އެމްއޭސީއެލްގެ އެންމެ ރަނގަޅު މުވައްޒަފުންނަށް އެވޯޑުދީފި
މުވައްޒަފުންގެ އަގު ވަޒަންކުރުމަށް އެވޯޑް ދޭން ފަށާފައިވަނީ 2016 ވަނަ އަހަރުން ފެށިގެން
އެމްއޭސީއެލްގެ އެވޯޑް ހަފްލާގެ ތެރެއިން
މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) ގެ އެކި ދާއިރާތަކުން މިއަހަރު އެންމެ ރަނގަޅަށް މަސައްކަތް ކުރި މުވައްޒަފުންނަށް އެވޯޑް ދީފިއެވެ.
ބުރާސްފަތި ދުވަހުގެ ރޭ "އެމްޑީ އެވޯޑްސް" ހަފުލާގައި ހުރިހާ ދާއިރާ އަކުން އެންމެ ރަނގަޅު މުވައްޒަފުގެ މަގާމު ލިބުނީ ޕެސެންޖާ ސާވިސް ޑިޕާޓްމަންޓެގެ އަޝްޖާއު އަބްދުﷲ އަށެވެ. އަދި މެނޭޖްމަންޓް ލެވެލް އިން އެވޯޑް ލިބުނީ އަލީ ރަޝީދަށެވެ. ސޭފްޓީ އެވޯޑް މުހައްމަދު ނަސީމަށް، ކަސްޓަމަރ ސަރވިސް އެކްސްލެންސް އެވޯޑް އައިޝަތު ނަޝްވާ އާއި މަރިޔަމް ނީޒާ އަދި ޝަޒްލާ ހުސެއިނަށް ވަނީ ދީފައެވެ.
ހަފުލާގައި ވާހަކަ ދައްކަވަމުން އެމްއޭސީއެލްގެ މެނޭޖިން ޑިރެކްޓަ އާދިލް މޫސާ ވިދާޅުވީ މިއަހަރު އެ ކުންފުނީގެ ތަރައްގީ އަށް ބޮޑެތި މަސައްކަތްތަކެއް ކުރެވުނު ކަމަށާއި އެއަރޕޯޓް ތަރައްގީ ކުރުމުގެ ޕްރޮޖެކްޓާއި މުވައްޒަފުން ކުރި އެރުވުމަށް އެތައް މަސައްކަތެއް ކުރެވުނު ކަމަށެވެ.
އެމްއޭސީއެލް އިން މުވައްޒަފުންގެ އަގު ވަޒަންކުރުމަށް އެވޯޑް ދޭން ފަށާފައިވަނީ 2016 ވަނަ އަހަރުން ފެށިގެންނެވެ.
