މިއީ ނުފުއްދޭ ވައުދުތައްވާ ސަރުކާރެއް، އަޅުގަނޑުމެންނަށް ވޯޓުދީ: ޕީޕީއެމް

ރާއްޖެ ވެއްޓިފައިވާ އަނދަވަޅުން ނެގެން އޮތީ ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) އަށް ވޯޓުދީގެން ކަމަށް އެ ޕާޓީ ހިމެނޭ ޕްރޮގްރެސިވް ކޯލިޝަނުން ބުނެފިއެވެ.

ޕީޕީއެމް ޕީއެންސީ ހިމެނޭ ޕްރޮގްރެސިވް ކޯލިޝަނުން ނެރުނު ނޫސްބަޔާނެއްގައި ބުނީ، މޯލްޑިވިއަން ޑިމޮކޮރަޓިކް ޕާޓީ (އެމްޑީޕީ)ގެ ރައީސް, ރައީސް މުހައްމަދު ނަޝީދު އިސްކޮށް ހުންނަވައިގެން އެޖެންޑާ 19 ޕްރޮމޯޓް ކުރުމަށް އަތޮޅު ތެރެއަށް ދަތުރުފުޅުތައް ކުރައްވަމުން ގެންދަވާ ކަމަށެވެ. އެގޮތުން މި ސަރުކާރަކީ ނުފުއްދޭ ވައުދުތައް ވާ ސަރުކާރެއް ކަމަށާއި، އެކަން ވޭތުވެ ދިޔަ ދުވަސްތަކުގައި އެނގިފައިވާ ކަމަށްވެސް ވަނީ ބުނެފައެވެ.

ޕީޕީއެމްގެ ބަޔާނުގައި އިތުރަށް ބުނީ، ރައީސް އަބްދުﷲ ޔާމީނަށް ތާއީދު ކުރައްވާ ކޯލިޝަންގެ މެމްބަރުންނާއި، ދިވެހި ޤައުމުދެކެ ލޯބިވާ ރައްޔިތުންނަށް އެމްޑީޕީން ދައްކަމުންދާ "ދަޅަ" ތަކަށް ނުހެއްލުމަށް އިލްތިމާސް ކުރާ ކަމަށެވެ. އަދި ލޯކަލް ކައުންސިލް އިންތިހާބުގައި ޕީޕީއެމްއަށް ވޯޓު ދެއްވައިގެން ނޫނީ މި ޤައުމު ވެއްޓިފައިވާ އަނދަވަޅުން ސަލާމަތް ނުކުރެވޭނެ ކަމަށް ޕީޕީއެމުން ބުންޏެވެ.

އޭގެއިތުރުން، ޕީޕީއެމް އިން ވަނީ ލޯކަލް ކައުންސިލް އިންތިޙާބާއި ދިމާކޮށް ސަރުކާރުން ރައްޔިތުންނަށް އޮޅުވާލުމަށް މަސައްކަތް ކުރާކަމަށާއި، ދައުލަތުގެ ވަސީލަތްތައް ނަހަމަ ގޮތުގައި ބޭނުން ކުރަމުންދާކަމަށް ތުހުމަތުކޮށް، އެކަން ހުއްޓާލުމަށް ގޮވާލާފައެވެ.

ޕްރޮގްރެސިވް ކޯލިޝަނުން އެހެން ބުނެފައިވާއިރު، ވޭތުވެ ދިޔަ ސަރުކާރުގައި ސަރުކާރު ހިންގާ ޕާޓީ ޕީޕީއެމުން ރިޔާސީ އިންތިހާބުގެ ކެމްޕޭނުގައި ދައުލަތުގެ އެކި މުއައްސަސާތަކުގެ މުވައްޒަފުންނާއި ދައުލަތުގެ ވަސީލަތްތައް ނަހަމަ ގޮތުގައި ބޭނުން ކުރިކަމުގެ ބޮޑެތި ތުހުމަތުތަކެއް ވަނީ ކުރެވިފައެވެ. އަދި އެ މައްސަލަތައް އޭރު އެންޓި ކޮރަޕްޝަން ކޮމިޝަން (އޭސީސީ) އަށްވެސް ހުށައެޅިފައިވެއެވެ.

އޭގެއިތުރުން، ޕީޕީއެމުން އޭރު ދައުލަތުގެ ވަސީލަތްތައް ބޭނުންކުރަމުންދާތީ އޭސީސީން ވެސް އެކަންކަން ހުއްޓުވުމަށް މަސައްކަތްތަކެއް ކޮށްފައިވެއެވެ. އެގޮތުން ޕީޕީއެމުން ސިޔާސީ ކަންކަމުގައި މުލިއާގެ ބޭނުން ކުރަމުންދާތީ އެކަން ހުއްޓާލުމަށް އޭސީސީން އޭރު އަންގާފައިވެއެވެ.