭ އެ ރަށަށް ނިސްބަތްވާ ރައްޔިތުންނަށް ވެސް މި ވާހަކަތައް އަޑުއިވިފައިވާއިރު ކައުންސިލާއި ހަމަޔަށް މި ވާހަކަތައް ނުފޯރާ ހުންނާނެ ކަމަކަށް އެއްވެސް ބަޔަކު ގަބޫލެއް ނުކުރެއެވެ.

ރަސްމީ ހައިސިއްޔަތަކުން މި މަައްސަލަ ހުށަނޭޅި ނަމަވެސް އަމިއްލައަށް އިސްނަގައިގެން އޭގެ ތެދު ހަގީގަތް ނުބެލެންވީ ކީއްވެގެންތޯއެވެ. މި މައްސަލައިގައި ޝާމިލުވާ އެ ކުއްޖާގެ މުނިކާފައަކީ ކުޑަކުދިންނާއި ބެހުމުގެ ކުށުގެ ރެކޯޑެއް އޮންނަ މީހެކެވެ. މިފަދަ ކުށުގެ ރެކޯޑެއް އޮތް މީހަކަށް އަނެއްކާވެސް ކުޑަކުއްޖަކާ ބެހޭ ކަމުގެ ވާހަކައެއް އިވޭނަމަ އެންމެ ކުޑަމިނުން ވެގެން އުޅޭ ގޮތެއް ސާފުކޮށް ނުލެވެނީތޯއެވެ؟

ރަށުގެ ރައްޔިތަކު ރާއްޖެއެމްވީއަށް މައުލޫމާތު ދެމުން ބުނެފައިވަނީ މުނިކާފަ އެ ރަށުގެ އެހެން ކުއްޖަކާއި ބެހެން މަސައްކަތް ކުރި ކަމުގެ ވާހަކައެއްވެސް ރަށުގައި އުޅުނު ކަމަށެވެ. ނަމަވެސް އެ ކުއްޖާގެ އާއިލާއާއި އެ ކާފައާއި އޮންނަ ގުޅުމެއްގެ ސަބަބުން ކަމާބެހޭ ފަރާތްތަކާއި ހިސާބަށް ނުގޮސް، އާއިލާ ތެެރެއިން އެ މައްސަލަ އޮއްބާލީކަމަށެވެ.

އާއްމު ރައްޔިތުންނާއި ހިސާބަށް މި ފަދަ ވާހަކަތައް އައިސްފައިވާއިރު، ކައުންސިލަށް ވެސް އެވާހަކަތައް އަޑު ނީވި ހުންނާނެ ކަމާއި މެދު ސުވާލުއުފެދެއެވެ. ރަށުގައި އުޅޭ ކުޑަކުދިންނަށް ނުރައްކަލެއް ކަމަށް ތައްގަނޑު ޖެހިފައި ތިބި މީ މީހުންނާއި ދިމާލަށް ތުހުމަތުގެ އިނގިއްޔެއް ދިއްކުރުމުން އެކަމުގެ ހަގީގަތް ބަލަން ޖެހޭނީ ކަމާބެހޭ އިދާރާތަކަށް ރަށުގެ ކަންކަން ބެލުމުުގެ ޒިންމާ އެޅިފައިވާ، އެ ރަށުގެ ކައުންސިލުންނެއް ނޫންތޯއެވެ؟