ކ. ކަގި ކައިރިއަށް ފަރަށް އެރި "ޓީޓީއެސް ފާނަ" ދޯނިން ގެއްލުނު މީހާ ހޯދުމަށް އެމްއެންޑީއެފް ކޯސްޓްގާޑުން ކުރިޔަށްގެންގާ އޮޕަރޭޝަނުގައި އެޞަރަޙައްދުން ބައެއް ތަކެތި ހޯދައިފިއެވެ.
މިމަހު 06 ވަނަ ދުވަހު މި ދޯނިން ގެއްލިގެން ރިޕޯޓުކޮށްފައިވަނީ ދޯނީގެ ކެޕްޓަން ކަމަށްވާ، ހދ ކުޅުދުއްފުއްޓަށް އުފަން ހަވީރީ ނާޒްގެ އުމުރުން 37 އަހަރުގެ މުހައްމަދު ޔޫސުފްއެވެ.
އެމްއެންޑީއެފުން ބުނީ އޭނާ ހޯދުމަށް އެމްއެންޑީއެފް ކޯސްޓްގާޑުގެ ޑައިވަރުން ކުރަމުންދިޔަ މަސައްކަތުގެ ތެރެއިން ބުރާސްފަތި ދުވަހު ފެނިފައިވަނީ ތުވާއްޔަކާއި ޑަސްބިން ކޮތަޅަކަށްލާފައިވާ ވަޅިއަކާއި ބައެއް އިލެކްޓްރޯނިކް ސާމާނު ކަމަށެވެ.
މީގެ ތެރެއިން ތުވާލި ފެނިފައިވަނީ ކަނޑު 48 މީޓަރު އަޑިން ކަމަށެވެ. އަދި ޑަސްބިން ކޮތަޅަކަށްލާފައިވާ ވަޅިއަކާއި ބައެއް އިލެކްޓްރޯނިކް ސާމާނު ފެނިފައިވަނީ 41 މީޓަރު އަޑިން ކަމަށް އެމްއެންޑީއެފުން މައުލޫމާތުދެއެވެ.
އެމްއެންޑީއެފުން ބުނީ މިފެނުނު ތަކެތި މޯލްޑިވްސް ޕޮލިސް ސަރވިސް އާ ޙަވާލުކުރުމުގެ މަސައްކަތްކުރަމުންދާ ކަމަށެވެ.
މި ދޯނިން ގެއްލުނު މީހާ ހޯދުމަށްޓަކައި އެމްއެންޑީއެފް ކޯސްޓްގާޑުން ދަނީ އެ ސަރަޙައްދު ކަނޑާއި ވައިގެ މަގުން ބަލަމުންނެވެ. އަދި މިއަދާ ހަމައަށް ކުރި މަސައްކަތުން އެމީހާ ފެނިފައެއް ނުވެއެވެ.
