ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) ދެބައިވީ ކޮރަޕްޝަނާއި ދެކޮޅަށް ބަސް ވިދާޅުވުމުން ކަމަށް ރައީސް މައުމޫން ޢަބްދުލް ޤައްޔޫމްގެ ތިން ވަނަ ޕާޓީ، އެމްއާރުއެމްގެ ސެކްރެޓަރީ ޖެނެރަލް ޢަބްދުލް ޢަލީމް އާދަމް ވިދާޅުވެއްޖެއެވެ.

ރާއްޖެ ޓީވީގެ ފަލަސުރުޚީ ޕްރޮގުރާމުގައި ވާހަކަދައްކަވަމުން ޢަލީމް ވިދާޅުވީ ޑީއާރުޕީ ތެރޭގައި ކޯޅުންގަނޑު ބޮޑުވެ، ރައީސް މައުމޫން ޢަބްދުލްގައްޔޫމުގެ އަތްޕުޅުން ދިވެހި ރައްޔިތުންގެ ޕާޓީ (ޑީއާރުޕީ) އަތުލުމާއި ގުޅިގެން، ސިޔާސީ މަސައްކަތް ކުރިއަށް ގެންދަވަން އެމަނިކުފާނު އުފެއްދެވި ޕާޓީ، ޕީޕީއެމް ދެބައިވީ ކޮރަޕްޝަނާއި ދެކޮޅަށް ބަސް ވިދާޅުވުމުން ކަމަށެވެ.

ޢަލީމް ވިދާޅުވީ އެމްއާރުއެމް ދެބައި ކުރުމަށް މަސައްކަތް ކުރައްވާ އެއްވެސް ބޭފުޅަކު މިވަގުތު އެޕާޓީގައި ހުންނެވި ކަމަކަށް ޤަބޫލު ނުކުރައްވާ ކަމަށެވެ.

ޢަލީމް އިތުރަށް ވިދާޅުވީ ރައީސް މައުމޫން އެމްއާރުއެމް އުފެއްދެވިއިރު ފަހުން ވާނެ ގޮތެއް އެއްވެސް މީހަކަށް ނޭގޭނެ ކަމަށާއި، މިވަގުތައް ކުރަން ޖެހިއްޖެ ނަމަ، އެކަމެއް އެވަގުތަކު ކުރަންޖެހޭ ކަމަށް ވިދާޅުވިކަމަށެވެ.

އެމްއާރުއެމަކީ ރައީސް މައުމޫން އިސްވެ ހުންނަވާ އުފެއްދެވި ތިން ވަނަ ސިޔާސީ ޕާޓީ އެވެ. އެގޮތުން އެންމެ ފުރަތަމަ އުފައްދަވާފައިވަނީ، ދިވެހި ރައްޔިތުންގެ ޕާޓީ (ޑީއާރުޕީ) އެވެ. ނަމަވެސް 2008 ވަނަ އަހަރުގެ ރިޔާސީ އިންތިޚާބު ނާކާމިޔާބުވެ ވަޑައިގެންނެވުމާއި، ޕާޓީގެ ތެރޭގައި ޚިޔާލު ތަފާތުވުންތައް އުފެދި، ޑީއާރުޕީގެ ތެރޭގައި "ޒެޑް ފެކްޝަން"އެއް އުފެދި، އެންމެފަހުން، ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) އުފެއްދެވި އެވެ.

ޕީޕީއެމް އުފެދުމާއެކު، ޑީއާރުޕީގައި އިސްކޮށް އުޅުއްވި ގިނަ ބޭފުޅުންނާއި ކުރީގެ ރައީސް ޢަބްދުﷲ ޔާމީން އުފެއްދެވި ޕީޕަލްސް އެލަޔަންސް (ޕީއޭ)ގައި އިސްކޮށް އުޅުއްވި ގިނަ ބޭފުޅުން ޕީޕީއެމާ ގުޅި، ޕީޕީއެމް ސިޔާސީ ގޮތުން ވަރުގަދަ ކޮށްފައި ވެއެވެ. އެގޮތުން 2013 ވަނަ އަހަރުގެ ރިޔާސީ އިންތިޚާބުގައި ރައީސް ޔާމީނު ރިޔާސީ ކެންޑިޑޭޓަކަށް ނިކުންނަވާ، އިންތިޚާބު ކާމިޔާބު ކުރެއްވިއިރު، ވެރިކަމަށް އަހަރެއް ނުވަނީސް، ޕީޕީއެމްގެ ރައީސް، ރައީސް މައުމޫނާއި، ރައީސް ޔާމީނާއި ދެބޭފުޅުންގެ މެދުގައި މައްސަލަތައް އުފެދެން ފެށިއެވެ. އެންމެފަހުން ރައީސް މައުމޫން ޕީޕީއެމުން ވަކި ކުރެއްވީ އެވެ.