ބުދަ ދުވަހު އިރާންގެ ވެރިރަށް ތެހެރާންގެ އެއާޕޯޓާ މާ ދުރު ނޫން ހިސާބަށް ވެއްޓުނު ޔޫކްރެންގެ ފްލައިޓް އަށް މިސައިލް ހަމަލާއެއް އަރާ މަންޒަރު ކަމަށް ބުނާ ވީޑިއޯއެއް ސޯޝަލް މީޑިއާގައި އާންމުވެއްޖެއެވެ.

ތެހެރާންގެ އިމާމް ހޮމެއީނީ އިންޓަނޭޝަނަލް އެއާޕޯޓުން ފުރައިގެން ކިއޭވް އަށް ދަތުރުކުރި ޔޫކްރެން އިންޓަނޭޝަނަލް އެއާލައިންގެ ފްލައިޓް ޕީއެސް752 ވެއްޓުނީ ނައްޓާލިތާ ކުޑައިރު ކޮޅެއްގެ ތެރޭގައެވެ. ފްލައިޓުން ދަތުރުކުރި 176 ފަސެންޖަރުން ވަނީ މަރުވެފައެވެ.

ފްލައިޓް ވެއްޓޭ ވީޑިއޯ އެންމެ ފުރަތަމަ އާއްމުކޮށްފައިވަނީ ނިއުޔޯކް ޓައިމްސް އާއި ސީއެންއެން އިންނެވެ. ވީޑިއޯ އާއްމުކޮށްފައި މިވަނީ ޔޫކްރެއިންގެ ފްލައިޓް ވައްޓާލީ އިރާނުގެ މިސައިލަކުން ކަމަށް އިންޓެލިޖެންސް މައުލޫމާތު ލިބިފައިވާ ކަމަށް އިނިގިރޭސިވިލާތާ، ކެނެޑާގެ އިތުރުން އެމެރިކާ އޮފިޝަލުން ބުނެފައި ވަނިކޮށެވެ. އޮފިޝަލުން ބުނަނީ، އެއީ އޮޅިގެން އިރާނުން ދިން ހަމަލާއެއް ކަމަށްވުން އެކަށީގެންވާ ކަމަށެވެ.

އާއްމުވެފައިވާ ވީޑިއޯ އިން ފުރަތަމަ ފެންނަނީ ކުޑަ ގޮވުމެއް ގޮވާތަނަވެ. ނިއުޔޯކް ޓައިމްސް އިން ރިޕޯޓްކޮށްފައިވާ ގޮތުން އެ ގޮވުން ގޮވާފައިވަނީ ޔޫކްރެއިންގެ ފްލައިޓްގެ ޓްރާންސްމިޓިން ސިގްނަލް ހުއްޓުނު ޕަރަންދު އަވަށުގެ މަތިންނެވެ.

އެ ކުޑަ ގޮވުމަށް ފަހުވެސް ފްލައިޓް އަނބުރާ އެއާޕޯޓާ ދިމާލަށް ދިޔުމަށް ދުއްވި ކަމަށް އެ ނޫހުން ރިޕޯޓްކުރެއެެވެ. އެއަށް ފަހު ފްލައިޓް އެއްކޮށް ގޮވައި ގޮސް ބިމަށް ވެއްޓުމަށްފަހު ބާރުގަދަ އަޑުފަށްގަނޑެއް ގޮވާއަޑު ވީޑިއޯ އިން އިވެއެވެ.

ޖިއޯލޮކޭޝަން ޓެކްނޮލޮޖީ ބޭނުންކޮށްގެން އާއި ބެލިންކެޓްގައި މަސައްކަތްކުރާ ރިސާޗަރުންނާއި ނޫސްވެރިން ވަނީ އެ ވީޑިއޯ ނަގާފައިވަނީ ޕަރަންދުގައިކަން ޔަގީންކުރެވިފައިވާ ކަމަށް ހާމަކޮށްފައެވެ.

ނިއުޔޯކް ޓައިމްސް އަދި ސީއެންއެން އިން ބުނީ އެ ނޫސްތަކަށް ވީޑިއޯ ފޮނުވާފައިވަނީ އިންޓަނެޓް-ފްރީޑަމް ރިސަރޗަރ ނަރިމަން ގާރިބް ކަމަށެވެ. ގާރިބަށް އެ ވީޑިއޯ ދީނީ އެހެން މީހެކެވެ.

ބެލިންކެޓުން ރިޕޯޓްކުރާ ގޮތުން، ފްލައިޓަށް އަމާޒުކޮށް ދެ މިސައިލް ފޮނުވާފައިވުން އެކަށީގެންވާ ކަމަށެވެ. އަދި މިސައިލްތަކުގެ އަޑު އިވުމާއެކު އެ ވީޑިއޯ ނެގި ފަރާތުން ވީޑިއޯ ކުރަން ފެށުމުގެ ފުރުސަތު ބޮޑުކަމަށެވެ.

އިރާނުން ވަނީ ފްލައިޓަށް މިސައިލް ހަމަލާއެއްދިން ކަމަށް ދެކެވޭ ވާހަކަތައް ދޮގުކޮށްފައެވެ. އެ ހާދިސާ ހިނގާ ދިޔަގޮތް ތަހުގީގު ކުރުމަށް ކެނެޑާގެ ބޮޑުވަޒީރު ޖަސްޓިން ޓްރޫޑޯ ވަނީ ގޮވާލައްވާފައެވެ. މަރުވި މީހުންގެ ތެރޭގައި ކެނެޑާގެ 63 ރައްޔިތުން ހިމެނެއެވެ.