ކުޅުދުއްފުށި ސިޓީގެ އިންތިޚާބީ ދާއިރާތައް ކަނޑައަޅާ، ޙިޔާލު ހުށަހެޅުމުގެ ފުރުޞަތު ހުޅުވާލައިފި
މި މަހުގެ 11 ވަނަ ދުވަހު ހިޔާލު ހުށަހެޅޭނެ
އިލެކްޝަންސް ކޮމިޝަނުން ގުރުލުން ކުރިއަށްގެންދަނީ
ކުޅުދުއްފުށި ސިޓީގެ އިންތިޚާބީ ދާއިރާތައް ކަނޑައަޅާ، ނަންތަކަށް ޙިޔާލު ހުށަހެޅުމުގެ ފުރުޞަތު ހުޅުވާލައިފިއެވެ.
އިލެކްޝަންސް ކޮމިޝަން (އީސީ) އިން ބުނީ އެ ނަންތަކަށް ހިޔާލު ހުށަހެޅުމަށް ހުޅުވާލާފައިވަނީ މި މަހުގެ 11 ވަނަ ދުވަހުގެ ހެނދުނު 9:00 އަކުން މެންދުރު ފަހު 3:00 އަށެވެ. އަދި އެ ކޮމިޝަނުގެ އީ-މެއިލް، ޓްވިޓަރ އަދި ފޭސްބުކް މެދުވެރިކޮށްވެސް ޚިޔާލު ހުށަހެޅޭނެ ކަމަށް އީސީ އިން ބުނެއެވެ.
ކުޅުދުއްފުށި ސިޓީގެ އިންތިޚާބީ ދާއިރާތައް ކަނޑައަޅާފައިވާ ގޮތް:
ކުޅުދުއްފުށި ސިޓީގެ އިންތިޚާބީ ދާއިރާތައް ކަނޑައެޅުމަށް ބޭއްވި ގުރުނެގުމުގައި ވާހަކަ ދައްކަވަމުން އެ ކޮމިޝަންގެ ނައިބު ރައީސް އަހްމަދު އަކްރަމް ވިދާޅުވީ މިފަހަރު ބާއްވާ ލޯކަލް ކައުންސިލް އިންތިހާބުގައި މުޅި ރާއްޖެއިން ދެ ލައްކަ ފަސް ދޮޅަސް ނުވަހާސް ހަސްތޭކަ ތޭވީސް މީހުންނަށް ވޯޓުލުމުގެ ހައްޤު ލިބިފައިވާ ކަމަށެވެ. މިހާތަނަށް ލިބިފައިވާ ތަފާސް ހިސާބުތައް ދައްކާގޮތުން ކުޅުދުއްފުށީގެ އާބާދީ އަކީ 10210 މީހުން ކަމަށާއި އެހެންކަމުން ކުޅުދުއްފުށި 6 ދާއިރާއަކަށް ބެހިގެންދާ ކަމަށެވެ. އަދި 6 ދާއިރާއަކަށް ބެހުމުން 6 ކައުންސިލަރުން އިންތިހާބު ކުރުމުގެ އިތުރުން މޭޔަރު އިންތިހާބު ކުރުމުގެ ފުރުސަތު ލިބިގެންދާނެ ކަމަށް ވެސް އޭނާ ވިދާޅުވިއެވެ.
އިލެކްޝަންސް ކޮމިޝަނުން ނެގި ގުރުއަތުން، އެ ހަ ދާއިރާގެ ތެރެއިން އަންހެން މެމްބަރުން ހޮވާ ދެ ދާއިރާގެ ގޮތުގައި ހޮވުނީ ކުޅުދުއްފުށި މެދު އުތުރު ދާއިރާ އާއި ކުޅުދުއްފުށި މެދު ދެކުނު ދާއިރާއެވެ.
ކުޅުދުއްފުއްޓަށް ސިޓީގެ ދަރަޖަ ރައިސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ދެއްވާފައިވަނީ މި ހިނގާ ޖެނުއަރީ މަހުގެ 1 ވަނަ ދުވަހުން ފެށިގެންނެވެ. އެރަށަށް ސިޓީއެއްގެ ދަރަޖަ ދިނުމަކީ ރައީސް ޞާލިޙުގެ ރިޔާސީ ވަޢުދުފުޅަކަށްވާއިރު، އާބާދީގައި 10،000 މީހުން ހަމަވެއްޖެނަމަ އެ ރަށަކަށް ސިޓީއެއްގެ ދަރަޖަ ދެވިގެންދާނެކަމަށް ޤާނޫނުގަ ބަޔާންކޮށްފައިވެއެވެ.
