ވޯލްޑް ސްޕާ އެވޯޑުގައި
މީގެ ކުރިންވެސް ރާއްޖެ އަށް މިއެވޯޑް ލިބިފައިވޭ
ރާއްޖޭގެ ރިސޯޓެއް: ފަތުރުވެރިކަމުގެ ދާއިރާއިން ރާއްޖެ އަންނަނީ ގިނަ ކާމިޔާތަކެއް ހޯދަމުން
4 ވަނަ އެނުއަލް ވޯލްޑް ސްޕާ އެވޯޑުގައި "ވޯލްޑް ބެސްޓް ސްޕާ ޑެސްޓިނޭޝަން" އެވޯޑް ރާއްޖެ އަށް ލިބިއްޖެ އެވެ.
އޮކްޓޯބަރ 26 ގައި ދަ އެސްޓީ ރެގިސް މޯލްޑިވްސް ވޮއްމުލި ރިސޯޓުގައި ބޭއްވި އެވޯޑް ހަފްލާގައި ފަތުރުވެރިކަމުގެ ދާއިރާގެ ގިނަ އަދަދެއްގެ ފަރާތްތަކުން ވަނީ ބައިވެރިފައެވެ.
މީގެ ކުރިން ވެސް ރާއްޖެ އަށް މިއެވޯޑް ލިބިފައި ވާއިރު، މި ކެޓަގަރީގައި ރާއްޖެ އާއި ވާދަކޮށްފައި ވަނީ ތައިލެންޑާއި، ހަވާއި، މޮރީޝަސް، އޮސްޓްރޭލިޔާ، ސީޝެލްސް، ޔޫއެސްއޭ، އަދި ޔޫއޭއީ އިންނެވެ.
ޑެސްޓިނޭޝަންގެ އެވޯޑުގެ އިތުރުން ރާއްޖޭގެ ފަތުރުވެރިކަމުގެ ދާއިރާގެ އެހެން ކެޓަގަރީސްތަކުން ވެސް ވަނީ އެވޯޑް ހާސިލްކޮށްފައެވެ.
ވޯލްޑް ސްޕާ އެވޯޑަކީ 2015 ވަނަ އަހަރު ތަޢާރަފްކުރި އެވޯޑަކަށް ވާއިރު ބޮޑަށް މި އެވޯޑް އަމާޒުކޮށްފައި ވަނީ ސްޕާ އެންޑް ވެލްނެސް ސެކްޓަރ އަށެވެ.
ވޯލްޑް ސްކީ އެވޯޑްސް، ވޯލްޑް ގޮލްފް އެވޯޑްސް، ވޯލްޑް ސްޕާ އެވޯޑަކީ 1994 އަހަރު ތަޢާރަފްކުރި ވޯލްޑް ޓްރެވެލް އެވޯޑްގެ ދަށުން ކުރިއަށް ގެންދާ އެވޯޑް ހަފްލާތަކެކެވެ.
މިފަދަ އެވޯޑްތައް ލިބުމުގެ ސަބަބުން ރާއްޖެ އަކީ ލަގްޒަރީ މަންޒިލެއްގެ ގޮތުގައި ފަތުރުވެރިން ބަލައި ގަންނަމުންދާ ކަން ފާހަގަކުރެވޭ އިރު، ފަތުރުވެރިން ރާއްޖެ އަށް އައުމަށް އިތުރަށް މަގު ފަހިވެގެންދެއެވެ.
