ފަސް އަހަރުގެ ޖަލު ޙުކުމެއް ތަންފީޒުކުރައްވަމުން ގެންދަވާ ކުރީގެ ރައީސް ޢަބްދުﷲ ޔާމީނު ކަފާލާތުގެ ދަށުންވެސް އަދި އެނޫންގޮތަކަށްވެސް ދޫކޮށްލަން ނުފެންނަކަމަށް މޯލްޑިވްސް ރިޕޯމް މޫވްމެންޓް (އެމްއާރުއެމް) ގެ ސެކްރެޓަރީ ޖެނެރަލް ޢަބްދުލް ޢަލީމް ވިދާޅުވެއްޖެ އެވެ.

ރާއްޖެ ޓީވީގެ "ފަލަ ސުރުޚީ" ޕްރޮގުރާމުގައި ވާހަކަދައްކަވަމުން ޢަލީމް ވިދާޅުވީ ރައީސް ޔާމީނުގެ މައްޗަށް ކޮށްފައިވާ ޚިޔާނާތުގެ ފައިސާގެ ތުހުމަތު އެމަނިކުފާނުގެ މައްޗަށް ސާބިތުވެފައިވާއިރު އަދިވެސް އެމަނިކުފާނުގެ މައްޗަށް ކުރެވޭ ޚިޔާނާތުގެ އެތައް މައްސަލައެއް ބަލަމުންދާކަމަށެވެ. އެހެންކަމުން އެފަދަ ބޭފުޅެއް އެއްގޮތަކަށްވެސް ދޫކޮށްލުމަކީ ވެގެންވާނެ ގޮތެއް ނޫންކަމަށް ޢަލީމް ވިދާޅުވިއެވެ.

ޢަލީމް ވިދާޅުވީ ރައީސް ޔާމީނުގެ މައްޗަށް ދިވެހި ރައްޔިތުންނާއި، އަދި ދިވެހި ޤައުމަށާއި ދިވެހި ޤައުމުގެ ތަރައްޤީއަށް ހުރި އެތައް ފައިސާއެއްގައި ޖެހި، އެ ތުހުމަތުގައި އަދިވެސް އެތައް މައްސަލަތަކެއްގެ ތަޙުޤީޤުތައް ކުރިޔަށް ބަލަމުން ގެންދާކަމަށެވެ. މީގެއިތުރުން ރައީސް ޔާމީނަށް ޙުކުމް އިއްވިއިރު ޕީޕީއެމް ޕީއެންސީ ކޯލިޝަނުގެ މެންބަރުން އޭރު މަގުތައް މަތީ އަޑުއުފުލަމުން ދިޔަކަމަށާއި، ނަމަވެސް މިހާރު އެމަންޒަރު ނުފެންނާތީ އެކަމާ ގުޅޭގޮތުން ސުވާލު ދެންނެވުމުން ޢަލީމް ވިދާޅުވީ ރައީސް ޔާމީނަށް ތާޢީދު ނެތްކަން އެމަނިކުފާނުގެ ސަޕޯޓަރުންވެސް އެއްބަސްވަމުންދާ ކަމަށެވެ.

އެގޮތުން ރައީސް ޔާމީނުގެ ލޯޔަރ އާސިފް ވަރަށް ފަހުން ކުރެއްވި ޓްވީޓެއްގައި އެމްޕީއެލް އާއި، އެމްޓީސީސީ އާއި، ސްޓެލްކޯ ފަދަ ތަންތަނުގައި ނަން ޖަހާ މިތަންތަނުން ވަރަށް ގިނަ ފަރާތްތަކަކަށް ޔާމީންގެ ސަރުކާރުގައި ވަޒީފާ ދިނޭ ބުނެފައިވާކަމަށެވެ. ނަމަވެސް މިހާރު އެމީހުން ނެތްކަމަށާއި، މިއީ ހުސް ވައި ކުޑައިގައި ފޭބި މީހުންނަށޭ ހުސް ވަޒީފާ ދީފައި ހުންނަކަމަށް ޓްވީޓް ކުރެއްވިކަމަށެވެ. އެހެންކަމުން ޤަބޫލުކުރެވެނީ އެބޭފުޅުން އޭރުވެސް ތާޢީދު ހޯދާފައި އޮތީ ވިޔަފާރީގެ އުޞޫލުން ކަމަށެވެ. އެބޭފުޅުން އޭރުގައި މަސައްކަތް ކުރެއްވި ގޮތަކީ ނުފޫޒު ފޯރުވައިގެން ނުފޫޒުގެ ބޭނުންކޮށްގެން ތާޢީދު އޮތްކަން ދައްކަން ކަމަށް ޢަލީމް ވިދާޅުވި އެވެ.