އިނގިރޭސި ވިލާތުގެ މެންޗެސްޓަރ ޔުނައިޓެޑަށް ކުޅެމުން އަންނަ ޑިފެންޑަރ އޭޝްލީ ޔަންގް އިޓަލީގެ ކްލަބު އިންޓަރ މިލާނަށް ބަދަލުވެއްޖެއެވެ.

ޔަންގް އިންޓަރ މިލާނަށް ބަދަލުވީ ހަމަސްދުވަހުގެ އެއްބަސްވުމެއްގެ ދަށުންނެވެ. އޭނާ އިންޓަރއިން އޭނާގެ ސޮއި ހޯދީ 1.28 މިލިއަން ޕައުންޑް ދެއްކުމަށްފަހުގައެވެ.

މި ސީޒަނުގައި އިންޓަރއިން އެޓީމުގެ ސްކޮޑް ވަރުގަދަ ކުރަމުން އަންނައިރު، މި ސީޒަންގެ ކުރީކޮޅު އިންޓަރއިން ވަނީ ޔުނައިޓެޑަށް ކުޅެމުންއައި ފޯވަރޑް ލުކާކޫގެ ސޮއިވެސް ހޯދައިފައެވެ. ލުކާކޫ އަންނަނީ އިންޓަރ އާއި އެކު މި ސީޒަނުގައި މޮޅު ކުޅުމެއް ދައްކަމުންނެވެ.

ވަޓްފޯރޑް އިން ކެރިޔަރުފެށި ޔަންގް މިހާތަނަށް ތިން ކްލަބަކަށް ކުޅެފައިވާއިރު އޭނާ ފާހަގަވެގެން ގޮސްފައިވަނީ ޖެހިލުންކުޑަ ޑިފެންޑަރެއްގެ ގޮތުގައެވެ. ވަޓަފޯރޑްގެ އިތުރުން ޔަންގް ކުޅެފައިވަނީ އެސްޓަން ވިލާ އާއި މެންޗެސްޓަރ ޔުނައިޓެޑަށެވެ.

އިންޓަރއަށް ބަދަލުވުމަށްފަހު ޔަންގް ސޯޝަލް މީޑިއާގައި ބުނީ ޔުނައިޓެޑްގެ ޖަރޒީގައި އޭނާ ކުޅެން ނިކުތް ކޮންމެ މެޗެއްގައި އޭނާ ޖާނާއި މާލުން ޓީމަށް ގުރުބާންވި ކަމަށާއި، އުންމީދު ކުރަނީ ޔުނައިޓެޑްގެ އޮފިޝަލުންނާއި ސަޕޯޓަރުން މި ކަންކަން ގަބޫލުކުރާނެ ކަމަށެވެ.

މެންޗެސްޓަރ ޔުނައިޓެޑަށް މިހާތަނަށް ކުޅުނު 261 މެޗުން 19 ލަނޑު ޔަންގް ވަނީ އެޓީމަށް ކާމިޔާބުކޮށްދީފައެވެ. އަދި އިންގްލޭންޑް އަށް މިހާތަނަށް ކުޅެދިން 39 މެޗުން އޭނާ ވަނީ އިންގްލޭންޑްގެ ގައުމީ ޓީމަށް 7 ލަނޑު ކާމިޔާބުކޮށްދީފައެވެ.