ހއ. ދިއްދޫ ގައި ޢިމާރާތްކޮށްފައިވާ ހައުސިންގ ޔުނިޓްތަކަށް ހުށަހަޅާފައިވާ ފޯމުތައް އަލުން އިވެލުއޭޓްކޮށް ލިސްޓުތައް އަލުން ތަރުތީބު ކުރުމުގެ މަސައްކަތް ފަށައިފިއެވެ.

ހައުސިން މިނިސްޓްރީން ބުނީ ސަރުކާރުން ކުރިއަށްގެންދާ ބޯހިޔާވަހިކަމުގެ ޕްރޮގުރާމުގެ ދަށުން ދިއްދޫގައި ޢިމާރާތްކޮށްފައިވާ ހައުސިން ޔުނިޓްތައް އޭގެ ޙައްޤުވެރިންނަށް ޙަވާލުކުރުމަށް އެޓަރނީ ޖެނަރަލް އޮފީހާއި، އެންޓި ކޮރަޕްޝަން ކޮމިޝަން (އޭސީސީ)ގެ ލަފާގެ މަތިން ހައުސިންގ ޔުނިޓުތަކަށް ހުށަހަޅާފައިވާ ފޯމުތައް އަލުން އިވެލުއޭޓްކޮށް ލިސްޓްތައް އަލުން ތަރުތީބު ކުރުމުގެ މަސައްކަތް ފަށާފައިވާ ކަމަށެވެ.

ފޯމުތައް އަލުން އިވެލުއޭޓްކޮށް ލިސްޓު ތަރުތީބު ކުރުމުގެ މަސައްކަތް ކުރިއަށް ގެންދަނީ އެކަމަށްޓަކައި އެރަށު ކައުންސިލުން އެކުލަވާލާފައިވާ ޚާއްޞަ ކޮމެޓީއަކުންނެވެ. މިމަސައްކަތުގައި މިނިސްޓްރީން ފަންނީ އެހީތެރިކަން ދެމުންދާ ކަމަށް ހައުސިން މިނިސްޓްރީން މަޢުލޫމާތުދެއެވެ.

ދިއްދޫގައި ބޯހިޔާވަހިކަން ތަރައްޤީކުރުމުގެ ދަށުން ޢިމާރާތްކޮށްފައި ވަނީ 250 ހައުސިން ޔުނިޓެވެ. އަދި އެންމެ ފުރަތަމަ ކެޓަގަރީ އޭ ގެ 125 ހައުސިންގ ޔުނިޓާއި، ކެޓަގަރީ ބީގެ 15 ހައުސިން ޔުނިޓަށް އެދުމަށް ހުޅުވާލާފައިވަނީ 19 އޭޕްރީލް 2015 ގައެވެ. މިބުރުގައި ހުޅުވާލުމުން ހައުސިންގ ޔުނިޓްތައް ހޯދުމަށް އެދި 440 ފަރާތަކުން ވަނީ ފޯމް ހުށަހެޅިއެވެ. ހައުސިންގ ޔުނިޓް ލިބުނު 140 މީހުން ތެރެއިން 135 މީހުން 2018 ޖުލައި މަހު ވަނީ ހައުސިން ޔުނިޓް ޙަވާލުކޮށްފައެވެ.

ދިއްދޫގައި ޢިމާރާތްކޮށްފައިވާ ހައުސިން ޔުނިޓުތަކުގެ ތެރެއިން ޙަވާލުނުކުރެވި ހުރި ބާކީ 110 ޔުނިޓަށް އެދި ހުށަހެޅުމަށް 2018 ވަނަ އަހަރުގެ ޖުލައި މަހުގެ ތެރޭގައި ވެސް ފުރުޞަތު ހުޅުވާލިއެވެ. އަދި ދެވަނަ ބުރުގައި ފުލެޓްތައް ދިނުމުގެ މަސައްކަތް މަޑުޖައްސާލާފައި ވަނީ 110 ހައުސިން ޔުނިޓަށް ހޮވިފައިވާ ފަރާތްތަކުގެ ލިސްޓު އިޢުލާންކުރުމުން އެލިސްޓުގައި މައްސަލަތަކެއް ހުރިކަމުގެ ޝަކުވާތަކެއް ދިއްދޫގެ ގިނަ ރައްޔިތުން މިނިސްޓްރީއާއި، އެރަށުގެ ކައުންސިލަށް ލިބިފައިވާތީއެވެ. އަދި އެސީސީގެ ފަރާތުން ހައުސިންގ ޔުނިޓްތައް ދޫކުރުމާއި ގުޅޭ ގޮތުން ހުށަހަޅާފައިވާ މައްސަލަތައް ބަލަމުންދާތީއާއި، ފުރަތަމަ ބުރުގައި ހައުސިންގ ޔުނިޓް ދޫކޮށްފައިވަނީ ރަނގަޅަށް ނޫންކަމުގައި ބުނެ، ދިއްދޫ ކައުންސިލުންނާއި، ވަރަށް ގިނަ ރައްޔިތުން މިނިސްޓްރީއަށް ޝަކުވާ ހުށަހަޅާފައިވާތީއެވެ.

ހައުސިން މިނިސްޓްރީން ބުނީ އަލުން މިހާރު މަސައްކަތް ފަށާފައި މިވަނީ، މިމައްސަލަތައް ޙައްލުކުރުމަށް އެޓަރނީ ޖެނެރަލް އޮފީހާއި، އޭސީސީގެ ލަފާ ހޯދުމަށްފަހުގައި ކަމަށެވެ. އެގޮތުން އެއިދާރާތަކުގެ ލަފާގެ މަތިން ބާކީ ހުރި 100 ހައުސިންގ ޔުނިޓަށް އެދި ހުޅުވާލާ 30 ޖުލައި 2018 ވަނަ ދުވަހު މިނިސްޓްރީ ކޮށްފައިވާ އިއުލާން ބާޠިލު ކުރުމަށްފަހު 19 އޭޕްރީލް 2015 ވަނަ ދުވަހު ދިއްދޫ ކައުންސިލުން ކޮށްފައިވާ އިޢުލާނަށް އިޖާބަދީ ފޯމު ހުށަހެޅި ފަރާތްތަކުގެ ފޯމުތައް އަލުން އޭރުގެ ޙާލަތަށް ބަލައި، އިވެލުއޭޓްކޮށް އަލުން ލިސްޓް ތަރުތީބުކޮށް ހައުސިންގ ޔުނިޓު ޙައްޤުވާ ފަރާތްތައް ދެނެގަތުމުގެ މަސައްކަތް ކުރަމުން އަންނަ ކަމަށެވެ.

ހައުސިން ޔުނިޓް ލިބުން ޙައްޤުވާ ފަރާތްތަކުގެ ލިސްޓު ފައިނަލް ކުރުމުގެ މަސައްކަތް ނިމުނުހާ އަވަހަކަށް ހައުސިންގ ޔުނިޓް އޭގެ ޙައްޤުވެރިންނަށް ޙަވާލުކުރެވޭނެ ކަމަށް ހައުސިން މިނިސްޓްރީން މަޢުލޫމާތުދެއެވެ.