މޫސަގެ އިތުބާރުގެ މައްސަލައިގައި މެންބަރުންނަށް ފައިސާ ހުށަހަޅާފައިވާނެތޯ އަލީމާ ސުވާލުކޮށްފި
24 މެއި 2017 | ބުދަ 13:34މެންބަރުންނަށް ނުފޫޒުފޯރުވައި ފައިސާ ބެހުމާ ގުޅޭގޮތުން ސުވާލުކުރި
ޕީޕީއެމްގެ ރައީސް މައުމޫން ފެކްޝަންގެ ސެކެޓްރީ ޖެނެރަލް ޢަބްދުލް އަލީމް އާދަމް ރައީސް މައުމޫންއާ އެކު
ރައްޔިތުންގެ މަޖިލީހުގެ ނައިބު ރައީސް، މޫސާ މަނިކުގެ އިތުބާރު ނެތްކަމުގެ މައްސަލައަށް ނުފޫޒު ފޯރުވާފައިވާ ކަމުގެ ތުހުމަތުގައި، ޕީޕީއެމްގެ ރައީސް މައުމޫން ފެކްޝަންގެ ސެކެޓްރީ ޖެނެރަލް ޢަބްދުލް އަލީމް އާދަމާ ފުލުހުން ސުވާލުކޮށްފިއެވެ.
ރައްޔިތުންގެ މަޖިލީހުގެ ނައިބުރައީސްގެ އިތުބާރު ނެތްކަމުގެ މައްސަލައާ ބެހޭ ގޮތުން ހުށަހަޅާފައިވާ މައްސަލައަކާ ގުޅިގެން އަލީމް ވަނީ ބުދަ ދުވަހު ހެނދުނު ފުލުހުންގެ އިދާރާއަށް ހާޒިރުކޮށް ވާލުކޮށްފައެވެ.
އެގޮތުން، ވޯޓަށްނުފޫޒު ފޯރުވުމުގެ ގޮތުން އެއްވެސް ސިޔާސީ ފަރާތަކަށް ފައިސާ ހުށަހަޅާފައިވާނެތޯ އަދި އެއްވެސް ފަރާތަކުން އެއްވެސް ފަރާތަކަށް ދިނުމަށް ފައިސާ ހަވާލުކުރިތޯ އަދި އެ ފައިސާ ގޭގައި ރައްކާކޮށްފައިވާނެތޯ ފުލުހުން ސުވާލުކުރި ކަމަށް އަލީމް ވިދާޅުވިއެވެ.
ފުލުހުންގެ މި ސުވާލުތަކަށް ޖަވާބުދެއްވަމުން، އެއްވެސް ފަރާތަކަށް ދިނުމަށް އެއްވެސް ފައިސާއެއް އެއްވެސް ފަރާތަކުން އަލީމާއި ހަވާލުކޮށްފައި ނުވާކަމަށާއި، އެހެންކަމުން، އެފަދަ ފައިސާއެއް ގޭގައި ނުވެސް ހުންނާނެކަން ފާހަގަކުރައްފައިވާނެ ކަމަށް އަލީމް ވިދާޅުވިއެވެ. އަދި އެފަދަ ފަރާތްތަކުން އަލީމާއި ފައިސާ ހަވާލުކުރި ކަމަށް ބުނާ ނަމަ، އަދި އެއްވެސް މީހަކަށް އަލީމް ފައިސާ ދިންކަމަށް ބުނާ ނަމަ އެއީ ކަނޑައެޅިގެން ދޮގެއް ކަމަށް ވެސް ފުލުހުންގެ ތަހުގީގުގައި ބުނެފައިވާނެ ކަމަށް އަލީމް ވިދާޅުވިއެވެ.
މަޖިލިސް މެންބަރުންނަށް ނުފޫޒު ފޯރުވުމާއި ގުޅޭގޮތުން އަލީމާއި ސުވާލުކޮށްފައިވާއިރު، މީގެ ކުރިން މިފަދަ ތުހުމަތެއްގައި ކޯޓުއަމުރެއްގެދަށުން އަލީމްގެ ފޯނުވެސް ވަނީ ހިފަހައްޓާފައެވެ.
ރައްޔިތުންގެ މަޖިލީހުގެ ރައީސާއި ނައިބު ރައީސްގެ އިތުބާރުގެ މައްސަލައިގައި ރިޝްވަތަށް ތުހުމަތު ކުރެވޭ މިފަދަ ސުވާލުތަކެއް، މީގެ ކުރިން ރައްޔިތުންގެ މަޖިލީހުގެ ބައެއް މެންބަރުން ހާޒިރުކޮށްގެން ވެސް ކޮށްފައިވާއިރު، ކުރު މެދުކެނޑުމަކަށް ފަހު މިފަދަ ސުވާލު ކުރުމަށް ސިޔާސީ ފަރާތްތައް ފުލުހަށް ހާޒިރުކުރަން އަނެއްކާ ވެސް ފަށާފައި މިވަނީ މި އަހަރުގެ ދެވަނަ ދައުރަށް ރައްޔިތުންގެ މަޖިލިސް ހުޅުވާނެ ދުވަސް އިއުލާނު ކޮށްފައި ވަނިކޮށެވެ. އަދި މި ދަނޑިވަޅަކީ، ރައްޔިތުންގެ މަޖިލީހުގެ ރައީސްގެ އިތުބާރު ނެތްކަމުގެ މައްސަލަ އަނެއްކާ ވެސް މަޖިލީހަށް ހުށަހަޅަން އިދިކޮޅު ފަރާތްތަކުން ތައްޔާރުވަމުންދާ ދަނޑިވަޅެކެވެ.
