އައްޑޫ ސިޓީގަ ކުނިން ހަކަތައާއި ފެން އުފެއްދުމުގެ މަޝްރޫޢަށް ފައިސާ ހަމަޖެހިއްޖެ
12 ޖެނުއަރީ 2020 | އާދީއްތަ 14:29ފައިސާ ހަމަޖެހުނުކަން އިއުލާން ކޮށްފައިވަނީ މިހާރު ކުރިޔަށްދާ އައިރީނާ އެސެމްބްލީގައި ބޭއްވި ރަސްމިއްޔާތެއްގައި
އައްޑޫ ސިޓީ
އައްޑޫ ސިޓީގައި ކުނިން ހަކަތައާއި, ފެން އުފެއްދުމުގެ މަޝްރޫޢެއް ހިންގުމަށް އިންޓަރނޭޝަނަލް ރިނިއުވަބަލް އެނަރޖީ އޭޖެންސީ (އައިރީނާ) މެދުވެރިކޮށް އަބޫދާބީ ފަންޑު ފޮރ ޑިވެލޮޕްމަންޓް (އޭ.ޑީ.އެފް.ޑީ) އިން 14 މިލިއަން އެމެރިކާ ޑޮލަރު (ގާތްގަނޑަކަށް 216މިލިއަން ދިވެހި ރުފިޔާ) ދިވެހިރާއްޖެއަށް ލޯނު އެހީގެ ގޮތުގައި ދިނުމަށް ނިންމާ، އެކަން ރަސްމީކޮށް މިއަދު އޭ.ޑީ.އެފް.ޑީ އިން އިޢުލާން ކުރައްވައިފިއެވެ.
އެންވަޔަރަންމަންޓް މިނިސްޓްރީން ބުނީ މިކަން އިޢުލާން ކުރެވުނީ މިހާރު އަބޫދާބީގައި ކުރިއަށްދާ އައިރީނާގެ ދިހަވަނަ އެސެމްބްލީގައި ބޭއްވި ޚާއްޞަ ރަސްމިއްޔާތެއްގައެވެ. މިރަސްމިއްޔާތުގައި ދިވެހި ސަރުކާރުގެ ފަރާތުން މިނިސްޓަރ އޮފް އެންވަޔަރަންމަންޓް ޑރ.ޙުސައިން ރަޝީދު ޙަސަނާއި، ޔޫއޭއީގައި ހުންނަވާ ދިވެހިރާއްޖޭގެ ސަފީރު ޑރ. ޙުސައިން ނިޔާޒް އަދި މިނިސްޓްރީ އޮފް އެންވަޔަރަމަންޓާއި، ފެނަކަ ކޯޕަރޭޝަނުގެ އިސް އޮފިޝަލުން ބައިވެރިވެ ވަޑައިގެންނެވިއެވެ.
އައްޑޫ ސިޓީ ހިތަދޫގައި ޤާއިމުކުރާ ކުނި މެނޭޖުކުރާ ޞަރަޙައްދީ މަރުކަޒަކީ އައްޑޫ ސިޓީއާއި، ފުވައްމުލައް ސިޓީއާއި، ހުވަދު އަތޮޅުގެ އުތުރުބުރިއާއި، ދެކުނުބުރީގެ މީހުން ދިރިއުޅޭ ރަށްރަށާއި، ރިސޯޓުތަކުގައި އުފެދޭ ކުނީގެ ތެރެއިން ޠަބީޢީގޮތުން ނެތިފަނާވެދާ ކުނި ފިޔަވާ ކުނީގެ އެހެން ބާވަތްތައް މެނޭޖުކުރުމަށާއި، އެކުނި އަންދައިގެން ކަރަންޓާއި، ފެން އުފެއްދުމަށް ޢަމާޒުކޮށް އެކުލަވާލާފައިވާ މަޝްރޫއެކެވެ.
މި މަޝްރޫޢުގެ ޕްރޮޕޯސަލް ދިވެހިރާއްޖެއިން އައިރީނާއަށް ހުށައަޅާފައިވަނީ 2019 ވަނަ އަހަރުއެވެ. ތަރައްޤީވަމުން އަންނަ ޤައުމުތަކުގައި އިޢާދަކުރަނިވި ހަކަތައާއި ގުޅުންހުރި މަޝްރޫޢުތައް ހިންގުމަށް އައިރީނާ އާއި އޭ.ޑީ.އެފް.ޑީ ގުޅިންގެން ކުރިއަށް ގެންދިއުމަށް ހަމަޖެހިފައިވާ 350 މިލިއަން ޑޮލަރުގެ މަޝްރޫޢުގެ ތެރެއިން 2020 ވަނަ އަހަރު ވަނީ ޖުމުލަ 104.5 މިލިއަން އެމެރިކާ ޑޮލަރު 8 ޤައުމަކަށް ދެއްވާފައެވެ.
އައިރީނާ - އޭޑީއެފްޑް ޕްރޮޖެކްޓް ފެސިލިޓީގެ 7 ވަނަ ބުރުގައި 95 ޤައުމަކުން ވާދަކޮށްފައި ވެއެވެ. މީގެ ތެރެއިން މިއަހަރު ފައިސާ ހަމަޖެހިފައިވަނީ 8 ޤައުމަކަށެވެ.
