މެދުއިރުމަތީގައި ހަރަކާތްތެރިވަމުންދާ އެހެން ގައުމުތަކުގެ ސިފައިންނަށް ރައްކާތެރިކަމެއް ނެތްކަމުގެ އިންޒާރުދީފި
16 ޖެނުއަރީ 2020 | ބުރާސްފަތި 03:04އެސަރަހައްދު ދޫކޮށް ދިއުމަށް ވަނީ އިންޒާރުދީފައި
އިރާންގެ ރައީސް ހަސަން ރޫހާނީ
މެދުއިރުމަތީގައި ޙަރަކާތްތެރިވަމުންދާ އެހެން ޤައުމުތަކުގެ ސިފައިންނަށް ރައްކާތެރިކަމެއް ނެތްކަމަށް ބުނެ އީރާނުން އިންޒާރުދީފިއެވެ.
އިރާނުގެ ރައީސް ޙަސަން ރޫޙާނީއާ ޙަވާލާދެއްވައި އަލްޖަޒީރާގައި ރިޕޯޓުކޮށްފައިވާ ގޮތުގައި މިހާރު އުފެދިފައިވާ ހަމަނުޖެހުންތަކުގެ ސަބަބުން މެދުއިރުމަތީގައި ޙަރަކާތްތެރިވުން އެހެން ޤައުމުތަކުގެ ސިފައިންނަށް އެހާ ރައްކާތެރިއެއް ނޫނެވެ. އެހެންކަމުން އެޞަރަޙައްދު ދޫކޮށް ދިއުމަށް ރޫޙާނީ ގޮވާލައްވާފައިވާ ކަމަށް ބައިނަލްއަޤުވާމީ މީޑިއާތަކުން ރިޕޯޓުކުރެއެވެ.
ރައީސް ރޫޙާނީ ވިދާޅުވީ އެމެރިކާގެ ސިފައިންގެ އިތުރުން ޔޫރަޕުގެ އެހެން ޤައުމުތަކުގެ ސިފައިންނަށް ވެސް މެދުއިރުމަތީގައި ރައްކާތެރިކަމެއް ނެތް ކަމަށެވެ. މިއީ އެމެރިކާގެ އިތުރުން ޔޫރަޕުގެ އެހެން ޤައުމުތަކުގެ ސިފަނުންނަށް އިންޒާރު ދިން ފުރަތަމަ ފަހަރު ކަމަށް ވެސް އަލްޖަޒީރާގައި ރިޕޯޓުކޮށްފައިވެއެވެ.
މެދުއިރުމަތީގައި ޙަރަކާތްތެރިވަމުންދާ އެހެން ޤައުމުތަކުގެ ސިފައިންނަށް ރައްކާތެރިކަމެއްނެތްކަމުގެ އިންޒާރު ދެއްވާފައިވާއިރު، އީރާނުގެ ނިއްކްލިއަރ ޕްރޮގުރާމާއި ގުޅޭ ގޮތުން ދުނިޔޭގެ ނުފޫޒު ގަދަ ޤައުމުތަކާއެކު، 2015 އަހަރު ވެފައިވާ އެއްބަސްވުމަކަށް ފުރިހަމަޔަށް އިހުތިރާމުކުރުމަށް ހުޅަނގުގެ ޤައުމުތަކުން އިރާނަށް ވަނީ ގޮވާލާފައެވެ.
އިރާނާއެކު ވެފައިވާ އެއްބަސްވުމުގެ ތިން ބައިވެރިން ކަމަށްވާ ފަރަންސޭސި ވިލާތާއި، ޖަރުމަން ވިލާތާއި، އިނގިރޭސި ވިލާތުން މިކަމަށް ގޮވާލާ ޢާންމު ކުރި ގުޅިފައިވާ ބަޔާނުގައި ބުނެފައިވަނީ އެއްބަސްވުމުގައި ކަނޑައަޅާފައިވާ ނުވަތަ އިރާނުން ކުރާނެކަމަށް އެއްބަސްވެފައިވާ ނިއްކުލިއަރ މަސައްކަތްތައް ހުއްޓާލަން ޖެހޭ ކަމަށެވެ. އަދި އެއްބަސްވުމާއި ޚިލާފަށް 2019 ވަނަ އަހަރުގެ ޖުލައި މަހުން ފެށިގެން އިރާނުން ބައެއް ޢަމަލުތައް ހިންގަމުންދާކަމަށް ބުނެ، އެޤައުމުތަކުން ވަނީ ކަންބޮޑުވާކަން ފާޅުކޮށްފައެވެ.
