ކްރިޓިކްސް ޗޮއިސް އެވޯޑު މީޑިއާނެޓުން ވަގުތުން ދައްކާނެ
ވަގުތުން ދެއްކުމަށް ހަމަޖެހިފައިވަނީ މި މަހުގެ 13 ވަނަ ދުވަހު
މީޑިއާނެޓުގެ އޮފީސް
25 ވަނަ އެނުއަލް ކްރިޓިކްސް ޗޮއިސް އެވޯޑު މީޑިއާނެޓުން ވަގުތުން ދައްކާނެ ކަމަށް އެކުންފުނިން ބުނެފިއެވެ.
މީޑިއާނެޓުން ބުނީ މި އެޗޯޑު ހަފުލާ ވަގުތުން ދެއްކުމަށް ހަމަޖެހިފައިވަނީ މި މަހުގެ 13 ވަނަ ދުވަހު ފަތިހު 05:00 ޖަހާއިރު ކަމަށެވެ. އަދި މި އެވޯޑު ހަފުލާގެ ރިޕީޓް، ހަމަ އެ ދުވަހުގެ އިރޮއޮއްސި 18:00 ޖަހާއިރު ދައްކާނެ ކަމަށެވެ. މި އެވޯޑު ހަފުލާ ފެނިގެންދާނީ ޗެނަލް ނަންބަރު 800 އިންނެވެ. އެއީ ފޮކްސް މޫވީސް އެޗްޑީ ޗެނަލެވެ.
މި އެވޯޑު ހަފުލާ އަކީ އެމެރިކަން - ކެނެޑިއަން ބްރޯޑްކާސްޓް ފިލްމް ކްރިޓިކްސް އެސޯސިއޭޝަނުގެ ފަރާތުން ބާއްވާ އެވޯޑު ހަފުލާއެކެވެ. މިއީ އިނގިރޭސި ބަހުން އުފައްދާފައިވާ އެމެރިކާ އަދި ކެނެޑާގެ ފިލްމުތަކަށް ޚާއްޞަކޮށްގެން ބާއްވާ އެވޯޑު ހަފުލާއެކެވެ.
މި އެވޯޑު ހަފުލާގައި 20 ކެޓަގަރީއަށް ވުރެ ގިނަ އެވޯޑުތައް ހަވާލުކުރެވިގެންދާއިރު އޭގެ ތެރޭގައި އެންމެ މޮޅު އެކްޝަން ފިލްމާއި، އެންމެ މޮޅު ފޮރިން ލެންގުއޭޖް ފިލްމާއި، އެންމެ މޮޅު އެކްޓަރ އަދި އެކްޓްރަސް ހޮވިގެންދާނެއެވެ.
މީޑިއާނެޓުން ބުނީ މީޑިއާނެޓްގެ ފެމެލީ ޕެކޭޖުގެ ދަށުން ފޮކްސް މޫވީސް (ޗެނަލް 500) ބެލޭނެ ކަމަށާއި ފޮކްސް މޫވީސް އެޗްޑީ (ޗެނަލް 800) މީޑިއާނެޓްގެ އެންޓަރޓެއިންމަންޓް ޕްލަސް އެޑްއޯން އަދި ވޯންޓް އިޓް އޯލް ޕެކޭޖުގެ ދަށުން ބެލޭނެ ކަމަށެވެ.
