މޯލްޑިވްސް ބޯޓިންގް އެވޯޑްސް: ބޯޓިންގް ޕަރސަނަލަޓީ އެވޯޑު މުފީދު އަބްދުﷲ އަށް
ޖުމްލަ 28 ކެޓަގަރީއަކުން އެވޯޑުތައް ހަވާލުކޮށްފައިވޭ
މުފީދު އަބްދުﷲ ގެ ފަރާތުން އޭނާގެ އާއިލާއިން އެވޯޑާއި ހަވާލުވަނީ
މޯލްޑިވްސް ބޯޓިންގް އެވޯޑްސް 2019 ގެ އެވޯޑްތައް ހަވާލުކޮށްފިއެވެ. މި އެވޯޑު ހަފްލާގެ ތެރެއިން އެންމެ ޝަރަފުވެރި އެވޯޑުކަމަށްވާ ބޯޓިންގް ޕަރސަނަލަޓީ އެވޯޑު ލިބިފައިވަނީ މޯލްޑިވްސް ބޯޓް ކްލަބް އިން މުފީދު އަބްދުﷲ އަށެވެ.
ހޯމަ ދުވަހުގެރޭ ދަރުބާރުގޭ ފާޝަނާ މާލަމުގައި ބޭއްވި މި އެވޯޑް ހަފްލާ ޝަރަފުވެރިކޮށްދެއްވީ ޓޫރިޒަމް މިނިސްޓަރު އަލީ ވަހީދެވެ.
ޖުމްލަ 28 ކެޓަގަރީއަކުން އެވޯޑުތައް ހަވާލުކޮށްފައިވެއެވެ. އެގޮތުން ޑައިވް ގައިޑް އޮފް ދަ އިޔަރ އެވޯޑު މުހައްމަދު ޒިނާހުއަށް ލިބިފައިވާއިރު ސާފް ގައިޑް އޮފް ދަ އިޔަރގެ އެވޯޑު ލިބިފައިވަނީ އަބްދުﷲ އަބްދުއްލަތީފަށެވެ. އަދި ބާކީ އެވޯޑު ލިބިފައިވަނީ ޕްރައިވެޓް ކުންފުނިތަކަށެވެ. މީގެ އިތުރުން "ފޭސަސް އޮފް ދަ ބޯޓިންގް އިންޑަސްޓްރީގެ" އެވޯޑު ޖުމްލަ ހަތް ފަރާތަކަށް ހަވާލުކޮށްފައިވެއެވެ.
މިދިޔަ އަހަރުވެސް މޯލްޑިވްސް ބޯޓިންގް އެވޯޑްސް ބާއްވާފައިވާއިރު ޖުމްލަ 27 ކެޓަގަރީއަކުން ވަނީ އެވޯޑްތައް ހަވާލުކޮށްފައެވެ. މޯލްޑިވްސް ބޯޓިންގް އެވޯޑްސްއަކީ ނެޝަނަލް ބޯޓިންގ އެސޯސިއޭޝަން އޮފް މޯލްޑިވްސްގެ ފަރާތުން އިސްނަގައިގެން ކަނޑުދަތުރު ފަތުރުގެ އިންޑަސްޓްރީގެ ހަރަކާތްތެރިވާ ފަރާތްތަކަށް ހިތްވަރުދީ އެ އިންޑަސްޓްރީ ކުރިއެރުވުމުގެ މަޤްސަދުގައި 2014 ވަނަ އަހަރުން ފެށިގެން ދެމުން އަންނަ އެވޯޑެކެވެ.
ނެޝަނަލް ބޯޓިންގ އެސޯސިއޭޝަން އޮފް މޯލްޑިވްސްގެ ފަރާތުން ބުނީ އެ އެސޯސިއޭޝަންގެ މަޤްސަދަކީ މި ދާއިރާ އިތުރަށް ތަަރައްގީކޮށް، މި ދާއިރާއަށް އަލަށް މީހުން ނެރެދިނުން ކަމުގައެވެ.
