އައްޑޫގައި ވިހެއުމަށްފަހު ތުއްތު ކުއްޖަކު މެރި މައްސަލައިގެ އަޑުއެހުމެއް މާދަމާ

އައްޑޫސިޓީ މަރަދޫފޭދޫގައި ތުއްތު ކުއްޖަކު ވިހެއުމަށްފަހު ވަޅުލި މައްސަލައިގެ ޝަރީޢަތުގެ އަޑުއެހުމެއް އާދިއްތަ ދުވަހު ކްރިމިނަލް ކޯޓުގައި ތާވަލުކޮށްފިއެވެ.

ވިހެއުމަށްފަހު ކުއްޖާ ވަޅުލި މައްސަލާގައި ޤަސްތުގަ ކުއްޖަކު މެރުމުގެ ދަޢުވާ އުފުލާފައި ވަނީ ސ. މަރަދޫ ޝޭމްރޮކް އާމިނަތު ޝާހީ އާލަމް، އާއި އޭނާގެ ފިރިމީހާ ސ. މަރަދޫ ފޭދޫ ފިނިފެންމާގޭ އިބްރާހީމް ވިސާމްގެ މައްޗަށެވެ.

އެގޮތުން މި މައްސަލައިގެ ޝަރީޢަތުގެ އަޑުއެހުން ތާވަލުކޮށްފައިވަނީ އާދިއްތަ ދުވަހުގެ މެންދުރު 14:00 އަށެވެ. މި އަޑުއެހުމުގައި އޮންނާނީ ހެއްކާ ގުޅޭގޮތުން ވާހަކަދެއްކުމެވެ.

މި މައްސަލައިގެ ޝަރީޢަތުގެ އަޑުއެހުމެއް އެންމެ ފަހުން ބާއްވާފައިވަނީ ފާއިތުވި އަހަރުގެ ޑިސެންބަރު މަހުގެ 31 ވަނަ ދުވަހުއެވެ. އެގޮތުން މި އަޑުއެހުމުގައި ވަނީ ދަޢުލަތުގެ ފަރާތުން ހުށައަޅާފައިވާ ދެ ހެކިވެރިއެއްގެ ހެކިބަސް ނަގާފައެވެ. އެގޮތުން ޙާދިސާ ހިނގިއިރު ހިތަދޫ ރީޖަނަލް ހޮސްޕިޓަލުގައި ވަޒީފާ އަދާކުރެއްވި ރިޒްހާ ރަޒީނާއި، މި މައްސަލައިގެ ޑީއެންއޭ ތަޙުލީލު ރިޕޯރޓް ތައްޔާރު ކުރެއްވި އޮފިސަރުގެ ހެކިބަސް ވަނީ ނަގާފައެވެ.

އޭގެ އިތުރުން، މި މައްސަލައިގައި ހިމެނޭ ދެމަފިރިންނާއި، އެ ކުއްޖާގެ ޑީއެންއޭ ސާމްޕަލް ދިމާވާކަމަށް ޑީއެންއޭ ތަހުލީލު ރިޕޯރޓް ތައްޔާރު ކުރެއްވި އޮފިސަރު އެ އަޑުއެހުމުގައި ވަނީ ވިދާޅުވެފައެވެ.

މި މައްސަލައަކީ 2012 ވަނަ އަހަރުގެ މައްސަލައެކެވެ.