މޫސަ ރިޔާސަތުގައި އިންނަވައިގެން ރަތަށް، މަހުލޫފް ޖަލުގައި އޮންނެވިިއިރު ރަތަށް، މިއީ ކިހިނެއްވާ ކަމެއް؟
މަޖިލީހުގެ ރިޔާސަތުގައި އިންނަވާ ބޭފުޅަށް ވޯޓު ދެއްވޭނީ ވޯޓް އެއްވަރު ވެއްޖެ ހިނދެއްގައި
މަޖިލީހުގެ ނައިބު ރައީސް މޫސާމަނިކު
ރައްޔިތުންގެ މަޖިލީހުގެ ރައީސް އަބްދުﷲ މަސީހު މުހައްމަދު މައްޗަށް އިތުބާރު ނެތްކަމުގެ ވޯޓު ލުމަށްޓަކައި ވޯޓް ލާނެގޮތެއް ކަނޑައެޅުމަށް ނެގި ވޯޓުގައި މަޖިލީހުގެ ރިޔާސަތުގައި އިންނެވި ނައިބު ރައީސް މޫސާމަނިކު އާއި ޖަލު ހުކުމެއް ތަންފީޒު ކުރައްވަމުން ގެންދަވާ ގަލޮޅު ދެކުނު ދާއިރާގެ މެމްބަރު އަހުމަދު މަހުލޫފް ވޯޓް ދެއްވާފައިވާ ކަމަށް މަޖިލީހުގެ ވޯޓިން ސިސްޓްމުން ދައްކައިފި އެވެ.
މޫސާމަނިކު އާއި މަހުލޫފް ވޯޓް ދެއްވާފައި ވަނީ ނުފެންނަ ކަމަށެވެ.
ވޯޓަށް އަހާފައި ވަނީ ޕީޕީއެމް ޕާލަމެންޓްރީ ގްރޫޕް ލީޑަރު އަހުމަދު ނިހާނު ހުސައިން މަނިކު ހުށަހެޅުއްވި ހުށަހެޅުއްވުމަށެވެ. އެއީ ވަކިވަކި މެމްބަރުންނާ ސުވާލުކޮށްގެން ވޯޓު ނެގުމަށެވެ.
ނިހާނުގެ އެހުށަހެޅުން 45 މެމްބަރުންގެ އިޣްލަބިއްޔަތުން ފާސްވެއްޖެ ކަމަށް އިއުލާނު ކުރެއްވިއިރު، ނުފެންނަ ކަމަށް ދެ މެމްބަރުން ތިއްބެވި ކަން ވެސް ވަނީ އިއުލާން ކުރައްވާފަ އެވެ. ނުފެންކަމަށް ވޯޓު ދެއްވި ކަމަށް ސިސްޓަމުން ދައްކަނީ މިޖަލްސާގައި ވޯޓު ދިނުމުގެ ހައްގު ލިބިގެންނުވާ، ރިޔާސަތުގައި އިންނެވި މޫސާމަނިކު އާއި ޖަލުގައި ހުންނެވި މަހުލޫފް އެވެ.
ރިޔާސަތުގައި އިންނެވި މޫސަ އާއި ޖަލުގައި ހުންނެވި މަހްލޫފް "ރަތަށް" ވޯޓް ދެއްވާފަ
މީގެ އިތުރުން ވޯޓްލި ވަގުތު އިތުރު މެމްބަރުންގެ ވޯޓާ ވެސް ކުޅެ ސިސްޓަމްގެ "މައުސް މޫވްމަންޓްތައް" ވެސް ފެނިގެންދިޔަ އެވެ.
މިއީ މަޖިލީހުގެ ރިޔާސަތުން މިފަދަ ގޮތަކަށް ވޯޓް އޮޅުވާލި ފުތަރަމަ ފަހަރެވެ.
ވޯޓް ނެގި ވަގުތު، މަސީހުގެ އިތުބާރު ނެތް ކަމަށް މަޖިލީހަށް ހުށަހެޅި ޖޮއިންޓް ޕާލަމެންޓްރީ ގްރޫޕްގެ މެމްބަރުން ގެންދެވީ މަޖިލީހުގެ ތަޅުމުގައި އިހުތިޖާޖު ކުރައްވަމުންނެވެ. ނަމަވެސް މޫސަ ވަނީ ވޯޓުލުން ކުރިއަށް ގެންދަވާފަ އެވެ.
ނިހާނުގެ އެހުށަހެޅުން ފާސްވެއްޖެކަމަށް މޫސާ އިއުލާނު ކުރެއްވުމާ އެކު ޖަލްސާ ކުރިއަށް ނުގެންދެވޭވަރަށް މަޖިލީހުގެ ތަޅުން ހޫނު ވުމުގެ މަޖިލިސް ވަނީ މެދުކަނޑާލާފަ އެވެ.
