އެޖެންޑާ 19 ރަށަށް: އެމްޑީޕީގެ ޓީމު އިހަވަންދޫއަށް
13 ޖެނުއަރީ 2020 | ހޯމަ 03:23އެމްޑީޕީގެ ޓީމުން އިހަވަންދުއަށް ގޮސްފައިވަނީ ހޯމަ ދުވަހު ހެނދުނު 7:30 ގައި
އެމްޑީޕީގެ ޓީމު ދަތުރުކުރި ބޯޓު އިހަވަންދުއަށް ލަފަނީ
މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން ތިލަދުންމައްޗަށް ކުރާ ދަތުރުގައި އެޕާޓީގެ ޓީމު، ހއ. އިހަވަންދޫއަށް ގޮސްފިއެވެ.
ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދާއި ޕާޓީގެ ލީޑަރޝީޕް އަދި ޕާޓީގެ ރައްޔިތުން މަޖިލީހުގެ މެންބަރުންނާއި އާންމު މެންބަރުން ކުރާ މިދަތުރުގައި އިހަވަންދޫއަށް ލެފީ، ދުވަހުގެ ހެނދުނު 7:30 ގައެވެ.
އާބާދީގައި 3500 އެއްހާ މީހުން ދިރިއުޅޭ އިހަވަންދުއަށް އެމްޑީޕީގެ ޓީމުން ދިއުމުން އެރަށުން ވަނީ ހޫނު މަރުހަބާއެއް ކިޔަފައެވެ. މި ދަތުރުގައި އިހަވަންދޫގައި އިމާރާތްކޮށްފައިވާ ފެރީ ޓާރމިނަލް ރައީސް ނަޝީދު ހުޅުއްވައިދެއްވުމަށް ވަނީ ހަމަޖެހިފައެވެ.
މީގެ އިތުރުން އެރަށުގައި ކައުންސިލް އިންތިޚާބަށް ތާއީދު ހޯދުމަށް ދޮރުން ދޮރަށް ހިންގުމަށް ވަނީ ހަމަޖެހިފައެވެ. އެރަށުގައި މީހުން ދިރިއުޅޭ 376 ހުރެއެވެ.
އެމްޑީޕީގެ ޓީމުން އިހަވަންދޫއިން ފުރުމަށް ހަމަޖެހިފައިވަނީ ހޯމަދުވަހުގެ ހެނދުނު 10:00 ގައެވެ. އެމްޑީޕީގެ ޓީމުން ދެވަނަ މަންޒިލަކަށް ހަމަޖެހިފައިވަނީ އެއަތޮޅުގެ ހޯރަފުއްޓަށެވެ.
