ފަނޑިޔާރުންނަށް ބާރުދޭ މާއްދާ ބާތިލްކޮށް، މައްސަލަތަކަށް ހުއްދަދޭނީ ރަޖިސްޓަރކަމަށް ސުޕްރީމް ކޯޓުން ނިންމައިފި

ސުޕްރީމް ކޯޓަށް މައްސަލަ ހުށައެޅުމުގެ ހުއްދަ ފަނޑިޔާރުންގެ މަޖިލީހަށް ދިނުމަށް ބާރުދީފައިވާ މާއްދާތައް ބާތިލުކުރުމަށް ސުޕްރީމް ކޯޓިގެ ފަނޑިޔާރުންގެ މަޖިލީހުން ނިންމައިފިއެވެ.

އެކަމާ ގުޅޭގޮތުން ސުޕްރީމް ކޯޓުންކުރި ޓްވީޓެއްގައި ބުނީ، ދިވެހި ރާއްޖޭގެ ކޯޓުތަކުގެ ޤާނޫނުގައި ސުޕްރީމް ކޯޓަށް މައްސަލަ ހުށައެޅުމުގެ ހުއްދައަށް އެދި ހުށައަޅާ މައްސަލަތަކާމެދު ގޮތެއް ނިންމާނީ ރަޖިސްޓްރާ ކަމަށް ބަޔާންކޮށްފައިވާ ކަމަށެވެ. އެގޮތުން އެ ޤާނޫނަށް އަމަލުކުރަމުންދާއިރު، ސުޕްރީމް ކޯޓުގެ ޤަވާއިދުގެ 57 ވަނަ މާއްދާގެ (ހ) އާއި، ސުޕްރީމް ކޯޓުގެ ފަނޑިޔާރުންގެ މަޖިލީހުގެ ޤަވާއިދުގެ 4 ވަނަ މާއްދާގެ (އ) ގައި އެފަދަ މައްސަލަތަކާމެދު ގޮތެއް ނިންމާނީ ފަނޑިޔާރުންގެ މަޖިލީހުން ކަމަށް ކަނޑައަޅާފައިވާއިރު، އެއީ ކޯޓުތަކުގެ ޤާނޫނާއި ޚިލާފު މާއްދާއެއްކަން ސުޕްރީމް ކޯޓުން ވަނީ ފާހަގަކޮށްފައެވެ.

އެކަމުގެ ސަބަބުން ފަނޑިޔާރުންގެ މަޖިލީހުން ވަނީ އެ މާއްދާތައް ބާތިލުކުރުމަށް ނިންމާފައެވެ.